စစ်ကောင်စီတပ်ဖွဲ့၏ သံချပ်ကာကားအပါအဝင် ရိက္ခာများတင်ဆောင်လာသည်ဟု ယူဆရသော ကားအစီး ၃၀ ခန့်သည် ယနေ့မနက်ပိုင်းက ကလေးမြို့မှ ချင်းပြည်နယ်ဘက်သို့ တက်လာပြီး ဖလမ်း ဟားခါးဘက်သို့ သွားရောက်မည်ဟု ယူဆကြောင်း ချင်းကာကွယ်ရေးတပ်ဖွဲ့ဘက်ကပြောဆိုသည်။ “၇ ရက်နေ့ကထွက်လာတဲ့အဖွဲ့ ဒီနေ့မနက်ပိုင်းမှာ သိုင်းငင်းလမ်းခွဲရောက်ပြီ။ သူတို့က ခြေလျင်နဲ့ ကားလမ်းအတိုင်းရော တောလမ်းအတိုင်းရောနှင်လာတယ်။ ဒီနေ့ ၉ ရက်နေ့မှာ ကားနဲ့ အင်အား ၁၀ဝ လောက် ထပ်တက်လာတယ်၊ သံချပ်ကားလည်းပါလာတယ် သိုင်းငင်းလမ်းခွဲမှာ ပထမ တက်တဲ့အဖွဲ့နဲ့ နောက်တက်တဲ့ အဖွဲ့တွေပေါင်းနေတယ်။ ဖလမ်း၊ ဟားခါးဖက်ကိုဆက်သွားမယ်လို့ သတင်းရထားတယ်။” ဟု PDF-Zoland က တာဝန်ရှိသူတစ်ဦးက ပြောသည်။ စစ်ကောင်စီတပ်ဖွဲ့သည် မတ်လ ၇ ရက်နေ့က ကလေးမြို့မှ ချင်းပြည်နယ်ဘက်သို့ ခြေလျှင်ဖြင့်တက်လာခဲ့ကြပြီး ယနေ့ ၉ ရက်နေ့တွင် သံချပ်ကာကားအပါအဝင် ချောဆွဲခံထားရသော အရပ်သားကုန်တင်ကား အစီး ၃၀ ခန့်ဖြင့် ချင်းပြည်နယ်သို့ ထပ်မံချီတက်လာခြင်းဖြစ်သည်။ “သူတို့အနောက်ကနေပါလာတဲ့ကားတွေက စစ်သုံးကားတွေမဟုတ်ပဲနဲ့ အရပ်သားကားတွေဖြစ်နေတယ်၊ ဒီလိုကားသုံးတာက လူသားဒိုင်းသုံးတာ သူတို့သတ္တိကြောင်တဲ့အလုပ်လုပ်တယ် ပြည်သူတွေကိုဒီအတိုင်း ထိုးကျွေးလိုက်တဲ့သဘော၊ ဘာမှ သိက္ခာမရှိတဲ့အလုပ်တွေလုပ်နေတဲ့သဘောလို့ပဲပြောရမယ်။” PDF-Zoland က တာဝန်ရှိသူက ပြောသည်။ အဆိုပါစစ်ကောင်စီတပ်ဖွဲ့သည် သိုင်ငင်းကျေးရွာမှတဆင့် ဖလမ်းမြို့ဘက်သို့ ဆက်လက်ချီတက်သွားပြီး သိုင်ငင်းနှင့် ဇောင်ကောင်ရွာကြား Bekan ရွာတွင် ညအိပ်ကြသည်ဟု သတင်းရင်းမြစ်တချိူ့က ဆိုသည်။ ယခုကဲ့သို့ စစ်ကောင်စီစစ်ကြောင်း ချင်းပြည်နယ်ဘက်သို့ တက်လာသည့်အတွက်ကြောင့် ဒေသခံကာကွယ်ရေးအဖွဲ့များနှင့် နေရာမရွေး၊ အချိန်မရွေး တိုက်ပွဲဖြစ်လာနိုင်ဖွယ်ရှိကြောင်း ဒေသကာကွယ်ရေးတပ်ဖွဲ့ဘက်က ဆိုသည်။
Author: Editor
