စစ်ကိုင်းတိုင်း၊ ကလေးမြို့၊ နည်းပညာတက္ကသိုလ် (GTC) ကျောင်းအနီးရှိ သာယာကုန်းကျေးရွာတွင်် အောက်တိုဘာလ ၈ ရက်နေ့ မနက်ပိုင်းက စစ်ကောင်စီတပ်ဖွဲ့ဝင်များ ကျေးရွာအတွင်းဝင်ရောက်လာကာ လူနေအိမ် ၄ လုံးကို မီးရှို့ဖျက်ဆီးခဲ့ပြီး ရွာသား ၃ ဦးကိုလည်း ဖမ်းဆီးခံခဲ့ရကြောင်းသိရသည်။
စစ်ကောင်စီတပ်ဖွဲ့ဝင်များက သာယာကုန်းရွာသားများကို ဖမ်းဆီးခြင်းနှင့် လူနေအိမ်များ မီးရှို့ဖျက်ဆီးခြင်းတို့ကြောင့် ပြည်သူများ စိုးရိမ်ကြောက်ရွပြီး ရွာ၏အနောက်ဖက်ရှိ ကျေးရွာ၊ တောထဲနှင့် ကလေးမြို့တွင်ရှိသော ဆွေးမျိုးများထံ ထွက်ပြေးခိုလှုံနေကြရသည်ဟု သာယာကုန်းကျေးရွာမှ ကလေးမြို့တွင် ထွက်ပြေးတိမ်းရှောင်လာသူတစ်ဦးက ပြောသည်။
“ဒီမနက်ပိုင်း စစ်သားတွေရွာထဲဝင်လာတယ်၊ အိမ်တွေလည်းမီးရှို့တယ် ရွာအပြင်က အိမ် ၃ လုံး၊ ရွာထဲက ၁ လုံး၊ အသိ ၁ ယောက်လည်း အဖမ်းခံရတယ်၊ ကျန်အဖမ်းခံရတာ အတိအကျတော့မသိဘူး။ ကျမတို့လည်း ကလေးမြို့ ဆွေမျိုးတွေစီမှာ ပြောင်းပြီးလာနေတယ်၊ အိမ်မှာ ပစ္စည်း တွေ ဒီအတိုင်းပဲထားခဲ့ရတယ်။” ဟု ပြောသည်။
အဆိုပါမီးလောင်မှုကြောင့် ပျက်ဆီးသည့်အိမ်မှာ ကလေး-ဂန့်ဂေါကားလမ်းဘေးတွင်ရှိသော ဆိုင်ကယ်ပြင်ဆိုင် ၁ ဆိုင်၊ သီဟထွန်း ဆန်စက် ၂ ပိုင်ရှင်၏ တိုက်အိမ် ၁ အိမ်၊ အလုပ်သမားအဆောင်၊ အလုပ်သမားများနေအိမ်နှင့် အိမ်သာအပြင် ဆိုင်ကယ် ၂ စီး ခိုးယူသွားကြသည်ဟု သိရသည်။
အာဏာသိမ်းစစ်ကောင်စီက စက်တင်ဘာလ ၂၅ ရက်နေ့တွင် ၂ ပတ်အတွင်း ချင်းပြည်နယ်အားလုံး ကို စစ်ရေးအပြတ်ချေမှုန်းမည်ဟု အမိန့်ပေးထားခြင်းကြောင့် စစ်ကောင်စီတပ်ဖွဲ့များက တပ်အင်အား တိုးချဲ့ခြင်းများပြားလာပြီး အောက်တိုဘာလ ၈ ရက်နေ့တွင်လည်း သံချပ်ကား (၂) စီးအပါအဝင် စစ်ကား ၄၀ စီးဝင်ရောက်လာကာ လက်ရှိတွင် ၎င်းသံချပ်ကား ၂ စီးနှင့် စစ်ကား ၅၅ စီးတို့သည် ဖလမ်းမြို့နယ် လုမ်းဘန်ကျေးရွာ အထက်တန်ကျောင်းတွင် တပ်စွဲထားကြောင်းလည်း သိရသည်။
စစ်ကောင်စီမှ တပ်အင်အားအများအပြား ဖြည့်တင်းလာခြင်းမှာ ချင်းလက်နက်ကိုင်အဖွဲ့အစည်းတစ်ခုဖြစ်သည့် ချင်းအမျိုးသားတပ်ဦး (CNF) ၏ စစ်ဌာနချုပ်အား ဝင်ရောက်တိုက်ခိုက်ရန်အတွက် ဖြစ်နိုင်ကြောင်း ချင်းလူ့အခွင့်အရေးအဖွဲ့ (CHRO) Twitter စာမျက်နှာတွင် သုံးသပ်ထားသည်။
