(04SS)
စစ်ကိုင်းတိုင်း၊ ကလေးမြို့ကနေ ချင်းပြည်နယ် တီးတန်မြို့နဲ့ ရိခေါဒါရ်မြို့ကို ပြေးဆွဲနေတဲ့ ခရီးသည်တင်ကားတွေ စစ်ကောင်စီတပ်ဖွဲ့က ချင်း-စစ်ကိုင်းနယ်စပ် ကိုးမိုင်စစ်ဆေးဂိတ်ကို ဖြတ်သန်းခွင့်မပြုတာကြောင့် မော်တော်ယာဉ်လိုင်းနဲ့ ခရီးသည်တွေ အခက်ကြုံနေကြရတယ်လို့ သိရပါတယ်။
ကလေးမြို့ကနေ တီးတိန်-ရိခေါ်ဒါရ်မြို့ကိုသွားမယ်ဆိုရင် အိန္ဒိယ-မြန်မာ အမှတ် ၂ နယ်စပ်ကုန်သွယ်ရေးလမ်း ကလေး-ခိုင်ကမ်း-သိုင်းငင်လမ်းကြောင်းအတိုင်းသွားလာရပြီး စစ်ကောင်စီတပ်ရဲ့ ချင်း-စစ်ကိုင်းနယ်စပ် ကိုးမိုင်စစ်ရေးဂိတ်မှာ ဖြတ်သန်းခွင့်မပြုတာကြောင့် တခြားလမ်းကြောင်းကနေ ရှောင်ကွင်းပြီး သွားလာနေရတယ်လို့ ကလေး-ရိလိုင်းပြေးဆွဲနေတဲ့ ဂိတ်မှူးတစ်ဦးက ပြောပါတယ်။
“စစ်သားတွေက ၉ မိုင်ဂိတ်ကို နေ့ခင်းဆို ပိတ်ထားတာပေါ့နော် ဒါပေမဲ့ ညနေပိုင်းဆို သူတို့ဖွင့်တဲ့အချိန်ရှိတယ်လေ။ ဒီနေ့ သွားလို့ရလားမေးပြီးတော့ သူတို့ဂိတ်ဖွင့်ရင် သွားလို့ရတယ် မဖွင့်ရင်တော့ တခြားလမ်းကနေ သွားရတာပေါ့”
ယခုကဲ့သို့ ကိုးမိုင်စစ်ဆေးရေးဂိတ် ဖြတ်သန်းခွင့်မပြုတာကြောင့် ခရီးသည်တင်ကားနဲ့ ကုန်တင်ကားတွေဟာ တခြားလမ်းကြောင်းကနေပတ်ပြီး သွားလာရတာကြောင် ကားခတွေလည်း ယခင်ကထက် ၂ ဆလောက်မြင့်တက်သွားတယ်လို့ သိရပါတယ်။
ယခင်က ကလေး-ရိခေါဒါရ်မြို့ကို လူတစ်ဦးမှာ ယာဉ်စီးခနှုန်း ကျပ် ၃ သောင်းဝန်းကျင်ရှိရာက ယခုအခါ ကျပ် ၈ သောင်းကနေ တစ်သိန်းအထိ မြင့်တက်သွားတယ်လို့ သိရပါတယ်။
ကိုမိုင်စစ်ဆေးဂိတ်မှာ တာဝန်ကျတဲ့ စစ်ကောင်စီတပ်ဖွဲ့တွေကို လာဘ်ထိုးနိုင်ရင် ဖြတ်သန်းသွားလာခွင့်ပြုလေ့ရှိပြီး အဲဒီစစ်ဆေးရဂိတ်ဖြတ်ကို လူစီးကားတစ်ဦးမှာ ကျပ်တစ်သိန်းလောက် ပေးရတယ်လို့ သိရပါတယ်။