ချင်းပြည်နယ်တောင်ပိုင်း ပလက်ဝမြို့နယ်မှာ ယနေ့ မတ်လ ၉ ရက် မနက်ပိုင်းက စစ်ကောင်စီတပ်ဖွဲ့နှင့် CNA, CDF-Paletwa တပ်ဖွဲ့တို့ ဆက်လက်တိုက်ပွဲဖြစ်ပွားခဲ့ရာ စစ်ကောင်စီတပ်သား ၈ ဦးသေဆုံးပြီး ၁၅ ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။ ယနေ့ မတ်လ ၉ ရက်နေ့တွင် လိုင်လင်းပီမြို့မှ မတူပီမြို့နယ် ထယ်ဘွေ့စခန်းသို့ စစ်အင်အားဖြည့်တင်းလာသည့် စစ်ကောင်စီစစ်ကြောင်းကို ပလက်ဝမြို့နယ် ကိန်းကန်းကုန်ကျေးရွာနှင့် စခီဟာကျေးရွာကြားရှိ လာကီချောင်းတနေရာတွင် စစ်ကောင်စီတပ်ဖွဲ့နှင့် CNA, CDF-Paletwa တပ်ဖွဲ့တို့ တိုက်ပွဲဖြစ်ပွားခဲ့ခြင်းဖြစ်သည်ဟု CDF-Paletwa တပ်ဖွဲ့က ထုတ်ပြန်သည်။ စစ်ကောင်စီတပ်ဖွဲ့နှင့် CNA, CDF-Paletwa တို့သည် မနက်ပိုင်း ၁၀ နာရီ ၅၄ မိနစ်မှ ၁၁ နာရီ ၄၁ မိနစ်ကြားတွင်တစ်ကြိမ်၊ နေ့လယ် ၁၂ နာရီ ၂၀ မိနစ်မှ ၁၂ နာရီမိနစ် ၄၀ ကြားတွင်တစ်ကြိမ် ဖြစ်ပွားသော အဆိုပါတိုက်ပွဲတွင် စစ်ကောင်စီတပ်သား ၈ ဦးသေဆုံးကာ ၁၅ ဦးပြင်းထန်စွာ ဒဏ်ရာရရှိခဲ့ကြသည်ဟု CDF-Paletwa က ဆိုသည်။ အဆိုပါတိုက်ပွဲတွင် အထိအခိုက်မရှိ ကောင်းမွန်စွာ ပြန်လည်ဆုတ်ခွာနိုင်ခဲ့သည်ဟု CDF-Paletwa က ထုတ်ပြန်သည်။ ယမန်နေ့ မတ်လ ၈ ရက်နေ့ကလည်း ပလက်ဝမြို့နယ် ကိန်းကန်းကုန်ကျေးရွာနှင့် စခီဟာကျေးရွာကြားရှိ ဗာမီချောင်းလမ်းခုလတ်တွင် စစ်ကောင်စီတပ်နှင့် CDF-Paletwa တပ်ဖွဲ့တို့တိုက်ပွဲဖြစ်ပွားခဲ့ကြပြီး စစ်ကောင်စီတပ်သား ၅ ဦးသေဆုံးခဲ့သည်။
ချင်းပြည်နယ်၊ ဟားခါးမြို့ နိုင်ငံကူးလက်မှတ်ထုတ်ပေးသည့်ရုံးတွင် လျှောက်ထားသူ ကြိတ်ကြိတ်တိုးနေပြီး လျှောက်လွှာဖောင်ရရှိဖို့ပင် ခက်ခဲနေသည်ဟု ပါတ်စ်ပို့လျှောက်ထားသူများထံမှ သိရသည်။ ပါတ်စ်ပို့လျှောက်မည့်သူများသည် မနက် ၄ နာရီကတည်းက ရုံးရှေ့ကို လာစောင့်နေကြသူတွေရှိပြီး မနက် ၆ မတိုင်မီ အယောက် ၂၀၀ ကျော်တန်းစီစောင့်နေဆိုင်းနှင့်ပြီဖြစ်ကာ လျှောက်လွှာရရှိဖို့မလွယ်ကြောင်း ပါတ်စ်ပို့လျှောက်ထား သူတစ်ဦးကပြောသည်။ “ဖောင်ရဖို့ အရမ်းခက်တယ်။ လျှောက်လွှာရဖို့ အရေး တစ်နေကုန်ပါပဲ။ ကံကောင်းရင် လျှောက်လွှာရမယ်၊ ကံမပါရင်တော့ မရဘူးပေါ့နော်။ ဒီနေ့တော့ နေ့လည်ပိုင်လောက်မှာ စိတ်ရှည်ရှည်နဲ့ တန်းစီစောင့်နေတဲ့ကျွန်တော်တို့ကို ဖောင်တွေ ဝေပေးတယ် ဒါတောင် မတ်လ ၂၀ ကနေ ၂၄ ရက်အတွက်သာ ရတော့တယ်။” ဟု သူကပြောတယ်။ ပါတ်စ်ပို့အတွက် လျှောက်လွှာဖောင်ရရှိရန်ပင် အလွန်ခက်ခဲသည့်အတွက် ရုံးပြင်ပမှာ လျှောက်လွှာများ ပြန်ရောင်းချမှုများလည်းရှိနေပြီး တစ်စောင်ကို ကျပ်ငွေ ၃၀,၀၀၀ ကနေ ကျပ်ငွေ ၁၀၀,၀၀၀ အထိပေါက်ဈေးရှိသည်ဟုလည်း သိရသည်။ ဟားခါးမြို့ ပါတ်စ်ပို့ရုံးမှာ ယခင်က လူကိုယ်တိုင်လျှောက်လွှာယူရပြီး အချက်အလက်တွေကိုယ်တိုင်ဖြည့်ကာ လျှောက်ထားကြသော်လည်း နောက်ပိုင်းတွင် ပွဲစားများနှင့် လုပ်ကြသူများလာပြီး ကျပ်ငွေ ၃ သိန်းကနေ ၁၀ အထိ ကုန်ကျသူများလည်းရှိသည်ဟု ဟားခါးမြို့ဒေသခံတစ်ဦးက ပြောသည်။ ပါတ်စ်ပို့ကို ကိုယ်တိုင်ပြုလုပ်မယ်ဆိုပါက နိုင်ငံသားကဒ်ပြား ၄/ ကိုင်စောင်သူများအတွက် ကျပ်ငွေ ၅၀,၀၀၀ ကုန်ကျပြီး နိုင်ငံသားကဒ်ပြား ၅/ ကိုင်စောင်သူများသည် နယ်ခြားဖြစ်သည့်အတွက် ကျပ်ငွေ ၁၈၀,၀၀၀ ကုန်ကျကြောင်း သိရသည်။ ယခုကဲ့သို့ ဟားခါးမြို့ နိုင်ငံကူးလက်မှတ်ထုတ်ပေးသည့်ရုံးတွင် ကြိတ်ကြိတ်တိုးနေရခြင်းမှာ ချင်းပြည်နယ်သာမက…
ချင်းပြည်နယ်တောင်ပိုင်း ပလက်ဝမြို့နယ်မှာ မတ်လ ၈ ရက် နေ့လည်ပိုင်းက စစ်ကောင်စီတပ်ဖွဲ့နှင့် CDF-Paletwa တပ်ဖွဲ့တို့ တိုက်ပွဲဖြစ်ပွားခဲ့ရာ စစ်ကောင်စီတပ်သား ၅ ဦးသေဆုံးပြီး ၁၁ ယောက် ပြင်းထန်စွာ ဒဏ်ရာရရှိခဲ့ကြောင်း သိရသည်။ မတ်လ ၈ ရက်နေ့တွင် လိုင်လင်းပီမြို့မှ မတူပီမြို့နယ် ထယ်ဘွေ့စခန်းသို့ စစ်အင်အားဖြည့်တင်းလာသည့် စစ်ကောင်စီစစ်ကြောင်းကို ပလက်ဝမြို့နယ် ကိန်းကန်းကုန်ကျေးရွာနှင့် စခီဟာကျေးရွာကြားရှိ ဗာမီချောင်း လမ်းခုလတ်တနေရာတွင် ကြားဖြတ်တိုက်ခိုက်ခဲ့ခြင်းဖြစ်သည်ဟု CDF-Paletwa တပ်ဖွဲ့က ထုတ်ပြန်သည်။ နေ့လယ် ၁ နာရီမှ ၂ နာရီခွဲအထိ တစ်နာရီကျော်ကြာဖြစ်ပွားသော အဆိုပါတိုက်ပွဲတွင် စစ်ကောင်စီတပ်သား ၅ ဦးသေဆုံးကာ ၁၁ ဦးပြင်းထန်စွာ ဒဏ်ရာရရှိခဲ့ကြသည်ဟု CDF-Paletwa က ဆိုသည်။ အဆိုပါတိုက်ပွဲတွင် အထိအခိုက်မရှိ ကောင်းမွန်စွာ ပြန်လည်ဆုတ်ခွာနိုင်ခဲ့သည်ဟု CDF-Paletwa က ထုတ်ပြန်သည်။
