(006SV)
ပဲခူးတိုင်း၊ မင်းလှမြို့နယ်အတွင်း စစ်ကောင်စီ စစ်ကြောင်းများကို ပြည်သူကာကွယ်ရေးတပ်ဖွဲ့ PDF များနှင့်အတူ ACDF ပူးပေါင်းတိုက်ခိုက်နေရာ စစ်ကောင်စီမှ ဒုတိယဗိုလ်မှူးကြီး၊ ဗိုလ်မှူးနှင့် ရဲမှူးအပါအဝင် တပ်သားအများအပြား သေဆုံးကြောင်း ပဲခူးတိုင်းစစ်ဌာန၊ ဗျူဟာ (၂၂) တပ်ဖွဲ့ထံမှ သိရသည်။
ဇွန်လ ၁၆ ရက် ညနေ ၄ နာရီ မီနစ် ၂၀ ခန့်တွင် ပဲခူးတိုင်း၊ မင်းလှမြို့နယ်၊ ဆင်အိုင်ချောင်းပေါက်ကျေးရွာကို အင်အား ၆၀ ခန့်ဖြင့် စစ်ကြောင်းထိုးလာသော ခလရ – ၁ နှင့် ပျူစောထီးပါတို့၏ စစ်ကောင်စီတပ်ဖွဲ့ကို စောင့်ကြိုတိုက်ခိုက်ရာ ၄၅ မီနစ်ခန့်ကြာ တိုက်ပွဲဖြစ်ခဲ့သည်ဟု သာယာဝတီခရိုင် အမှတ် (၃) တပ်ရင်းက ဇွန်လ ၁၇ ရက် ထုတ်ပြန်သည်။
တိုက်ပွဲတွင် စစ်ကောင်စီက အထိနာ၍ ပြန်ဆုတ်သွားခဲ့ပြီး တော်လှန်ရေးပူးပေါင်းတပ်က အထိအခိုက်မရှိ ပြန်လည်ဆုတ်ခွာနိုင်ခဲ့သည်ဟု သိရသည်။
ယင်းတိုက်ပွဲတွင် တောင်ပိုင်းတိုင်းစစ်ဒေသ၊ ပဲခူးတိုင်းစစ်ဌာန၊ ဗျူဟာ (၂၂) လက်အောက်ခံ PDF တပ်ရင်းများဖြစ်သည့် သာယာဝတီခရိုင် အမှတ်(၃)တပ်ရင်း၊ သာယာဝတီခရိုင် အမှတ် (၁) တပ်ရင်း၏ တပ်ခွဲ (၆)/ဧရာညီနောင်PDF ၊ MDF (Special Force) နှင့် Asho Chin Defense Force (ACDF) တပ်ဖွဲ့ ပါဝင်တိုက်ခိုက်သည်ဟု သိရသည်။
ဇွန်လ ၁၆ ရက် ညနေ ၅ နာရီခန့်တွင်လည်း ရန်ကုန်- ပြည်လမ်းပိုင်း၊ မင်းလှမြို့နယ်အနီးရှိ စစ်ကွင်းတာဆုံ ရဲကင်းစခန်းကို တော်လှန်ရေးမဟာမိတ်ပူးပေါင်းတပ်ဖွဲ့က ဝင်ရောက်တိုက်ခိုက်ရာ စစ်ကောင်စီမှ ၅ ဦးသေဆုံးပြီး ထိခိုက်ဒဏ်ရာရရှိသူများရှိသည်ဟု သိရသည်။
ယင်းတိုက်ပွဲအတွင်း ဆင်အိုင်ချောင်းပေါက်မှ တဆင့် စစ်ကူလာသော အင်အား ၂၅ ဦးခန့် ရှိသော စစ်ကောင်စီ၏ ဖောကား ၁ စီးကိုလည်း ရှမ်းတောကျေးရွာအနီးတွင် မဟာမိတ်ပူးပေါင်းတပ်ဖွဲ့က ပိတ်ဆို့တိုက်ခိုက်ရာ ကား ၁ စီးလုံး ပျက်စီးသွားပြီး စစ်ကောင်စီတပ်ဖွဲ့ဝင် ၁၅ ဦးခန့် ထိခိုက်ဒဏ်ရာများရရှိသည်ဟု သိရသည်။
