(004SS)
ချင်းပြည်နယ်၊ တီးတိန်မြို့နယ်၊ Tungzang နယ်မြေ၊ ကျီသွီးချောင်း (Citui lui) အနီးတွင် အမှတ်တရအုတ်ဂူစိုက်ထူပွဲ အခမ်းအနားမှ ပြန်လာသည့် ခရီးသည်တင် ကားတစ်စီး ယမန်နေ့က မီးလောင်မှုဖြစ်ပွားခဲ့ကြောင်း သိရသည်။
ဖြစ်စဉ်မှာ ဖေဖော်ဝါရီလ ၁၅ ရက်နေ့၊ ညနေပိုင်း ၃ နာရီဝန်းကျင်တွင်ဖြစ်ပွါးခဲ့ခြင်းဖြစ်ပြီး တီးတိန်မြို့မှ လလ်တာ (Lalta) / ဖီလ်နပ် (Philnak) ကျေးရွာဘက်သို့ ဆွန်းသဲ (Suante) မျိုးနွယ်စုဝင် ပြင်သစ်ရောက် ပူ ဂင်ခိုင်နှင့် ၎င်း၏မိသားစုဝင် ၂ ဦးတို့ အတွက် အမှတ်တရ အုတ်ဂူစိုက်ထူခြင်း အခမ်းအနားသို့ သွားရောက်ခဲ့သည့် ခရီးသည်တင်ကား အခမ်း အနားအပြီး တီးတိန်မြို့သို့ ပြန်လာစဉ် ကျီသွီးချောင်းအနီးရှိ ဦးဂိုဆွန်း၏ ယာခင်းအနီး၌ မီးလောင်မှု ဖြစ်ပွားခဲ့ခြင်း ဖြစ်သည်။
“Tungzang နယ်၊ ကျီသွီချောင်း အနီးမှာ ကားတစ်စီးသွားနေရင်းတန်းလန်းမီးထလောင်ပါတယ်။ Tungzang လူငယ် တွေကို အကြောင်းလာကြားတော့ ချက်ချင်းလိုက်သွားပါတယ်။ ကားကတော့ တစ်စီးလုံးပျက်စီးသွားတယ် ဘာမှ ရစရာမရှိတော့ဘူး။ လူတွေကတော့ ၁၀ ယောက်ဝန်းကျင်စီးလာတာပါ။ သူတို့ကတော့ဘာမှမဖြစ်ဘူး” ဟု Tungzang လူငယ်တစ်ဦးကပြောသည်။
မီးလောင်မှုဖြစ်ပွားချိန်တွင် ကားပေါ်၌ ခရီးသည် (၁၀) ဦးခန့် လိုက်ပါလာသော်လည်း ထိခိုက်ဒဏ်ရာရသူ မရှိခဲ့ဘဲ ဘေးကင်းစွာ လွတ်မြောက်ခဲ့ကြသည်။
Tungzang ကျေးရွာရှိ လူငယ်များကလည်း ထိုသို့ အခက်အခဲဖြစ်နေသော ခရီးသည်များကို တီးတိန်မြို့သို့ ပြန်လည် ရောက်ရှိနိုင်ရန်အတွက် တာဝန်ယူ ပို့ဆောင်ပေးခဲ့ကြကြောင်း သိရသည်။
အဆိုပါ ကျီသွီးချောင်း ပတ်ဝန်းကျင်နေရာသည် ယခင်ကလည်း ဆိုင်ကယ်နှင့် မော်တော်ကား တိမ်းမှောက်မှုများ မကြာခဏ ဖြစ်ပွါးလေ့ရှိသည့်အပြင် သေဆုံးမှုများရှိခဲ့သည်ဟု ဒေသခံများပြောပြချက်အရ သိရသည်။
