(002MG)
ချင်းပြည်နယ်တောင်ပိုင်း၊ မင်းတပ်မြို့ပေါ်မှာ လူနေထိုင်ခြင်းမရှိသည့် နေအိမ်များကို စစ်ကောင်စီတပ်က အကြိမ်ကြိမ်မီးရှိုမှုကြောင့် လူနေအိမ် ၇၀ ကျော်အထိ မီးလောင်ပျက်စီးမှုရှိလာသည်ဟု သိရသည်။
မင်းတပ်မြို့ပေါ် အနောက်ရပ်ကွက်၊ မင်းတပ်-မတူပီလမ်းမကြီး တလျှောက်က နေအိမ်အများဆုံး မီးရှိုခံရပြီး နေအိမ် (၅၀) ကျော် မီးလောင်ပျက်စီးကြောင်း မင်းတပ်မြို့ခံတစ်ဦးက ပြောသည်။
“တပ်ကပြောတယ် လူမနေတဲ့အိမ်တွေကို မီးရှို့မယ် ကိုယ့်အိမ်ကို လာနေကြတော့လို့ အရင်ကတည်းက ပြောတယ်၊ သူတို့က (၃-၄) ရက်တကြိမ်ကင်းလှည့်တာ လူမရှိတဲ့အိမ်၊ လူရှိတဲ့အိမ် ဘယ်အိမ် အကုန်လုံးမှတ်ထားတာကိုး တမြို့လုံးမှာ မီးလောင်တာ (၆၀) ကျော်သွားပြီ၊ မီးအလောင်ဆုံးက အနောက်ရပ်ကွက်က (၅၀) ကျော်တယ်။ အိမ်တွေဆိုရင် တိုင်တွေတောင် မကျန်တော့ဘူး၊ အကုန်ကျွမ်းသွားတာ” ဟု မင်းတပ်မြို့ခံကပြောသည်။
မင်းတပ်မြို့ပေါ်တွင်အခြေစိုက်သည့် စစ်ကောင်စီတပ်ဖွဲ့သည် မင်းတပ်မြို့ပေါ်ရှိ နေအိမ်များကို ဩဂုတ်လ ၂၂ ရက်န့မှ အောက်တိုဘာလ ၅ ရက်နေ့အထိအနည်းဆုံး ၁၀ ကြိမ်ခန့် မီးရှို့ခဲ့သည်ဟု သိရသည်။
အောက်တိုဘာလ (၅) ရက်နေ့ကလည်း CDF-မင်းတပ်နှင့် စစ်ကောင်စီတပ်တို့အကြား ပစ်ခတ်မူဖြစ်ပွားခဲ့ပြီးနောက် စစ်ကောင်စီသည် ပြည်သူနေအိမ်များကို ထပ်မံမီးရှို့ခဲ့သည်ဟု သိရသည်။
စစ်ကောင်စီ၏ မီးရှို့မှုကြောင့် မင်းတပ်မြို့အနောက်ရပ်ကွက်တွင် နေအိမ် ၅၀ ကျော်၊ စံပြရပ်ကွက်တွင် နေအိမ် ၉ လုံး၊ အရှေ့ပြင်ရပ်ကွက်တွင် နေအိမ် ၁၃ လုံးတို့ မီးလောင်ပြာကျခဲ့ပြီးဖြစ်ကြောင်း သိရသည်။
