ချင်းလူမျိုးနွယ်စုတစ်ခုဖြစ်သည့် ငေါန် မျိုးနွယ်စုများ၏ ရိုးရာကောက်ရိတ်သိမ်းပွဲကို အိန္ဒိယနိုင်ငံ မီဇိုရမ်ပြည်နယ် အိုင်ဇောလ်မြို့တွင် အောက်တိုဘာလ ၆ ရက်နေ့က ရိုးရာအတီးအဆိုအကများဖြင့် ကျင်းပပြုလုပ်ခဲ့ကြသည်ဟု သိရသည်။
ငေါန်ဘာသာစကားဖြင့် Dawng Sawm Puai ဟုခေါ်သော ရိုးရာကောက်ရိတ်သိမ်းပွဲအခမ်းအနားကို Mizoram Ngawn Community ဦးဆောင်မှုဖြင့် အိုင်ဇောလ်မြို့ Mualhoih Picnic Sport နေရာတွင် ကျင်းပပြုလုပ်ခဲ့ကြပြီး ငေါန်ရိုးရာအက များဖြစ်သော လိုင်လင်အက၊ ဘုန်ဝိုင်းအကတို့ ဖြင့် ပျော်ရွှင်စွာကျင်းပခဲ့ကြသည်ဟု သိရသည်။
Mizoram Ngawn Community မှ ဦးဆောင်သူတစ်ဦးက “လူငယ်အပေါင်းတို့ လူမျိုးမခွဲခြားပဲနဲ့ ဆက်လက်ပြီးတော့ ကျွန်တော်တို့ ဒုက္ခရောက်နေတဲ့အချိန်မှာ လူမျိုး၊ စိတ်ဓာတ်၊ စည်းကမ်းနဲ့ ကျွန်တော်တို့ ဆက်လက်ပြီးတော့မှ တစ်စုတည်း ဖြစ်နိုင်အောင် ကြိုးစားခြင်းမှ ဒီပွဲတော်ကို ပြုလုပ်ခြင်းဖြစ်ပါတယ်” ဟု ပြောသည်။
ကောက်ရိတ်သိမ်းပွဲသည် ချင်းဘိုးဘွားများ၏ ဓလေ့ထုံးတမ်းစဉ်လာဖြစ်သော ပြောင်း၊ ကောက်ပဲသီးနှံရိတ်သိမ်းပြီးနောက် ရှေးဘိုးဘွားများက ကောင်းကင်ကြယ်ကိုကြည့်ကာ စက်တင်ဘာလအကုန် အောက်တိုဘာလစမ်း လပြည့်နေ့တွင် ပွဲလမ်း သဘင်ကို ကျင်းပလေ့ရှိကြသည်။
ထိုကောက်ရိတ်သိမ်းပွဲတွင် ဆင်းရဲချမ်းသာ အဆင့်အတန်းခွဲခြားမှုမရှိပဲ တစ်ရွာလုံး စည်းစည်းလုံးလုံးဖြင့် ထိုလပြည့်ညတွင် မီးပုံပွဲ ရိုးရာအတီးအမုတ်များနင့် သီချင်းများသီဆိုကာ ကခုန်လေ့ရှိကြသည်။
ချင်းလူမျိုးများအနေဖြင့် မိမိတို့၏ရိုးရာဓလေ့ဖြစ်သော ဘိုးဘေးတို့၏ ထုံးတမ်းအစဉ်လာများအား ထိန်းသိမ်းကာကွယ်သည့်အနေဖြင့် မိမိတို့ရောက်ရှိသည့်နေရာတိုင်းတွင် ကိုယ့်ရိုးရာပွဲတော်များအား အလေးအမြတ်ထားကျင်းပပြုလုပ်ရန် အရေးကြီးသည်ဟု ငေါန် ရိုးရာကောက်ရိတ်သိမ်းပွဲ စီစဉ်သူက ပြောဆိုပါသည်။
ယမန်နေ့က ကျင်းပပြုလုပ်သော ငေါန်ရိုးရာကောက်ရိတ်သိမ်းပွဲတော်အခမ်းအနားတွင် Guy from Chin မှ Benjamin Sum လည်း ပါဝင်ဖျော်ဖြေခဲ့သည့်အပြင် လူငယ်များကလည်း အားကစားများဆင်နွဲကာ ပျော်ရွှင်စွာညနေစာသုံးဆောင်ကြပြီး နောက် ပွဲတော်အခမ်းအနားကို အောင်မြင်စွာအဆုံးသတ်ခဲ့ကြသည်ဟု သိရသည်။
