စစ်ကိုင်းတိုင်း ကလေးမြို့နယ် နတ်ချောင်း ပြည်သူ့ကာကွယ်ရေးတပ်ဖွဲ့မှ ဖမ်းဆီးရမိသော မူးယစ်ဆေးဝါး ရောင်းချသူတစ်ဦးနှင့် မူးယစ်ဆေးဝါးသုံးစွဲသူ ၈ ဦးကို ဥပဒေလုပ်ထုံးလုပ်နည်းနှင့်အညီ ဆောင်ရွက်နိုင်ရန် သြဂုတ်လ ၂၄ ရက်နေ့က ၎င်းတို့ထံ လာရောက်လွဲပြောင်းခဲ့သည်ဟု ကလေးမြို့နယ် ပြည်သူ့ရဲတပ်ဖွဲ့က ထုတ်ပြန်သည်။
မူးယစ်ဆေးဝါးရောင်းချသုံးစွဲသူ ၉ ဦးနှင့်အတူ မူးယစ်ဆေးဝါးပင်နီစလင် ၂ လုံး၊ ဆေးထိုးအပ်တစ်ချောင်းနှင့် မူးယစ်ဆေးဝါးရောင်းချရာတွင်အသုံးပြုသော ဆိုင်ကယ် ၃ စီးလည်းပါဝင်ပြီး ကလေးမြို့နယ် တရားရေးအဖွဲ့သို့ တရားစွဲတင်နိုင်ရေး ဆောင်ရွက်ထားသည်ဟု ကလေးမြို့နယ် ပြည်သူ့ရဲတပ်ဖွဲ့က ထုတ်ပြန်သည်။
သြဂုတ်လ ၂၂ ရက်နေ့ကလည်း ကလေးမြို့နယ်ပြည်သူ့ရဲတပ်ဖွဲ့နှင့် CDF-KKG တပ်ရင်း ၃ မှ တပ်ဖွဲ့ဝင်များနှင့်အတူ မူးယစ်ဆေးဝါးရောင်ချသူတစ်ဦးအား ဖမ်းဆီးရမိခဲ့ပြီး ၎င်းထံမှ ကာလတန်းကြေး ကျပ် ၈ သိန်းခန့်ရှိသော ဘိန်းဖြူ ဆပ်ပြာခွက် ၂ ခွက်၊ ကျပ်ငွေ သုံးသောင်းခန့်တန်ဖိုးရှိသော ဘိန်းဖြူပင်နီစလင် ၁ လုံး၊ ဆိုင်ကယ်တစ်စီးနှင့် လက်ကိုင်ဖုန်း ၂ လုံးဖမ်းဆီးရခဲ့သည်ဟု ကလေးမြို့နယ် ပြည်သူရဲတပ်ဖွဲ့ကထုတ်ပြန်သည်။
