ပလက်ဝမြို့သို့ ဆန်သယ်ယူခွင့်ပိတ်ပင်မှုကြောင့် ဆန်ပြတ်လပ်

0

By လားနွန် – ရခိုင်ပြည်နယ်ဘက်မှ ဆန်သယ်ခွင့်ပိတ်ပင်ထားသည့်အတွက် ချင်းပြည်နယ်တောင်ပိုင်းပလက်ဝမြို့တွင် ဆန်ပြတ်လပ်မှုဖြစ်ပေါ်နေပြီး ရောင်းစရာဆန်မရှိသည့်အတွက် ဆန်ဆိုင်များလည်း ပိတ်ထားရသည်ဟု သိရသည်။

မြန်မာ့တပ်မတော်နှင့် ရခိုင်လက်နက်ကိုင်တပ်ဖွဲ့(AA) အကြား တိုက်ပွဲဖြစ်ပွားနေမှုကြောင့် လုံခြုံရေးအခြေအနေ ကြောင့်ဟုဆိုကာ မြန်မာ့တပ်မတော်(၂၈၉) ဗျူဟာတပ်က ရခိုင်ပြည်နယ်မှ ဆန်များ ပလက်ဝမြို့ဘက်သို့ တင်ပို့ခွင့်ကို ပိတ်ပင်ထားသည့်အတွက် ယခုကဲ့သို့ဆန်ပြတ်လပ်သည့်အခြေအနေဆိုက်ရောက်ရခြင်းဖြစ်သည်ဟု ပလက်ဝမြို့နယ် လူမှုကူညီရေးပရဟိတအဖွဲ့မှ ဦးကျော်ခင်ကပြောသည်။

“ ၂၈၉ ဗျူဟာကပဲ သူတို့ပိတ်ထားတာ လောလောဆယ်တော့ သယ်ယူခွင့်မရသေးဘူးလို့ပြောတာ ဆန်ရောင်းတဲ့ဆိုင်တွေကနေ အဲလိုတော့ပြောတာပဲ ကျွန်တော့်အမေကိုယ်တိုင်က ဆန်ရောင်းတာဆိုတော့လေ ” ဟု ဦးကျော်ခင်ကပြောသည်။

ပလက်ဝမြို့က ဆန်ဆိုင်များသည် ရခိုင်ပြည်နယ် ကျောက်တော်ဘက်မှ ဆန်များကို အဓိကသယ်ယူကာ ပြန်လည်ရောင်းချနေရပြီး ဆန်သယ်ယူခွင့်ပိတ်ပင်းထားသည့်အတွက် ရောင်းစရာဆန်မရှိဘဲ ဆိုင်ပိတ်ထားကြ ရသည်ဟု ၎င်းကဆက်ပြောသည်။

ယခုကဲ့သို့ ဆန်ပြတ်လပ်မှုကြောင့် ဒေသခံပြည်သူများသည် နီးစပ်ရာဆွေးမျိူးများထံသို့ အကူအညီတောင်း ခံကာ မျှဝေစားသုံးနေကြရသည်ဟု သိရသည်။

“ရှိတဲ့လူဆီကပဲ ဘယ်သူ့ဆီမှာရှိမလဲဆိုပြီးတော့ စုံစမ်းပြီးတော့ ရှိတဲ့လူဆီကပဲ ရောင်းပါအုံး အဲလိုပဲအကူအညီတောင်ပြီးမှ ၀ယ်ရတဲ့သဘောဖြစ်နေတာပေါ့ အဲလိုပဲ ဘယ်မှာရှိမလဲ အရင်ကလှောင်ထားတဲ့သူတွေရှိတာပေါ့ တစ်ချို့ကျတော့လေ ရှိတယ်လို့သတင်းကြားတဲ့သူဆီမှာပဲ အကူအညီတောင်းပြီးမှဝယ်ရတယ်သဘောပေါ့ ဘယ်တော့ပြန်သယ်လို့ရမလဲတော့ ကျွန်တော်တို့လည်းမေးလဲမမေးဖြစ်ဘူး ဒီအပတ်တော့ရအုံးမှာမဟုတ်ဘူးလို့တော့ အဲလိုဆိုင်ရောင်းတဲ့သူတွေဆီကနေကြားတယ်” ဟု ဦးကျော်ခင်ကပြောသည်။

ပလက်ဝမြို့ပေါ်တွင် ဆန်အရောင်းဆိုင် (၁၅) ဆိုင်ခန့်ရှိပြီး ဆန်ပြတ်လပ်မှုကြောင့် ဆိုင်ပိတ်ထားရသည်ဟု သိရသည်။

ပလက်ဝမြို့ပေါ်တွင် ပုံမှန်စားသုံးကြသည့် ဆန်တစ်အိပ်လျင် ကျပ်ငွေ ၃ သောင်းကျော်ခန့်ရှိပြီး ဆန်ဈေးများအဆမတန်မြင့်တက်နိုင်သည်ဟု သိရသည်။

Share.

About Author

Leave A Reply

*

code