(002MG)
စစ်ကိုင်းတိုင်း၊ ကလေးခရိုင်၊ ကလေးမြို့နယ်၊ နန်းစောင်းပုရွာသစ်သို့ ထိုးစစ်ဆင်လာသည့် စစ်ကော်မရှင်တပ်ဖွဲ့ကို ပြည်သူ့ကာကွယ်ရေးပူးပေါင်းတပ်ဖွဲ့က စက်တင်ဘာလ (၂) ရက်နေ့က တိုက်ခိုက်ခဲ့ရာမှာ စစ်ကော်မရှင်တပ်သား (၄) ဦးသေဆုံးခဲ့ကာ အိန္ဒိယနိုင်ငံသား ကသည်းသူပုန်အပါဝင် (၇) ဦးဖမ်းဆီးရမိကြောင်း အမှတ် (၁) စစ်ဒေသက ယနေ့ စက်တင်ဘာလ (၁၁) ရက်မှာ သတင်းထုတ်ပြန်သည်။
ကလေးမြို့ ဒေသကွက်ကဲရေးစစ်ဌာနချုပ်- ဒကစ လက်အောက်ခံ တတက-၁၀ မှ ဗိုလ်မှူး ရဲမျိုးမင်းနှင့် ဗိုလ်ကြီး ပြည့်ဖြိုးအောင်၊ ဗိုလ်ကြီး နိုင်းဝင်းစိုးတို့ ဦးစီးသည့် ခမရ (၃၆၁၊ ၃၆၂၊ ၃၆၃)၊ ဆသရ-၆၊ ခလရ (၈၇၊ ၂၂၉)၊ SNA၊ အိန္ဒိယနိုင်ငံသားများဖြစ်သည့် ကသည်း (ULFA)နှင့် နာဂ (NSCN) တပ်ဖွဲ့ အင်အား (၁၃၀) ခန့် ထိုးစစ်ဆင်လာခဲ့ ခြင်းဖြစ်သည်။
ယင်းတိုက်ပွဲအတွင်း စစ်ကော်မရှင်သည် ကလေးခရိုင်အတွင်း အိန္ဒိယနိုင်ငံ သားများဖြစ်သည့် ကသည်း (ULFA)နှင့် နာဂ (NSCN) တပ်ဖွဲ့များအား ယခုနှစ် ဩဂုတ်လမှ စတင်အသုံးပြုခဲ့ခြင်းဖြစ်ကာ ၎င်း အဖွဲ့များသည် ဩဂုတ်လအတွင်း ချင်းတွင်းမြစ်ကြောင်းအတိုင်း ခန္တီးခရိုင်အတွင်းမှ စုန်ဆင်းလာသော သင်္ဘောများဖြင့် ပါလာခဲ့ခြင်းဖြစ်ကြောင်း အမှတ် (၁) စစ်ဒေသက ဖော်ပြထားသည်။
တိုက်ပွဲတွင် MA-1 (၃) လက်၊ MA-3 (၁) လက်၊ MA-11 (၁) လက်၊ 7.62 ကျည် (၂၇၇) တောင့်၊ 5.56 ကျည် (၈၉) တောင့်၊ RPG ဗုံးသီး (၁) လုံး၊ RPG ပို့ယမ်း (၃) ခု၊ နင်းမိုင်း (၁၂) ခု၊ မိုင်းရှင်းစက် (၁) ခု၊ ကျည်အိမ်မျိုးစုံ (၁၉) ခုနှင့် မူးယစ်ဆေး အမျိုးအစား (၃) မျိုး သိမ်းဆည်းရမိသည်။
အဆိုပါ စစ်ကော်မရှင်စစ်ကြောင်းအား ကလေးခရိုင် ကွပ်ကဲရေးမှူး ဦးစီးသည့် ကလေးခရိုင် အမှတ် (၁၊ ၃၊ ၄) တပ်ရင်း၊ အထူးလှုပ်ရှား (၅၊ ၆) တပ်ရင်း၊ ကလေးမြို့နယ် ပကဖ၊ ကလေးဝမြို့နယ် ပကဖ၊ မင်းကင်းမြို့နယ် ပကဖ၊ ကလေးခရိုင် အထူးစစ်ကြောင်း၊ ကလေးမြို့နယ် ပြည်သူ့လုံခြုံရေးတပ်ဖွဲ့ (ပလဖ) နှင့် Zoland PDF ပူးပေါင်းအဖွဲ့တို့မှ တန်ပြန် ထိုးစစ်ဆင်တိုက်ခိုက်ခဲ့ကြခြင်းဖြစ်သည်။
နန်းစောင်းပုရွာသစ်တိုက်ပွဲအတွင်း စစ်ကော်မရှင်သည် လက်နက်ကြီးများဖြင့် ပစ်ခတ်ခြင်း၊ ဒရုန်းများ ဖြင့် ဗုံးချတိုက်ခိုက် ခြင်းများအား နေ့စဉ်ပြုလုပ်ခဲ့ပြီး လေကြောင်းတိုက်ခိုက်မှုလည်း ပြုလုပ်ခဲ့ကြောင်း သိရသည်။
ပြီးခဲ့သည့် ဩဂုတ် (၆) ရက်နေ့မှစတင်ကာ စစ်ကော်မရှင်သည် ထိုးစစ်ဆင်တိုက်ခိုက်လာခြင်းဖြစ်ပြီး ဩဂုတ်လ (၁၅) ရက်တွင်လည်း စစ်ကော်မရှင်တပ်သားအလောင်း (၃) လောင်းရရှိခဲ့ပြီး သုံ့ပန်း (၁) ဦး ဖမ်းဆီးရမိခဲ့သည့်အပြင် လက်နက်မျိုးစုံ (၁၀) လက်သိမ်းဆည်းရမိခဲ့သည်။
