(004SS)
မလေးရှားနိုင်ငံအတွင်း ခိုလှုံနေထိုင်ကြသည့် ဒုက္ခသည်များနှင့် ယာယီခိုလှုံခွင့်ရရှိထားသူများအတွက် ကိုရီးယားနိုင်ငံသို့ ပြောင်းရွှေ့အခြေချကာ မဟာဘွဲ့ (Master’s Degree) တက်ရောက်နိုင်မည့် Global Korea Scholarship (GKS) အစီအစဉ်ကို စတင်လိုက်ပြီဖြစ်ကြောင်း Alliance of Chin Refugees (ACR) ၏ ဖော်ပြချက်အရ သိရသည်။
အဆိုပါ ပညာတော်သင်ဆု အစီအစဉ်ကို ကိုရီးယားတရားရေးဝန်ကြီးဌာန (MOJ)၊ ပညာရေးဝန်ကြီးဌာန (MOE) နှင့် UNHCR Korea တို့ ပူးပေါင်းဆောင်ရွက်ခြင်းဖြစ်ပြီး ဒုက္ခသည်များအတွက် ပညာတော်သင်ဆု နေရာ (၅) နေရာခန့် သတ်မှတ်ထားကြောင်း သိရသည်။
“အခုဟာက ဒုက္ခသည်အားလုံးအတွက် လုပ်ပေးတာ ဖြစ်ပါတယ်။ ကျောင်းဆက်တက်ချင်သူတွေအတွက် လျှောက်လို့ရပါတယ်” ဟု ACR ဉက္ကဌ ဆလိုင်းဂျိမ်စ်းက ပြောသည်။
ရွေးချယ်ခံရသည့် ကျောင်းသားများသည် ၂၀၂၆ ခုနှစ်၊ စက်တင်ဘာလမှစတင်ကာ ၃ နှစ်ကြာ ပညာသင်ယူခွင့်ရရှိမည် ဖြစ်သည်။
ပထမတစ်နှစ်မှာ ကိုရီးယားဘာသာစကား သင်ယူရမည်ဖြစ်ပြီး ကျန် (၂) နှစ်မှာ Master Programme ကို တက်ရောက်ရမည် ဟု ဆိုသည်။
ခံစားခွင့်များအနေဖြင့် အသွားအပြန် လေယာဉ်လက်မှတ်၊ ကျောင်းလခ အပြည့်အဝ၊ အစားအသောက်နှင့် နေထိုင်စရိတ် (လစဉ်ထောက်ပံ့ကြေး) တို့ ပါဝင်မည်ဟု သိရသည်။
အသက် (၄၀) နှစ်အောက် UNHCR ကတ်ကိုင်ဆောင်ထားသူ ဒုက္ခသည် (သို့မဟုတ်) ယာယီခိုလှုံသူ၊ Bachelor’s Degree (ဘွဲ့တစ်ခုခု) ရရှိထားသူ၊ ပညာအရည်အချင်း CGPA အမှတ်မှာ အမှတ် ၈၀% နှင့်အထက်ရရှိထားသူ (သို့မဟုတ်) အတန်းတွင်း ထိပ်တန်းအဆင့် ၂၀ ရာခိုင်နှုန်းအတွင်း ရှိသူများက လျှောက်ထားနိုင်မည် ဖြစ်သည်။
စိတ်ဝင်စားသူများအနေဖြင့် သတ်မှတ်ထားသည့် Express of Interest အွန်လိုင်းဖောင် https://enketo.unhcr.org/x/emHyxhXY တွင် ဖြည့်စွက်လျှောက်ထားရမည်ဖြစ်ပြီး ရွေးချယ်ခံရပါက မတ်လ ၈ ရက်နေ့တွင် အတည်ပြုထုတ်ပြန်ပေးမည်ဖြစ်ကာ မတ်လ ၉ ရက်နေ့တွင် ပြုလုပ်မည့် UNHCR ၏ လိုအပ်ချက်ရှင်းလင်းပွဲသို့ မပျက်မကွက် တက်ရောက်ရမည်ဖြစ်ကြောင်း သိရသည်။