တိုက်ပွဲဖြစ်ပွားနေချိန်တွင် ပြည်မှ ရန်ကုန်သို့ မောင်းနှင်လာသော အိမ်စီးကား ၁ စီးသည် တော်လှန်ရေး ပူးပေါင်းတပ်ဖွဲ့က တားဆီးနေသည်ကို သတိမမူဘဲ ဆက်လက်မောင်းနှင်းသွားရာ စစ်ကောင်စီမှ ပစ်ခတ်ခံရ၍ ၃ ဦးသေဆုံးပြီး ၄ ဦး ထိခိုက်ဒဏ်ရာများ ရရှိခဲ့သည်ဟု ထုတ်ပြန်ချက်တွင် ဖော်ပြထားသည်။
ဇွန်လ ၁၇ ရက်က ဖားလေးကွင်းကျေးရွာအနီးတွင် တိုက်ပွဲများ ဆက်လက်ဖြစ်ပွားခဲ့ရာ ခရိုင်ရဲမှူး ၁ ဦး၊ မြို့မရဲစခန်းမှူး ၁ ဦး၊ ဗိုလ်မှူးအဆင့် ၁ ဦးအပါအဝင် စစ်ကောင်စီတပ်ဖွဲ့ဝင် ၂၀ ဦးသေဆုံးသည်ဟု သာယာဝတီခရိုင်အမှတ် ၃ တပ်ရင်းက ထုတ်ပြန်သည်။
ယင်းဖြစ်ပွားသည့် တိုက်ပွဲ (၃) နေရာတွင် သာယာဝတီခရိုင် စီမံအုပ်ချုပ်ရေးအဖွဲ့ဝင်၊ ဒုတိယဗိုလ်မှူးကြီး ဇော်မျိုးဝင်းနှင့် အုတ်ဖိုမြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူးတို့လည်း သေဆုံးကြောင်း ပြည်သူနှင့် စစ်ဘက်အရင်းအမြစ်၊ ဆေးဘက်အရင်းအမြစ်များထံမှ သိရကြောင်း၊ သို့သော် ထပ်မံအတည်ပြုနိုင်ရန် ဆောင်ရွက်နေဆဲဖြစ်ကြောင်း ယင်းတပ်ရင်း ၃ က ဆိုသည်။
မဟာမိတ်ပူးပေါင်းတပ်မှ ရဲဘော် ၂ ဦးသည်လည်း တိုက်ပွဲကာလအတွင်း မစိုးရိမ်ရ ဒဏ်ရာများ ရရှိခဲ့သည်ဟု သိရသည်။
တိုက်ပွဲအတွင်း ဖားလေးကွင်းကျေးရွာ၊ မြောက်စုရှိ ပြည်သူနေအိမ်ပေါ် ကျရောက်ပေါက်ကွဲသဖြင့် အသက် ၈၀ အရွယ် ဒေါ်တင်ရီ သေဆုံးပြီး အမျိုးသမီး ၁ ဦးလည်း ပြင်းထန်ထိခိုက်ဒဏ်ရာများ ရရှိခဲ့သည်ဟု သိရသည်။
ယင်းစစ်ဆင်ရေးကို ပဲခူးတိုင်းစစ်ဌာန၊ ဗျူဟာ (၂၂) လက်အောက်ခံ တပ်ရင်းများဖြစ်သော သာယာဝတီခရိုင် အမှတ်(၃)တပ်ရင်း၊ သာယာဝတီခရိုင် အမှတ် (၁) တပ်ရင်း၏ တပ်ခွဲ (၆)/ ဧရာညီနောင် PDF ၊ MDF (Special Force) နှင့် Asho Chin Defense Force (ACDF) မဟာမိတ် ပူးပေါင်းတပ်မှ ဆောင်ရွက်ခြင်းဖြစ်သည်ဟု သိရသည်။
သာယာဝတီခရိုင်အတွင်းရှိ ပြည်သူများအနေဖြင့် တပ်၊ ရဲစခန်း၊ ထွေအုပ်ရုံး၊ ရဲကင်းစခန်း၊ လမ်းပိုင်းကင်းစခန်းများအနီး ဈေးရောင်းခြင်း၊ နေထိုင်ခြင်း၊ အချိန်ကြာမြင့်စွာရပ်တန့် စကားပြောခြင်းများ မပြုလုပ်ရန် သတိပေးနှိုးဆော်ထားသည်။
