(04SS)
ချင်းပြည်နယ် ဟားခါး-ထန်တလန်ကြား လုံခါရ်တောင်တိုက်ပွဲတွင် ချင်းအမျိုးသားတပ်မတော် (CNA) က ရဲဘော် ၂ ဦး ယနေ့မနက်ပိုင်းတွင် ကျဆုံးခဲ့သည်ဟု သိရသည်။
ယနေ့ဇွန်လ ၁၂ ရက်နံနက် ၄ နာရီခွဲဝန်းကျင်ကစပြီး လုံခါရ်တောင်တွင် စစ်ကောင်စီတပ်ဖွဲ့နှင့် ချင်းကာကွယ် ရေးပူးပေါင်းတပ်ဖွဲ့အကြား တိုက်ပွဲဖြစ်ပွါးခဲ့ရာ ထိုတိုက်ပွဲအတွင်း စစ်ကာင်စီတပ်ဘက်မှ လက်နက်ကြီးများဖြင့် အပြင်းအထန်တိုက်ခိုက်ခဲ့ရာမှာ CNA ရဲဘော် ၂ ဦးဖြစ်သည့် ဆလိုင် ဆန်းဦး ( ဟုန်လေး) နှင့် ဆလိုင်း ထောင်နောဟွေး ( ဆုန်ပီး) တို့ ကျဆုံးခဲ့ခြင်းဟု The Zotung Post က ဖော်ပြသည်။
“CNA မှာ တာဝန်ထမ်းဆောင်နေကြသော ZOTUNG လူငယ် နှစ်ဦးသည် ချင်းပြည်နယ် ဟားခါးနဲ့ ထန်တလန်ကြား Timit တိုက်ပွဲ၌ ဇွန်လ ၁၂ ရက် နံနက်ပိုင်းအချိန်တွင် ကျဆုံးသည်’’ ဟု The Zotung Post က ဖော်ပြသည်။
လွန်ခဲ့သည့် မေလ ၂၆ ရက်နေ့ မှစပြီး ဟားခါး- ထန်တလန်ကြား သီမြစ်လွင်ပြင်အနီးတစ်ဝိုက်နှင့် လုံခါရ် တောင်ဖက်တွင် စစ်ကောင်စီတပ် အင်အား ၁၅၀ ခန့် ဖြင့် စစ်ကြောင်းထိုးလာခဲ့ရာ နေ့စဉ်ရက်ဆက် တိုက်ပွဲဖြစ်ပွါးခဲ့ခြင်းဖြစ်သည်။
တိုက်ပွဲအတွင်း ဟားခါးမြို့ပေါ်ရှိ စစ်ကောင်စီတပ်ဖွဲ့ကလည်း လက်နက်ကြီးများဖြင့် နေ့စဉ်ရက်ဆက် ပစ်ကူခဲ့သည်ဟု သိရသည်။
၃ ပါတ်နီးပါးခန့်ရှိလာပြီဖြစ်သော ယင်းတိုက်ပွဲတွင် စစ်ကောင်စီဘက် အယောက် ၅၀ ဝန်းကျင်ခန့်သေဆုံးခဲ့ပြီး လက်နက်အချို့ကိုလည်း သိမ်းဆည်းရမိခဲ့သည်ဟု ချင်းကာကွယ်ရေးတပ်ဖွဲ့နှင့် နီးစပ်သော သတင်းရင်းမြစ်က ဆိုသည်။
ဟားခါး-ထန်တလန်ကြား သီမြစ်လွင်ပြင်တိုက်ပွဲတွင် ချင်းကာကွယ်ရေးပူးပေါင်းတပ်ဖွဲ့ဖက်ကလည်း ရဲဘော် ၁၇ ဦးကျဆုံးခဲ့ပြီဖြစ်ကြောင်း သိရသည်။
