အတွင်းရေးမှူးကို လူသတ်မှုဖြင့် ထောင်တွင် ဖမ်းဆီးထိန်းသိမ်းထားပြီး ရာထူးမှ ရပ်ဆိုင်း
(006SV)
CDF – ဟားခါး၏ တပ်ဖွဲ့ဝင်အချင်းချင်း ကိုယ်ထိလက်ရောက် စကားများရာမှတဆင့် တပ်ဖွဲ့၏ ဒုတိယဥက္ကဌဟောင်းကို သေနတ် ဖြင့် ပစ်သတ်ခဲ့သည့် အထွေထွေအတွင်းရေးမှူးဖြစ်သူ၏ အမှုကို အထူးစုံစမ်းစစ်ဆေးရေးကော်မတီဖွဲ့စည်းပြီး ဆောင်ရွက်သွား မည်ဟု CDF – ဟားခါးဗဟိုကောင်စီထံမှ သိရသည်။
ယင်းအမှုနှင့်ပတ်သက်၍ တရားမျှတမှုနှင့် အမှန်တရားကို အမြန်ဆုံးဖော်ထုတ် ဆောင်ရွက်နိုင်ရန် အထူးစုံစမ်း စစ်ဆေးရေး ကော်မတီတစ်ရပ်ကို CDF – ဟားခါးဗဟိုကောင်စီ ကာကွယ်ရေးကော်မတီ၏ တရားရေးဌာန၊ ချင်းလဲန်းကောင်စီ၏ ကာကွယ်ရေးဝန်ကြီးဌာနမှ ကိုယ်စားလှယ်များဖြင့် ဖွဲ့စည်းဆောင်ရွက်သွားမည်ဖြစ်သည်။
CDF- ဟားခါးဗဟိုကောင်စီ ဖွဲ့စည်းပုံ အခြေခံစည်းမျဉ်းဥပဒေ၊ စစ်ဥပဒေနှင့်အညီ ပွင့်လင်းစွာ၊ တရားမျှတစွာ တရားစီရင်မှုကို ပြည်သူ့ရှေ့မှောက်တွင် ဆောင်ရွက်သွားမည်ဟု CDF – ဟားခါး ဗဟိုကောင်စီ၊ ဗဟိုအလုပ်အမှုဆောင်ကော်မတီက မေလ၂၈ရက်မှာ ကြေညာသည်။
ကနေဦးဖြစ်စဉ်များ စုံစမ်းစစ်ဆေးခြင်း၊ ကျန်ရစ်သူမိသားစုများ နှစ်သိမ့်ခြင်း အစီအစဉ် ဆောင်ရွက်ခြင်းနှင့် ဟားခါးမြို့နယ်အတွင်း အရေးပေါ် စစ်ရေးအခြေအနေများကြောင့် သတင်းထုတ်ပြန်ချက်များ၊ ဖြစ်စဉ်ရှင်းလင်းချက်များ စောလျင်စွာ မချပြနိုင်သည့်အတွက် ပြည်သူများကို တောင်းပန်အပ်ပါသည်ဟု ထုတ်ပြန်ချက်မှာ အသိပေးသည်။
ဆိုရှယ်မီဒီယာပေါ်တွင် CDF – ဟားခါးဗဟိုကောင်စီ အပေါ် လုပ်ကြံသတင်းများ၊ သတင်းမှားများ ပြန့်နှံ့နေသည်ကို တွေ့ရှိရပြီး လိုအပ်ပါက ပြန်လည်ရှင်းလင်းချက်များ ထုတ်ပြန်သွားမည်ဟု ယင်းအဖွဲ့ထံမှ သိရသည်။
ယင်းအမှုဖြစ်စဉ်မှာ မေလ ၁၅ ရက်က နံနက် ၉ နာရီ ၅၀ ခန့်က CDF – ဟားခါး ရုံးချုပ်ခန့်ဆောင်ကို တာဝန်ရှိသူတို့၏ ခွင့်ပြုချက် မရှိဘဲ CDF – ဟားခါး လက်ရှိတပ်သား ဆလိုင်းဆန်လိန်း (Salai Sang Ling @ Salai Joshua) နှင့် သူ့ ထမင်းချက် စားဖိုးမှူး (ထောင်သား) ၊ သူ့စက်ကြီးမောင်း ၁ ဦးတို့မှာ အကြောင်းမဲ့ လာရောက် ဖြိုချကြောင်း သိရသည်။