မြန်မာနိုင်ငံကနေတဆင့် တင်သွင်းလာတယ်လို့ ယူဆရတဲ့ ထူးခြားဆန်းပြားသော တောရိုင်းတိရစ္ဆာန်မျိုးစိတ်များ (exotic wildlife species) ကို မီဇိုရမ်ရဲတပ်ဖွဲ့က ယမန်နေ့ညက ဖမ်းဆီးရမိသည်ဟု သိရပါတယ်။ အဆိုပါတိရစ္ဆာန်မျိုးစိတ်များကို မီဇိုရမ်ပြည်နယ် Khawzawl-Rabung လမ်း Tualpui Junction မှာ ယာဉ်တစ်စီးကို မီဇိုရမ်ရဲတပ်ဖွဲ့က စစ်ဆေးရာမှာ ဖမ်းဆီးရမိခဲ့တာလို့ သိရပါတယ်။ ယင်းတိရစ္ဆာန်မျိုးစိတ်များနှင့်အတူ ဇိုခေါထာရ်ကျေးရွာနေ ယာဉ်မောင်း Vanlalrawn ကို ဖမ်းဆီးထားတယ်လို့ သိရပါတယ်။ ယခုဖမ်းဆီးရမိတဲ့ တရိစ္ဆာန်မျိုးစိတ်များမှာ ငှက်မျိုးစိတ် ၁၃ မျိုးနှင့် မျောက် ၄ ကောင်တို့ဖြစ်ပြီး ကျန်ဖိုင်းမြို့ Custom Preventive Force ထံ ဥပဒေကြောင်းအရ ဆက်လက်ဆောင်ရွက်ရန် အပ်နှံခဲ့ကြသည်ဟု မီဇိုရမ်ရဲတပ်ဖွဲ့က ထုတ်ပြန်ပါတယ်။
မတူပီမြို့နယ် ပညာရေးဘုတ်အဖွဲ့၏ ဦးဆောင်မှုဖြင့် မတူပီမြို့နယ်အတွင်း ဖော်ဆောင်နေသော ကြားကာလ ပြည်သူ့ပညာရေးအတွက် ရံပုံငွေရှာဖွေပွဲ တေးဂီတဖျော်ဖြေရေးအစီစဉ်တရပ်ကို မီဇိုရမ်ပြည်နယ် လောင်တလိုင်မြို့ CYLA ခန်းမတွင် မတ်လ ၁၁ ရက်နေ့၌ ကျင်းပပြုလုပ်ကြမည်ဟု သိရသည်။ ကြားကာလ ပြည်သူ့ပညာရေး ဆက်လက်ရှင်သန်လည်ပတ်နိုင်ရန်နှင့် ခက်ခဲသည့်ကျောင်းသားများတွက် ကျောင်းသုံးကိရိယာများ အဆင်ပြေချောမွေ့စေရန်ဆိုသည့် ရည်ရွယ်ချက်ဖြင့် ယခုကဲ့သို့ ရံပုံငွေရှာဖွေမှုအစီစဉ်ကို ပြုလုပ်ရခြင်းဖြစ်သည်ဟု မတူပီမြို့နယ် ပညာရေးဘုတ်အဖွဲ့မှ ပြန်ကြားရေးတာဝန်ခံက ပြောသည်။ “၂၀၂၃ ခုနှစ် ပညာသင်နှစ်အတွက် ကျောင်းသား/ကျောင်းသူများနဲ့ ကြားကာလပညာရေး ဆက်လက်လည်ပတ်နိုင်ရေးအတွက် ခုလိုရံပုံငွေရှာဖွေဖို့ ခုလိုစီစဉ်ရတာဖြစ်ပါတယ်” ဟု ၎င်းကပြောသည်။ ယင်းတေးဂီတဖျော်ဖြေရေးအစီစဉ်တွင် နိုင်ငံကျော်အဆိုတော် ဒေးဗစ်လိုင်နှင့်အတူ Matupians အဖွဲ့၊ အဆိုတော် Esther Saudaw တို့ ပါဝင်ဖျော်ဖြေကြမည်ဖြစ်ပြီး မတူပီမြို့နယ် လွှတ်တော်ကိုယ်စားလှယ်များဖြစ်ကြသော ဦး Pathang, ဦး Lal Min Thang ၊ ဦး Ral Peng နှင့် ဘုတ်အဖွဲ့အကြံပေး ဆရာကြီး ဦးလှပိုး (TEO-ငြိမ်း) တို့မှလည်း Short Speech များ ပြောကြားမည်ဟု သိရသည်။ နိုင်ငံတကာမှပြည်သူများ ပါဝင်ကြည့်ရှုနိုင်ရန် Matupians Page မှ Live လွှတ်တင်သွားမည်ဖြစ်ကြောင်းလည်း သိရသည်။ မတူပီမြို့နယ် ပညာရေးဘုတ်အဖွဲ့၏ ဦးဆောင်မှုဖြင့် မတူပီမြို့နယ်အတွင်း ကြားကာလပြည်သူ့ပညာရေး ကျောင်းပေါင်း ၁၄၀ ကျော် ဖွင့်လှစ်နိုင်ခဲ့ကြပြီး ကျောင်းသူကျောင်းသားပေါင်း ၉၀၀၀ ကျော်ကို ကျောင်းဆရာ၊ဆရာမ ၄၀၀ ကျော်ဖြင့် ပညာသင်ကြားပေးနိုင်ခဲ့သည်ဟု သိရသည်။
အိန္ဒိယနိုင်ငံ မဏိပူရ်ပြည်နယ် အင်ဖားမြို့အကျဉ်းထောင်တွင် ဖမ်းဆီးထိန်းသိမ်းခံထားရသော မြန်မာစစ်ဘေးရှောင် ၃ ဦးကို မတ်လ ၂ ရက်နေ့က အာမခံဖြင့် ပြန်လွတ်လာကြသည်ဟု သိရသည်။ အာမခံဖြင့် လွတ်မြောက်လာသူများမှာ အသက် ၇၂ နှစ်အရွယ် ဦးဇမ်ခေါဆေးဒန်းထန်၊ အသက် ၂၀ ရွယ် ဝီလီယံနှင့် အသက် ၂၃ နှစ်အရွယ် Sonminthang တို့ဖြစ်ကြပြီး ၎င်းတို့သည် ပြီးခဲ့သည့် ဇန်နဝါရီလတုန်းက မိုးရေးမြို့နယ်တွင် စစ်ဘေးရှောင် အယောက် ၈၀ ကျော်နှင့်အတူ ဖမ်းဆီးခံခဲ့ရသူများဖြစ်ကြသည်။ ဦးဇမ်ခေါဆေးဒန်းထန်သည် ကျန်းမာရေးအခြေအနေမကောင်းသည့်အတွက် အာမခံဖြင့် ပြန်လည်လွတ်မြောက်လာခြင်းဖြစ်ပြီး ဝီလီယံနှင့် Sonminthang တို့မှာ ကျောင်းနေရွယ်လူငယ်များဆိုသည့် ခြွင်းချက်ဖြင့် အာမခံနှင့် ပြန်လွတ်ပေးခဲ့ခြင်းဖြစ်သည်ဟု မြန်မာစစ်ဘေးရှောင်ကူညီရေးအသင်း နာယဂ ဦးထန်ဆေးက ပြောသည်။ ယခုလက်ရှိတွင် အင်ဖားမြို့အကျဉ်းထောင်တွင် မြန်မာနိုင်ငံက စစ်ဘေးရှောင် ၁၀၀ ကျော်ခန့် ဖမ်းဆီးထိန်းသိမ်းခံနေရဆဲဖြစ်ပြီး