(005MK)
ဗဟိုမီးဇိုးလူငယ်အသင်း (Central YMA) လက်အောက်တွင် ဖွဲ့စည်းထားသော မူးယစ်ဆေးဝါး တားဆီးနှိမ်နင်းရေးအဖွဲ့ (CADS) က မြန်မာနိုင်ငံမှ သယ်ဆောင်လာသော ရူပီးငွေ သိန်း ၁၀၀ ကျော်တန်ဖိုးရှိ ဘိန်းဖြူများကို ဧပြီလ ၂၄ ရက်နေ့က ဖမ်းဆီးရမိခဲ့သည်။
အိန္ဒိယ-မြန်မာနယ်စပ်ကတဆင့် ကားနှစ်စီးဖြင့်သယ်ဆောင်ကြလာကြသော အလေးချိန် ၄ ကေဂျီ ၈၂၁ ဂရမ်(ဆပ်ပြာဗူး ၄၀၀) ရှိသော ဘိန်းဖြူများကို Saitual မြို့မှာ ဖမ်းဆီးရမိခဲ့ခြင်းဖြစ်သည်။
မူးယစ်ဆေးဝါး တားဆီးနှိမ်နင်းရေးအဖွဲ့ (CADS) အနေဖြင့် ကာလအတော်ကြာစောင့်ကြည့်ခဲ့ပြီးနောက် အဆိုပါဘိန်း ဖြူများကို ဖမ်းဆီးရမိခြင်းဖြစ်သည်။
မီဇိုရမ်ပြည်နယ် Farkawn ကျေးရွာသား လက်ရှိ Ramhlun North ရပ်ကွက်တွင်နေထိုင်သူ အသက် ၂၈ နှစ်အရွယ် Thangsangpuia မောင်းနှင်းလာသော ကားတွင် ဘိန်းဖြူ ဆပ်ပြာဗူး ၂၀၀ ဖမ်းဆီးခဲ့ပြီး Farkawn ရွာသား ချင်းပြည်နယ် Khawmawi တွင်နေထိုင်သူ အသက် ၂၉ နှစ်အရွယ် Malsawmdawnga မောင်းနှင်လာသော ကားတွင် ဘိန်းဖြူ ဆပ်ပြာဗူး ၂၀၀ စုစုပေါင်း ဘိန်းဖြူ ဆပ်ပြာဗူး ၄၀၀ ကို ဖမ်းဆီးရမိခြင်းဖြစ်သည်။
အဖမ်းခံရသူ ၂ ဦး၏ ထွက်ဆိုချက်အရ မီဇိုရမ်ပြည်နယ် ဇိုခေါထာရ် နှင့် ချင်းပြည်နယ် ရိခေါဒါရ်မြို့ အမှတ် (၂) ရပ်ကွက် (Khawmawi) ကျေးရွာတို့တွင် ကြင်လည်ကျက်စားနေထိုင်သူ ကျန်ဖိုင်းခရိုင် Ngur ကျေးရွာသား Lalhmingmawia ဆိုသူက တစ်ယောက်ကိုရူပီးငွေ ၈ သောင်းပေးကာ မီဇိုရမ် နှင့် အာသံပြည်နယ်စပ် Vairengte မြို့အထိ ပို့ဆောင်းခိုင်းခြင်း ဖြစ်ကြောင်း Vanglaini သတင်းစာတွင် ဖော်ပြသည်။
၎င်းတို့အနေဖြင့် ယခုကဲ့သို့ အခကြေးငွေဖြင့် ဘိန်းဖြူများ ပို့ဆောင်ပေးနေသည်မှာ ယခုတကြိမ်နှင့်ဆိုလျှင် သုံးကြိမ်ရှိပြီ ဖြစ်ကြောင်း၊ ပထမအကြိမ်တွင် ဘိန်းဖြူ ဆပ်ပြာဗူး ၁၀၀ စီ နဲ့ ဒုတိယအကြိမ်တွင် ၂၀၀ စီ သယ်ဆောင်ခဲ့ကြသည်ဟု သိရသည်။
Lalhmingmawia သည် မူးယစ်ကုသည်တစ်ဦးဖြစ်ပြီး မူးယစ်ဆေးဝါးသယ်ဆောင်ရာတွင် အသုံးပြုသော ၎င်း၏ယာဉ် နံပါတ်ကိုလည်း သိရှိထားသည့်အတွက် ယခုကဲ့သို့ ဖမ်းဆီးနိုင်ခဲ့သော်လည်း အဓိကတရားခံဖြစ်သော Lalhmingmawia မှာ မြန်မာဘက်ခြမ်းသို့တိမ်းရှောင်သွားသောကြောင့် ဖမ်းဆီးနိုင်ခြင်းမရှိခဲ့ကြောင်း CADS တာဝန်ရှိသူများကပြောသည်။
