(006SV)
ချင်းပြည်နယ်၊ တီးတိန်မြို့နယ်၊ ဇောင်ကောင်ရွာတွင် ယာယီတပ်စွဲထားသော ချင်းတော်လှန်ရေးတပ်ဖွဲ့သည် ဖလမ်းသို့ စစ်ကြောင်းထိုးလာသော စစ်ကော်မရှင်တပ်၏ စီးနင်းတိုက်ခိုက်ခံရမှုကြောင့် ချင်းတော်လှန်ရေး ရဲဘော် ၄ ဦး ကျဆုံးရသည်ဟု သိရသည်။
နိုဝင်ဘာလ ၂၆ ရက် မနက် ၃ နာရီခန့်တွင် သိုင်းငင်းရွာမှ ဆုတ်ခွာထားရသော CDF – CDM Siyin တပ်ဖွဲ့သည် ဇောင်ကောင်ရွာဝန်းကျင်တွင် နေရာယူထားစဉ် စစ်ကော်မရှင်တပ်က အင်အားအလုံးအရင်းဖြင့် ဝိုင်းပြီး စီးနင်းတိုက်ခိုက်ခြင်းဖြစ်သည်ဟု CDF – CDM Siyin တပ်ဖွဲ့မှ ပြောရေးဆိုခွင့်ရှိသူ ဆလိုင်း ဒီကီက ပြောသည်။
“၂၆ ရက်နေ့ နံနက် ၃ နာရီလောက်မှာ အလုံးခံရတဲ့ တိုက်ပွဲမှာပါ။ သူတို့က အင်အားအလုံးအရင်းနဲ့ ဇောင်ကောင်ကို ဝိုင်းလာပြီး ပစ်ကြတာပါ။ အဲဒီနေရာမှာ ကျနော်တို့ ရဲဘော် ၄ ယောက်က ပါသွားပါတယ်။ တီးတိန်ကနေ ထွက်လာတဲ့ စစ်ကြောင်းက သိုင်းငင်း ရောက်တဲ့အခါမှာ ကလေးကနေ တက်လာတဲ့ မွာလ်ပီးမှာ သောင်တင်နေတဲ့ စစ်ကြောင်းက သိုင်းငင်းကို ပေါင်းလာပြီးတော့မှ အဲဒီကနေ ဖလမ်းဘက်ကို တဖြည်းဖြည်းချင်းနဲ့ စစ်ကြောင်းထိုးလာတာပါ။ ကျနော်တို့က လောလောဆယ် ယာယီသိုင်းငင်းကနေ ဆုတ်ရတဲ့အချိန်မှာ ကျနော်တို့က ဇောင်ကောင်ရွာဝန်းကျင်မှာ ခဏ နေရာယူတာပေါ့နော်”ဟု ဆလိုင်း ဒီကီက ပြောသည်။
ကျဆုံး ရဲဘော်များ၏ အလောင်းကို ပြန်လည် ရယူနိုင်ခြင်း မရှိသေးကြောင်း၊ ယနေ့ နိုဝင်ဘာလ ၂၈ ရက်တွင် တိုက်ပွဲများ ဖြစ်ပွားခြင်း မရှိကြောင်း သိရသည်။
ယမန်နေ့ နိုဝင်ဘာလ ၂၇ ရက်က ဇောင်ကောင်၊ ဘားလုံနှင့် New Sung Pi ရွာတွေဘက်ကို စစ်ကော်မရှင်တပ်က Y – 12 ဖြင့် လေကြောင်းတိုက်ခိုက်မှု တချို့ ရှိခဲ့ပြီး ကလေးမြို့မှလည်း လက်နက်ကြီးဖြင့် ပစ်ခတ်မှုတချို့ ရှိသည်ဟု သိရသည်။
နိုဝင်ဘာလ ၂၃ ရက်က သိုင်းငင်းအနီး တဝိုက်ကို စစ်ကော်မရှင်တပ်က လေကြောင်းမှ ဗုံးကြဲတိုက်ခိုက်မှုများ ပြုလုပ်ပြီး နိုဝင်ဘာလ ၂၄ ရက်မှ စတင်၍ သိုင်းငင်းမှ ဖလမ်းမြို့ဘက်ကို ဦးတည်၍ အင်အားအများအပြားဖြင့် စစ်ကြောင်းထိုးလာခြင်း ဖြစ်သည်ဟု သိရသည်။
ဖလမ်းမြို့ဘက်ကို ဦးတည်လာနေသော သိုင်းငင်းမှ စစ်ကော်မရှင်စစ်ကြောင်းနှင့် ဝေဘူလမြို့မှ စစ်ကော်မရှင် စစ်ကြောင်းများကို ချင်းတော်လှန်ရေးပူးပေါင်းတပ်က ခုခံတိုက်ခိုက်နေရာ တိုက်ပွဲများ ဖြစ်ပွားနေသည်ဟု သိရသည်။
