တိုက်ပွဲပြင်းထန်နေသည့် ကလေးတောင်ပိုင်းမှာ နှစ်ဖက်ထိခိုက်သေဆုံးမှုရှိ၊ လက်နက်ကြီးကြောင့် အရပ်သား ၅ ဦးသေဆုံး

(006SV)

ကလေးမြို့နယ်တောင်ပိုင်းတွင် စစ်ကောင်စီတပ်နှင့် CDF အပါအဝင် ဒေသကာကွယ်ရေးပူးပေါင်းတပ်တို့ဖြင့် ၂ ရက်ဆက် တိုက်ပွဲပြင်းထန်နေရာ နှစ်ဖက်ထိခိုက်ကျဆုံးမှု များပြားပြီး စစ်ကောင်စီ လက်နက်ကြီးကြောင့် ဒေသခံအရပ်သား ၅ သေဆုံးသည်ဟု သိရသည်။

ယမန်နေ့ စက်တင်ဘာလ ၂၆ ရက် မနက် ၈ နာရီက စစ်ကိုင်းတိုင်း၊ ကလေးမြို့နယ်တောင်ပိုင်းရှိ အောင်သာယာရွာသို့ စစ်ကောင်စီ နှင့်ပျူစောထီး ပူးပေါင်းတပ်တို့ အင်အား ၁၀၀ ကျော်ဖြင့် ထိုးစစ်ဆင်လာရာ ဒေသတော်လှန်ရေးပူးပေါင်းတပ်များဖြင့် မိနစ် ၃၀ ကြာ တိုက်ပွဲဖြစ်ပွားခဲ့သည်ဟု ချင်းကာကွယ်ရေးတပ် – KKG က ယနေ့ ထုတ်ပြန်သည်။

တိုက်ပွဲတွင် စစ်ကောင်စီက လက်နက်ကြီးပစ်ကူ အများအပြားသုံး၍ သာလွန်အင်အားဖြင့် ထိုးစစ်ဆင်လာမှုကို ကာကွယ်ရေးပူးပေါင်းတပ်တို့က ခုခံတိုက်ခိုက်ရာ စစ်ကောင်စီမှ ၂ ဦးသေဆုံးပြီး CDF-KKG မှ ရဲဘော်တစ်ဦး၊ ကလေး (ပကဖ) မှ ရဲဘော်တစ်ဦး ကျဆုံးခဲ့ရသည်ဟု သိရသည်။

နေ့လည် ၁ နာရီခန့်တွင်လည်း အောင်သာယာအရှေ့ရပ်ကွက်တွင် စခန်းချနေသည့် စစ်ကောင်စီပူးပေါင်းတပ်ကို CDF-KKG နှင့် ကလေးခရိုင်တပ်ရင်း (၄) တို့ ပူးပေါင်းတိုက်ခိုက်ခဲ့ရာ စစ်ကောင်စီမှ ထိခိုက်မှုရှိနိုင်ပြီး ချင်းပူးပေါင်းတပ်မှ ရဲဘော် (၂) ဦး မစိုးရိမ်ရ ဒဏ်ရာများ ရရှိခဲ့သည်ဟု CDF- KKG က ဆိုသည်။

ယနေ့ စက်တင်ဘာလ ၂၇ ရက်တွင် အောင်သာယာမှ မှန်တောသို့ စစ်ကြောင်းထိုးလာသည့် စစ်ကောင်စီပူးပေါင်းတပ်နှင့် ဒေသ ကာကွယ်ရေးပူးပေါင်းတပ်တို့ မှန်တောရွာအနီးတွင် တိုက်ပွဲဖြစ်ပွားခဲ့ရာ စစ်ကောင်စီမှ အထိခိုက်များနိုင်ပြီး ချင်းပူးပေါင်းတပ်ဖွဲ့မှ ရဲဘော်တစ်ဦး မစိုးရိမ်ရဒဏ်ရာများ ရရှိခဲ့သည်ဟု KKG က ဆိုသည်။

စစ်ကောင်စီသည် တိုက်ပွဲဖြစ်ပွားသည့် အနီးဝန်းကျင်ရှိ အရပ်သားနေအိမ်များကို မီးရှို့ဖျက်စီးပြီး လက်နက်ကြီးများဖြင့် ပစ်ခတ်မှုကြောင့် ရှားဖိုရွာမှအရပ်သား (၄) ဦး ထိမှန်သေဆုံးကာ သေဆုံးမှုများကို မြင်တွေ့ရသည့် မိခင်တစ်ဦးမှာလည်း ထိန်လန့်၍ ထပ်မံသေဆုံးခဲ့ရသည်ဟု CDF- KKG က ပြောသည်။

ယနေ့တိုက်ပွဲတွင် စစ်ကောင်စီပူးပေါင်းတပ်ကို ဒေသကာကွယ်ရေးပူးပေါင်းတပ်ဖြစ်သည့် CDF-KKG၊ ကလေးခရိုင်အမှတ် (၄) တပ်ရင်း၊ ကလေးမြို့နယ် ပကဖ၊ CNDF (Thai Pau) တို့က တိုက်ခိုက်ခဲ့ခြင်းဖြစ်သည်။

ကလေးမြို့နယ်တောင်ပိုင်းတွေ နှစ်ဖက်တိုက်ပွဲများ အပြင်အထန် ဖြစ်ပွားနေသည့်အတွက် ဖုန်းလိုင်းများလည်း ဖြတ်တောက်ခံ ထားရသည်ဟု သိရသည်။