ကျန်းမာရေးစောင့်ရှောက်မှု အားနည်းသည့်အတွက် အသက်အန္ဓာရယ် စိုးရိမ်ရသူများလည်းရှိသည်ဟု ၎င်းက ဆက်ပြောသည်။ ပြီးခဲ့သည့် ဖေဖော်ဝါရီ ၂၆ ရက်နေ့ကလည်း အသက် ၃၂ နှစ်အရွယ် ဦးလမ်းခေါချွမ်ဂွေသဲမှာ အင်ဖားမြို့အကျဉ်းထောင်ထဲမှာ ရုတ်တရက် သေဆုံးခဲ့ရပြီးဖြစ်သည်။
စစ်အာဏာသိမ်းမှု ၂ နှစ်တာကာလအတွင်း ချင်းအမျိုးသားများပေါ် လူ့အခွင့်အရေးချိုးဖောက်ခံရမှုနှင့် အကြမ်းဖက်ကျုးလွန်ခံရမှုတို့ကြောင့် အသက်မပြည့်ကလေးငယ်နှင့် ဓမ္မအမှုတော်ဆောင်များအပါအဝင် ချင်းလူမျိုး ၃၈၀ ကျော် သေဆုံးခဲ့ရသည်ဟု Institute of Chin Affairs (ချင်းရေးရာအဖွဲ့ချုပ်) က ထုတ်ပြန်သည်။ ၂၀၂၁ ခုနှစ် ဖေဖော်ဝါရီ ၁ ရက်နေ့ကစ၍ ၂၀၂၃ ခုနှစ် ဖေဖော်ဝါရီလအထိ ၂ နှစ်တာကာလအတွင်းမှာ စစ်ကောင်စီက ၎င်းတို့အာဏာတည်မြဲရေးအတွက် ချင်းလူမျိုးများအပေါ် သေနတ်အစစ်၊ ကျည်အစစ်၊ ဗုံးအစစ်များ၊ လက်နက်ကြီးများ (RPG၊ ၄၀ မမ၊ ၆၀ မမ) ဂျက်ဖျက်တာများအသုံးပြုကာ လူ့အခွင့်အရေးချိူးဖောက်မှုနှင့် ရာဇဝတ်မှုအမျိုးမျိူးကျူးလွန်ခဲ့ သည်ဟု မတ်လ ၂ ရက်နေ့က ချင်းရေးရာအဖွဲ့ချုပ်ကထုတ်ပြန်သည်။ ချင်းရေးရာအဖွဲ့ချုပ်၏ အဆိုအရ စစ်ကောင်စီ၏ မတရားသတ်ဖြတ်ခံ ရမှုကြောင့် ချင်းလူမျိုးသေဆုံးမှု ၂၀၂၁ ခုနှစ်အတွင်း ၁၆၄ ဦး၊ ၂၀၂၂ ခုနှစ်အတွင်း ၁၉၅ ဦးနှင့် ၂၀၂၃ ခုနှစ် ဖေဖော်ဝါရီလ ၂၈ ရက်နေ့အထိ ၂၄ ဦး စုစုပေါင်း ၃၈၃ ဦးရှိခဲ့သည် ဟု သိရသည်။ အဆိုပါသေဆုံးသည့် ချင်းလူမျိူး ၃၈၀ ကျော်တွင် ချင်းတော်လှန်ရေးတပ်ဖွဲ့ဝင် ၂၃၀ ကျော်နှင့် အရပ်သားပြည်သူ ၁၂၀ ကျော်ပါဝင်ပြီး ထိုအထဲတွင် (၁၈) နှစ်အောက် ကလေးသူငယ် ယောကျာ်းလေး (၁၉) ဦးနှင့် မိန်းကလေး (၅) ဦး စုစုပေါင်း (၂၄) ဦးပါဝင်ကာ (၆) လ…
