(005MK)
အမေရိကန်အခြေစိုက် Burma Advocacy Group နှင့် မီဇိုရမ်ပြည်နယ်၀န်ကြီးချုပ် ပူးလာလ်ဒိုအောမ်မာတို့သည် မီဇိုရမ်ပြည်နယ်အတွင်း ရောက်ရှိနေကြသော မြန်မာနိုင်ငံက စစ်ဘေးရှောင်များအရေး တွေ့ဆုံဆွေးနွေးခဲ့ကြသည်ဟု သိရသည်။
Burma Advocacy Group အဖွဲ့မှ တာ၀န်ရှိသူများသည် ယမန်နေ့ဖေဖော်၀ါရီလ ၁၄ ရက်နေ့က မီဇိုရမ်ပြည်နယ် ၀န်ကြီးချုပ်ကို သူ၏ရုံးခန်းတွင် သွားရောက်တွေ့ဆုံကာ မြန်မာစစ်ဘေးရှောင်များအား နွေးထွေးစွာကြည့်ရှုစောင့် ရှောက်ပေးသည့်အပေါ် ကျေးဇူးတင်ကြောင်း ပြောဆိုခဲ့ကြသည်ဟု မီဇိုရမ်ပြည်နယ်အစိုးရအဖွဲ့ ပြန်ကြားရေးဌာနက ထုတ်ပြန်သည်။
မီဇိုရမ်၀န်ကြီးချုပ်ကလည်း မကြာသေးခင်ရက်ပိုင်းက နယူးဒေလီတွင် အိန္ဒိယပြည်ထဲရေး၀◌န်ကြီးနှင့်တွေ့ဆုံရာတွင် မြန်မာစစ်ဘေးရှောင်များ ထောက်ပံ့ကူညီရေးပိုင်းမှာ လိုအပ်သလိုကူညီပေးမည်ဟုပြောဆိုကြောင်း၊ မီဇိုရမ်အစိုးရအနေဖြင့်လည်း စစ်ဘေးရှောင်များကို တတ်နိုင်သည့်ဘက်မှ ဆက်လက်ကူညီပေးသွားမည်ဖြစ်ကြောင်း Burma Advocacy Group တာ၀န်ရှိသူများထံ ပြောကြားခဲ့သည်ဟု သိရသည်။
မီဇိုရမ်ပြည်နယ်အစိုးရအနေဖြင့်ဖြစ်စေ၊ အရပ်ဖက်အဖွဲ့အစည်းများ၊ ဘာသာရေးအဖွဲ့အစည်းများမှ မြန်မာစစ်ဘေးရှောင်များအား နွေးထွေစွာလက်ခံကြိုဆိုကာ ကူညီစောင့်ရှောက်ပေးသည့်အပေါ်မှာ Burma Advocacy Group အနေဖြင့် များစွာကျေးဇူးတင်ကြောင်း၊ ဆက်လက်ပြီး မြန်မာစစ်ဘေးရှောင်များ ကူညီထောက်ပံ့ရေးမှာ မီဇိုရမ်အစိုးရနှင့် အတူ လက်တွဲဆောင်ရွက်လိုကြောင်း အဖွဲ့ခေါင်းဆောင် Rev. Dr. Roy Medley ကပြောကြားခဲ့သည်ဟု ဖော်ပြထားသည်။
Burma Advocacy Group ကို လူသားချင်းစာနာထောက်ထားမှုအပါအ၀င် အခြားသော မြန်မာ့အရေးအရာ ကိစ္စများနှင့် ပတ်သက်၍ စည်းရုံးလှုံ့ဆော်ရန် American Baptist Churches မှ ဖွဲ့စည်းခဲ့သည့် အဖွဲ့ဖြစ်သည်။
Burma Advocacy Group အနေဖြင့် မီဇိုရမ်ပြည်နယ်အတွင်းရှိ အရေးပါသော အဖွဲ့အစည်းများ၊ လူပုဂ္ဂိုလ်များနှင့်လည်း ဆက်လက်တွေ့ဆုံသွားကြမည်ဟု သိရသည်။
