(006SV)
မြန်မာပါအဝင် နိုင်ငံပေါင်း ၁၂ နိုင်ငံကို အမေရိကန်နိုင်ငံသို့ ခရီးသွားလာ ဝင်ရောက်ခွင့် ပြည်ဝင်ခွင့် တားမြစ်ကန့် သတ်လိုက်ကြောင်း အမေရိကန်သမ္မတ ဒေါ်နယ်ထရမ့်က ဇွန်လ ၄ ရက်မှာ လက်မှတ်ရေးထိုးထုတ်ပြန်လိုက်သည်။
အမေရိကန်နိုင်ငံ၏ အမျိုးသားလုံခြုံရေးနှင့် ပြည်သူ့လုံခြုံရေးအန္တရာယ်များမှ ကာကွယ်ရန်အတွက် မြန်မာ အပါအဝင် အာဖဂန်နစ္စတန်၊ ချက်၊ ကွန်ဂို၊ အီကွေတာတို့ရား ဂီနီ၊ အီရီတရီးယား၊ ဟေတီ၊ အီရန်၊ လစ်ဗျား၊ ဆိုမာလီယား၊ ဆူဒန် နှင့် ယီမင်နိုင်ငံများကို အမေရိကန်က ပြည်ဝင်ခွင့် လုံးဝပိတ်လိုက်ခြင်းဖြစ်သည်။
မြန်မာနိုင်ငံအနေဖြင့် အမေရိကန်သို့ ပြည်ဝင်ခွင့် ပိတ်ပင်ခံရမှုမှာ အမေရိကန်နိုင်ငံမှာ မြန်မာနိုင်ငံသားများ ဗီဇာသက်တမ်းကျော် လွန်နေထိုင်မှု များပြားမှုကြောင်းဖြစ်ကြောင်း၊ B1/ B2 ဗီဇာ သက်တမ်းလွန်နေထိုင်မှု ၂၇.၀၇ ရာခိုင်နှုန်း၊ F၊ M နှင့် J ဗီဇာသက် တမ်း လွန်နေထိုင်မှု ၄၂. ၁၇ ရာခိုင်နှုန်း ရှိကြောင်း ၊ အမေရိကန်က နိုင်ငံသား ပယ်ဖျက်ခံရသော လူများကို ပြန်လည်လက်ခံရန် ပူးပေါင်းခြင်း မရှိခြင်းကြောင့်ဖြစ်ကြောင်း အမေရိကန် သမ္မတရုံးက ထုတ်ပြန်ထားသည်။
အမေရိကန်အစိုးရ၏ ယခုလို ပြည်ဝင်ခွင့် ပိတ်ပင်မှုသည် စစ်အာဏာရှင်တော်လှန်ရေးကို လှုပ်ရှားဆောင်ရွက်နေသော တော်လှန်ရေးအင်အားစုအေပေါ်လည်း သက်ရောက်မှု ရှိကြောင်း မလေးရှားနိုင်ငံ ချင်းဒုက္ခသည်အရေး ဆောင်ရွက်နေသော အဖွဲ့ဖြစ်သည့် Alliance of Chin Refugees ဥက္ကဌ James Bawi Thang Bik က ပြောသည်။
“နိုင်ငံရေးအတွက် လှုပ်ရှားတဲ့ လူတွေအတွက်က တချို့အတွက် အဝင်၊ အထွက်က ခက်သွားမယ်လို့ မြင်တယ်။ မြန်မာတွေ ဘာတွေ ထိခိုက်သွားမလဲဆိုတော့ ဒီတော်လှန်ရေးမှာက ကိုယ့်အားကိုပဲ ပြန်ကိုးရမယ်အခြေအနေ ဖြစ်သွားနိုင်တယ်ပေါ့နော်။ နိုင်ငံရေးအရှုပ်အထွေးမှာက စိန်ခေါ်မှုက တော်တော်များလိမ့်မယ်။ ဒီတော်လှန်ရေး တော်တော်များကလည်း ပြည်ပကိုပဲ အားကိုးပြီး လှုပ်ရှားရတာ များတယ်ဆိုတော့ ဒီမှာ တော်တော်လေ ထိခိုက်တယ်။ နောက်တခုက အဝင်ပဲ ပိတ်တာဆိုတော့ လူသားချင်းစာနာမှုဆိုင်ရာ အထွက်တွေက ဘယ်လောက်ထိခိုက်မလဲဆိုတာ မသိသေးဘူး” ဟု James Bawi Thang Bik က ပြောသည်။
လာအို၊ ဗင်နီဇွဲလား၊ ကျူးဘား၊ ဘူရွန်ဒီ အပါအဝင် နိုင်ငံပေါင်း ၇ နိုင်ငံကတော့ အမေရိကန်ပြည်ဝင်ခွင့် တစိတ်တပိုင်းအပိတ်ခံရ သည်ဟု သိရသည်။