ချင်းပြည်နယ် မတူပီမြို့နယ်တွင် ကားလမ်းပိတ်ထားမှုကြောင့် ပြည်မဘက်မှ ဆန်ဝင်ရောက်နိုင်ခြင်းမရှိပဲ စားနပ်ရိက္ခာပြတ်လပ်ကာ မြို့ခံပြည်သူအများစု စားဝတ်နေရေးအကြပ်အတည်းနှင့် ရင်ဆိုင်နေကြရသည်ဟု သိရသည်။ စစ်အုပ်ချုပ်ရေးအမိန့် ထုတ်ပြန်ထားသော မတူပီမြို့တွင် စစ်ကောင်စီဘက်က ပြည်မဘက်နှင့်ဆက်သွယ်သော မတူပီ-ဂန့်ဂေါ၊ မတူပီ-မင်းတပ် ကားလမ်းများ လနှင့်ချီပိတ်ထားသောကြောင့် ကုန်တင်ကား အဝင်အထွက်မရှိတော့ပဲ စားနပ်ရိက္ခာများ ပြတ်လပ်လာခြင်းဖြစ်ကြောင်း မတူပီမြို့ခံတစ်ဦးက ပြောသည်။ “အရင်ကတည်းက ကားတွေကအဝင်အထွက်ပိတ်ထားတယ်။ မြေပြင်အခြေအနေက တအားကိုဆိုးတာဆိုတော့ ထွက်ခွင့်မပြုတာ ခနခနဖြစ်တော့ စားသောက်ကုန်တွေကပြတ်တယ်လေ။ စားသောက်ကုန်တွေက ဟိုဖက်သောင်တင်လိုက်၊ ဒီဖက်သောင်တင်လိုက်နဲ့ မတူပီမရောက်နိုင်တော့ ပြတ်တာ။ ပုံမှန် မဖြစ်တဲ့အခါကျတော့ ဝယ်စရာမရှိတဲ့အခြေ အနေမျိုးဖြစ်တယ်။ လောလောဆယ် ချွေတာပြီးတော့ စားရတဲ့အခြေအနေပေါ့။” ဟု မတူပီမြို့ခံက ပြောသည်။ ယခုကဲ့သို့ အခြေအနေကြောင့် မတူပီမြို့ရှိ ဆန်ဆိုင်များ တွင်လည်း ဆန်ဝယ်ယူရန်ပင်မရှိသည့် အနေအထားမှာရှိနေပြီး ကျေးရွာဘက်မှဝင်ရောက်လာသည့် ဆန်ကိုသာအဓိကအားထားနေရသည်ဟုသိရသည်။ “ကားတွေတော့ အများကြီးတက်လာတယ်လို့သိရပေမယ့် ဟိုဖက်ကတားလိုက် ဒီဖက်ကတားလိုက်နဲ့ မြို့ထဲကို မဝင်သေးဘူး သောင်တင်နေတာနဲ့ အရင်တုန်းကပေါ်ဆန်းတအိတ်ကို ၃ သောင်းတန်ကို အခုက ၁သိန်းနဲ့တောင် ဝယ်လို့မရဘူး လောလောဆယ်က” ဟု မတူပီမြို့ခံတစ်ဦးကပြောသည်။ မတူပီမြို့ပေါ်တွင် ကုန်တင်ကားများ ဝင်ရောက်နိုင်ခြင်းမရှိပါက ပြည်သူများ ပိုမိုခက်ခဲလာမည်ဖြစ်သောကြောင့် ချင်းပြည်နယ် ဝန်ကြီးချုပ်ထံ ဖုန်းဆက်တင်ပြထားသည်ဟု ၎င်းက ဆက်ပြောသည်။ လက်ရှိ မတူပီမြို့တွင် ဆန်အပါအဝင် စားနပ်ရိက္ခာများ ပြတ်လပ်နေသော်လည်း စစ်ကောင်စီက ယနေ့ချိန်ထိ တစုံတရာ ဖြေရှင်းပေးခြင်းမျိုးမရှိကြောင်း သိရသည်။ ယင်းအခြေအနေကြောင့် မြို့တွင်းစပါးကျီရှိသူများနှင့် ယခင် ဆန်ကြိုတင်ဝယ်ယူစုဆောင်းထားကြသည့် ပြည်သူများသည် ပြန်လည်မျှဝေရောင်းချပေးမှုများရှိသည့်အပြင် မြို့ခံပြည်သူတချို့မှာ ဖနိုင်ရွာနှင့်…