ယင်းအချိန်မှာ CDF – ဟားခါး အထွေထွေအတွင်းရေးမှူး ဆလိုင်းဇာကျုံးလျန် (Salai Za Cung Lian) မှ သတင်းရရှိ၍ သွားရောက်တားဆီးရာ စကားများကြပြီး ဆလိုင်းဆန်လိန်းမှ အထွေထွေအတွင်းရေးမှူးကို မှောက်လဲအောင်အထိ ပါးရိုက်မှု ဖြစ်ပွားခဲ့သည်။
ယင်းဖြစ်စဉ်ကို တရားရုံး၏ ဖမ်းဝရမ်းဖြင့် ဖမ်းဆီးနေစဉ်အတွင်း အထွေထွေအတွင်းရေးမှူးဖြစ်သူ ဆလိုင်း ဇာကျုံးလျန်မှ ဆလိုင်းဆန်လိန်းကို သေနတ်ဖြင့် ပစ်ခတ်ခဲ့ရာ အခင်းဖြစ်ပွားရာ နေရာတွင် သေဆုံးခဲ့ရသည်ဟု CDF – ဟားခါးထံမှ သိရသည်။
တော်လှန်ရေး ရဲဘော် အချင်းချင်းအကြား ဖြစ်ပွားခဲ့သော ပြဿနာများကို လက်နက်အသုံးပြုပြီး လူသတ်မှု ကျူးလွန်ခြင်းသည် လုံးဝ မဖြစ်သင့်၊ မရှိအပ်သော အပြုအမှု၊ စိတ်ရွံ့ဖွယ်ရာ လုပ်ရပ်ဖြစ်ပြီး ပြင်းထန်စွာ ကန့်ကွက်ရှုတ်ချသည်ဟု ယင်းအဖွဲ့က ဆိုသည်။
လူသတ်မှု ကျူးလွန်သော CDF – ဟားခါးဗဟိုကောင်စီ၏ အထွေထွေအတွင်းရေးမှူး ဆလိုင်းဇာကျုံးလျန်ကို တရားစွဲဆိုရန် ထောင်တွင် ဖမ်းဆီးထိန်းသိမ်းထားရှိပြီး အထွေထွေ အတွင်းရေးမှူး ရာထူးမှ ရပ်ဆိုင်းလိုက်သည်ဟု သိရသည်။
ဆလိုင်းဆန်လိန်းသည် CDF – ဟားခါး ဖွဲ့စည်းတည်ထောင်သူအဖွဲ့ဝင်တစ်ဦးဖြစ်သည်သာမက အားကိုးအားထားရသော ဗျူဟာမှူးဟောင်း၊ တပ်မဟာမှူးဟောင်း (ပူးတွဲ) အထွေထွေအတွင်းရေးမှူးဟောင်း၊ ဒုတိယဥက္ကဌဟောင်းနှင့် လက်ရှိတပ်သားဘဝဖြင့် အဖွဲ့အစည်းမှာ တာဝန်ထမ်းဆောင်နေသူဖြစ်သည်။
စစ်အာဏာရှင်တော်လှန်ရေးမှာ အရေးပါသော မျိုးဆက်သစ် ခေါင်းဆောင်ကောင်းတစ်ဦးဖြစ်သူ ဆလိုင်းဆန်လိန်အား ဆုံးရှုံးမှုအတွက် ကျန်ရစ်သူ မိသားစုများ၊ ဆွေမျိုး မိတ်သင်္ဂဟများနှင့်အတူ ဝမ်းနည်းကြေကွဲရပါကြောင်း CDF – ဟားခါး ဗဟိုကောင်စီက ထုတ်ပြန်သည်။
ပုံစာ- CDF-Hakha ဒုတိယ ဥက္ကဌဟောင်း ဆလိုင်းဆန်လိန်း
