လူသတ်မှုကျူးလွန်သော မြန်မာစစ်ရှောင်အမျိုးသားတစ်ဦးကို မီဇိုရမ်တရားရုံးက အလုပ်ကြမ်းနှင့် ထောင်ဒဏ်တသက်ချ

(05MK)

မီဇိုရမ်ပြည်နယ် Khawbung ကျေးရွာတွင် စစ်ဘေးရှောင်လာသော အသက် ၃၈ နှစ်အရွယ် Pu Hrang Than Ce ကို လူသတ်မှုကျူးလွန်ကြောင်း ပြစ်မှုထင်ရှားသည့်အတွက် ကျန်ဖိုင်းခရိုင်တရားသူကြီး Sylvie Ralte က အလုပ်ကြမ်းနှင့် ထောင်ဒဏ်တစ်သက် ချလိုက်သည်ဟု သိရသည်။ 

Pu Hrang Than Ce သည် မြန်မာနိုင်ငံတွင် စစ်အာဏာသိမ်းမှုဖြစ်ပွားသည့်နောက်ပိုင်း မီဇိုရမ်ပြည်နယ် Khawbung ကျေးရွာသို့ စစ်ဘေးတိမ်းရှောင်လာသူဖြစ်ပြီး ၂၀၂၂ ခုနှစ်တုန်းက အကြွေးရှင် Pu Ngo Khan Do ဆိုသူကို သတ်ဖြတ်ခဲ့ခြင်းဖြစ်သည်ဟု မီဇိုရမ်သတင်းဌာနများတွင် ဖော်ြပသည်။ 

တီးတိန်မြို့နယ် လမ်ဇန်ကျေးရွာသား Pu Ngo Khan Do သည် လျှပ်စစ်ပစ္စည်းများကို မီဇိုရမ်ပြည်နယ်ဘက်သို့ နယ်လှည့် ရောင်းချနေသူဖြစ်ကာ ၎င်း၏ စက်လွှ (Chain Saw) ရူပီး ၃၅၀၀၀ တန်ကို Pu Hrang Than Ce က ရူပီး နှစ်သောင်းရှင်းကာ တစ်သောင်းခွဲ အကြွေးချန်ခဲ့သည်ဟု သိရသည်။ 

ထိုအကြွေးကို ၂၀၂၂ ခုနှစ် ဩဂုတ်လ ၁၃ ရက်နေ့တွင် သွားတောင်းသည့်အချိန်တွင် Pu Ngo Khan Do ကို Pu Hrang Than Ce က တူဖြင့် အချက်ပေါင်းများစွာထုပြီးနောက် သတ်ဖြတ်ကာ အလောင်းကိုလည်း ဖျောက်ခဲ့သည်ဟု သိရသည်။

ယင်းဖြစ်စဉ်နှင့်ပတ်သက်၍ ကျန်ဖိုင်းခရိုင်တရားရုံးက ဇူလိုင် ၂၇ ရက်နေ့က အမှုကြားနာစစ်ဆေးရာတွင် Pu Hrang Than Ce ကို တရားသူကြီး Sylvie Ralte က အလုပ်ကြမ်းနှင့်ထောင်ဒဏ်တသက် နှင့် ဒဏ်ငွေ ရူပီး ၁၅၀၀၀ အမိန့်ချခဲ့ခြင်းဖြစ် သည်။ 

Pu Hrang Than Ce သည် ချင်းပြည်နယ် ဖလမ်းမြို့နယ် Hnahthial ကျေးရွာကဟု သိရသည်။