နွေဦးတော်လှန်ရေးကာလအတွင်း စစ်ကောင်စီတပ်ဖွဲ့၏ ပစ်ခတ်မှုကြောင့် ကလေးမြို့တွင် အဦးဆုံးကျဆုံးခဲ့သည့် ကိုဇင်မျိုးမောင်ကျဆုံးခြင်း ၂ နှစ် ပြည့် အောက်မေ့ခြင်းအစီအစဉ် အထိမ်းအမှတ်နှင့်အတူ ဗိုလ်ချုပ်လမ်းမထက်ပေါ်မှ လူထုပျောက်ကြားသပိတ်ကို ကလေးမြို့ ပင်မသပိတ်အင်အားစုများမှ မတ်လ ၃ ရက်နေ့က ပြုလုပ်ခဲ့သည်ဟု သိရသည်။ မတ်လ ၃ ရက်နေ့တွင် စစ်ကောင်စီတပ်ဖွဲ့၏ ပစ်ခတ်မှုကြောင့် ကိုဇင်မျိုးမောင် သေနတ်ကျည်ထိမှန်သည့်နေရာတွင် နှင်းဆီပန်းချဂုဏ်ပြုခြင်း၊ ဖယောင်းတိုင်ထွန်းအောက်မေ့ခြင်းဖြစ် အစီအစဉ်ပြုလုပ်ခဲ့ကြခြင်းဖြစ်သည်။ အဆိုပါ ဂုဏ်ပြုမှတ်တမ်းတွင် “လွတ်လပ်မှု၊ တရားမျှတမှု၊ တန်းတူညီမျှမှုအတွက်ရဲရဲနီးသွေးအသက်ပေးခဲ့တဲ့ နွေးဦးသူရဲကောင်း ဇင်မျိုးမောင်ရေ (၂) နှစ်ပြည့်ခဲ့ပြီ မင်းလျှောက်ခဲ့တဲ့ဓမ္မလမ်း ဘယ်လောက်ကြမ်းပါစေ ငါတို့ဆက်လျှောက်နေတယ် တရားသောစစ်မုချအောင်ရမယ်။ ငါတို့အားလုံးကတိပေးတယ်နော်” ဟု ရေးသားဖော်ပြထားသည်။ ကလေးမြို့ပင်မသပိတ်အင်အားစုသည် ယနေ့အထိ ပျက်ရက်မရှိ စစ်အာဏာရှင်စနစ်ကို သပိတ်မှောက်ခဲ့သည့်ရက်ပေါင်း (၇၅၅) ရက်ရှိခဲ့ပြီဖြစ်ကြောင်း သိရသည်။ ကလေးမြို့သပိတ်အင်အားစုမှ မိဘပြည်သူများအနေဖြင့် “စစ်အာဏာရှင်၏ ခေတ်အဆက်ဆက် ဖိနှိပ်ချုပ်ချယ်မှုများအား၊ အပြီးတိုင်ချုပ်ငြိမ်းသွားစေရန် ငြိမ်ခံမနေဘဲ လမ်းမပေါ်သို့တက်ကာ အလံနှင့်အသံကြားရာအရပ်မှ ပူးပေါင်းပါဝင်ကြရန် အလေးအနက် တိုက်တွန်းထားသည်။ မတ်လ ၃ ရက်နေ့ မနက်ပိုင်း စစ်ကောင်စီတပ်ဖွဲ့ဝင်များသည် ကလေးမြို့၊ နေကြာတိုက်အနောက်ဘက် တာဟန်း ဘုန်းကြီးကျောင်းလမ်းထောင့်အပြင် ပြည်သူများ၏ ခြံဝန်းအတွင်းထိ ကင်းပုန်းများချထားမှုပြုလုပ်ခဲ့ကြသည်။ မတ်လ ၂ ရက်နေ့ကလည်း ကလေးမြို့၊ တောင်ဇလပ်ရပ်ကွက် နယ်မြေ (၆) ဆည်မြောင်းနှင့် ရေအသုံးချရေး စီမံခန့်ခွဲရေးဦးစီးဌာနရုံးတွင် တပ်စွဲထားသည့် စစ်ကောင်စီတပ်ဖွဲ့ဝင်များ၏ ပစ်ခတ်မှုကြောင့် ဆိုင်ကယ်အတူစီးလာသည့် အမျိုးသားတဦး ပွဲချင်းသေဆုံးခဲ့ပြီး တဦးမှာ ခြေထောက်တွင် သေနတ်ဒဏ်ရာရရှိခဲ့သည်။