(04SS)
ချင်းပြည်နယ် တွန်ဇံမြို့ ပေါ်တွင် ယမန်နေ့ မနက်ပိုင်းက ဖြစ်ပွားခဲ့သော တိုက်ပွဲတွင် အရပ်သားတစ်ဦးသေဆုံးကာ အမျိုးသမီးနှင့် ကလေး ၂ ဦး ထိခိုက်ဒဏ်ရာရရှိခဲ့ကြောင်း သိရသည်။
ယမန်နေ့ မနက်အစောပိုင်း ၄ နာရီခန့်မှစတင်ကာ ချင်းကာကွယ်ရေးပူးပေါင်းတပ်ဖွဲ့နှင့် တွန်ဇံမြို့ ပေါ်က စစ်ကောင်စီတပ်ဖွဲ့တို့အကြား နှစ်ဘက် တိုက်ပွဲဖြစ်ပွါးခဲ့ကြခြင်းဖြစ်သည်။
ထိုသို့ နှစ်ဘက် တိုက်ပွဲအပြီးတွင် ရဲစခန်းအနီး နေထိုင်သူ လင်မယားနှစ်ဦး ဆိုင်ကယ်ဖြင့် ထွက်ပြေးရာမှ ရဲစခန်းဘက်မှ ပစ်ခတ်ခံရသောကြောင့် မွောလ်ပီဇာတိ ဦးမန်ရှန်းကျိန် အသက် ၂၇ နှစ်အား သေနတ်ထိမှန်ကာ အသက်သေဆုံးခဲ့ရပြီး ၎င်း၏ အမျိုးသမီးအား ဝမ်းဗိုက်တွင် ဒါဏ်ရာရရှိကာ ဆေးရုံသို့ ပို့ဆောင်ခဲ့ရကြောင်း သိရသည်။
“ပစ်ခတ်တာ ရပ်သွားပြီလို့ ထင်ပြီး ဆိုင်ကယ်နဲ့ ထွက်ပြေးကြတာ ရဲစခန်းဘက်ကနေ ပစ်ခတ်လို့ ယောကျာ်း ဖြစ်သူက ဆုံးသွားတယ်။ ပြီးတော့ သူ့အမျိုးသမီးက ဝမ်းဗိုက်မှာ ဒါဏ်ရာရလို့ ဆေးရုံပို့တာ ဒါဏ်ရာတော်တော် ပြင်းထန်တယ်လို့ကြားတယ်” ဟု ဒေသခံနှင့် နီးစပ်သူတစ်ဦးက ပြောသည်။
ထို့အပြင် တိုက်ပွဲအတွင်း လက်နက်ကြီးပေါက်ကွဲမှုကြောင့် အသက် ၈ နှစ်အရွယ်နှင့် ၁၂ နှစ်အရွယ်ရှိ ကလေးငယ် ၂ ဦးလည်း လက်နက်ကြီးကျည်စထိမှန်ကာ ဒါဏ်ရာရရှိကြောင်း သိရသည်။
ယမန်နေ့မနက်က ဖြစ်ပွားသော တွန်းဇံမြို့တိုက်ပွဲတွင် CDF-Hualngoram မှ အသက် ၃၀ အရွယ်ရှိ ရဲဘော် Lalramchuana ကျဆုံးပြီး ၃ ဦး ဒါဏ်ရာရရှိကြောင်းနှင့် စစ်ကောင်စီတပ်ဖွဲ့ဘက် သေဆုံးမှုရှိသော်လည်း အတိအကျ မသိရသေးကြောင်း ဒေသအတွင်း သတင်းအရင်းအမြစ်များထံမှ သိရသည်။
