နှစ်သစ် ၂၀၂၂ ကို မကူးပြောင်းမီ ကရင်ပြည်နယ်အတွင်း PDF အကြမ်းဖက်သောင်းကျန်းသူ ကင်းစင်ရေး KNU ခေါင်းဆောင်ပိုင်းနဲ့ တပ်မတော်သဘောတူညီမှုရသွားပြီဆိုတဲ့သတင်းအမှား တစ်ခုဟာ ဒီဇင်ဘာလ ၂၇ ရက်နေ့က Minn Thet Naing ဆိုတဲ့အကောင့်ပိုင်ရှင်ကနေ ရေးသားလာခဲ့ပါတယ်။
ဒါ့အပြင် “KNU(ဗဟို) နဲ့ KNU တပ်မဟာမှူးတွေရဲ့ ညွန်ကြားချက်တွေကို မလိုက်နာတဲ့ KNU အဖွဲ့ငယ်တွေကိုလည်း ပြင်းထန်စွာခြေမှုန်းဖို့ တပ်မတော်ကို အပ်နှံလိုက်ပြီလို့လည်း ကြားသိရပါတယ်” ဆိုပြီးထပ်မံရေးသားထား တာတွေ့ရပါတယ်။
အဲဒီရေးသားမှုဟာ သတင်းအမှားသာဖြစ်ပါတယ်။ Minn Thet Naing အကောင့်ပိုင်ရှင်ရေးထားသလို PDF အရေးနဲ့ပတ်သက်ပြီး KNU ခေါင်းဆောင်ပိုင်းနဲ့ တပ်မတော်သဘောတူညီမှုရရှိတယ်ဆိုတာ KNU ဘက်က တရားဝင်ထုတ်ပြန်တာမရှိခဲ့လို့ပါပဲ။ ဒါ့အပြင် လေးကေကော်ဒေသမှာ ထိုးစစ်ဆင်တိုက်ခိုက်လာတဲ့ စစ်ကောင်စီတပ်ဖွဲ့ကို KNU နဲ့ PDF တို့က ပူးပေါင်းတိုက်ခိုက်နေကြတာလည်းဖြစ်ပါတယ်။
ဒီဇင်ဘာလ ၂၁ ရက်နေ့ကထုတ်ပြန်တဲ့ KNU ရဲ့ကြေညာချက်ထဲမှာ စစ်ကောင်စီဟာ ဆိုးဝါးပြင်းထန်သော လူသတ်မှုနဲ့ လူ့အခွင့်အရေးချိူးဖောက်မှုများ ဖြစ်ပေါ်စေမည့်လေကြောင်းတိုက်ခိုက်မှုများအား လေးကေကော်ဒေသတွင် အချိန်မရွေး ပြုလုပ်လာနိုင်သည့်အတွက် ကမ႓ာ့ကုလသမဂ္ဂမှ ဦးစီးလျှက် အရေးပေါ်အစည်းဝေးများကျင်းပပြီး လေကြောင်းပျံသန်းမှု ကင်းမဲ့ဇုံအဖြစ် သတ်မှတ်ဖို့၊ စစ်ကောင်စီအနေနဲ့ ကျဆင်းနေတဲ့ ဂုဏ်သိက္ခာကို ပြန်လည်ထိန်းသိမ်းသည့်အနေဖြင့် ၎င်းတို့ရဲ့ တပ်ဖွဲ့ဝင်တွေကိုတိုက်ပွဲဖြစ်ပွားရာဒေသမှ ပြန်ရုပ်သမ်းဖို့၊ စစ်ကောင်စီတပ်အတွင်းရှိ တပ်ဗိုလ်၊ တပ်မှူးများမှလည်း ကျရှုံးနိုင်ငံအဖြစ်သို့ရောက်ရှိနေသော မိမိတို့၏ နိုင်ငံအား ပြန်လည်ကယ်ဆယ်သည့်အနေဖြင့် ပြည်သူလူထုဘက်တွင် ပူးပေါင်းပါဝင်ကြဖို့ ရေးသားဖော်ပြထားပါတယ်။
KNU ကြေညာချက်ကြည့်ရန်………https://www.facebook.com/365915613790768/posts/1591183874597263/
ဒါကြောင့် Minn Thet Naing တင်ထားတဲ့အကြောင်းအရာဟာ သတင်းအမှားသာဖြစ်ပြီး KNU နဲ့ PDF အကြား သဘောထားအမြင်လွဲမှားအောင် ရည်ရွယ်ချက်ရှိရှိနဲ့ ဖြန့်ဝေရေးသားခြင်းသာဖြစ်ပါတယ်။
Minn Thet Naing ရဲ့ သတင်းအမှားကို Like & React ပြုလုပ်သည် ၈၀၀ ကျော်ရှိခဲ့ပြီး မှတ်ချက်ရေးသားသူ ၂၂ ဦး နဲ့ ထပ်ဆင့်ပြန်လည်ဖြန့်ဝေသူ ၆၁ ဦးထိရှိခဲ့ပါတယ်။
နိုင်ငံရေးမတည်ငြိမ်တဲ့ အနေအထားမှာ သတင်းအတုသတင်းအမှားတွေက ဆိုရှယ်မီဒီယာပေါ်မှာ ပျံနှံ့လျက်ရှိပါတယ်။ သတင်းဖတ်သူတွေအနေနဲ့ ယုံကြည်စိတ်ချရတဲ့သတင်းဌာနက သတင်းများကိုသာဖတ်ရှုဖို့ တိုက်တွန်းလိုက်ရပါတယ်။