ယခုလို ယာဉ်စီးခတွေ အဆမတန် မြင့်တက်ရတာဟာ စစ်ကောင်စီတပ်ဖွဲ့စစ်ဆေးရေးဂိတ်တွေက ငွေကြေးတောင်းခံမှုများတာကြောင့်လို့ ဆိုပါတယ်။
“ဘာကြောင့် ဈေးတက်တာလဲဆိုတော့ ၉ မိုင်ဂိတ်ကနေ စစ်သားတွေက ပိုက်ဆံတောင်းတယ်၊ ပြီးတော့ သိုင်းငင်ဂိတ်ကနေလဲ တောင်းတယ်လေ၊ ကားတစ်စီးကို တစ်သိန်းလောက်ထိ တောင်းတယ်”
အိန္ဒိ-မြန်မာအမှတ် ၂ နယ်စပ်ကုန်သွယ်ရေးလမ်းကြောင်းဖြစ်တဲ့ ကလေး-တီးတိန်-ရိခေါဒါရ်ကားလမ်းမှာ စစ်ကောင်စီတပ်နဲ့ ချင်းကာကွယ်ရေးတပ်ဖွဲ့တွေအကြား တိုက်ပွဲဖြစ်ပွားမှုကြောင့် မကြာခဏဆိုသလို ကားလမ်းပိတ်ထားလေ့ရှိပြီး ဧပြီလ ၁၈ ရက်နေ့ကနေ ၂၅ ရက်နေ့အထိ တိုက်ပွဲကြောင့် ကားလမ်းပိတ်ထားခဲ့တာဖြစ်ပါတယ်။
အဲဒီနောက် ဧပြီလ ၂၆ ရက်နေ့ကစလို့ ကလေး-တီးတိန်-ရိခေါဒါရ်လမ်းကြောင်းကို ပြန်လည်အသုံးပြုလို့ရပြီဆိုပြီး နယ်မြေခံကာကွယ်ရေးတပ်ဖွဲ့ဖြစ်တဲ့ CDM Siyin တပ်ဖွဲ့က ထုတ်ပြန်ခဲ့ပေမယ့် စစ်ကောင်စီဘက်က ကလေးမြို့အထွက် ကိုးမိုင် စစ်ဆေးရေးဂိတ်မှာ ကားတွေကို ဖြတ်သန်းသွားလာခွင့်မပြုသေးတာဖြစ်ပါတယ်။
ကလေးမြို့ကနေ တီးတိန်မြို့ကို ထွက်ခွါမယ့် မော်တော်ယာဉ်လိုင်းတွေကိုတော့ ညနေ ၄ နာရီနောက်ပိုင်းကျမှသာ ကိုးမိုင် စစ်ဆေးရေးဂိတ်ကနေ ဖြတ်သန်းသွားလာခွင့်ပြုတာကြောင့် ၃ နာရီခန့်သာသွားရသော တီးတိန်မြို့ကို တစ်ညအိမ်ပြီးသွားရတယ်လို့ ဒေသခံတစ်ဦးက ဆိုပါတယ်။
“ဘာကြောင့် အဲလိုလုပ်တာလဲဆိုတာတော့ မသိဘူးပေါ့နော်။ ကိုးမိုင်ဂိတ်က ညမှ ထွက်ခွင့်ပြုတာလို့ပြောတယ် ဒီကနေ ညနေမှ ထွက်ရတာဆိုတော့ ဆက်သွားရင် တီးတိန်ကို ညမှရောက်မှာလေ အဲ့တော် ဟိုဘက်ကလဲ ညမထွက်ရအမိန့်ရှိသေးတယ်ဆိုတော့ လမ်းတစ်ဝက်မှာ ညအိပ်ပြီး နောက်နေ့မနက်မှ ဆက်သွားရပါတယ်”
ယခုလက်ရှိ ကလေး-တီးတိန် ယာဉ်စီးခမှာလည်း တစ်ဦးမှာ ကျပ် ၂၅၀၀၀ အထိ မြင့်တင်နေတယ်လို့သိရပါတယ်။
ဓာတ်ပုံ – ယခင်ပုံဟောင်း
