အာဏာသိမ်းစစ်ကောင်စီက ဖမ်းဆီးထားသည့် မင်းတပ်မြို့မှ လူငယ် ၅ ဦးကို ယနေ့မေလ ၁၂ ရက်နေ့ ၁၂ နာရီအချိန်ထိ ပြန်လွှတ်ပေးခြင်းမရှိသည့်အတွက် စစ်ကောင်စီနှင့် အပစ်အခတ်ရပ်စဲမှု ပျက်ပြယ် သွားပြီဟု မင်းတပ်ပြည်သူ့အုပ်ချုပ်ရေး အဖွဲ့ကပြောဆိုလိုက်သည်။
မင်းတပ်မြို့ပြည်သူ့အုပ်ချုပ်ရေးမှ နှင့် စစ်ကောင်စီဘက်မှ တာဝန်ရှိသူတို့သည် ယနေ့နံနက်ပိုင်းက တွေ့ဆုံဆွေးနွေးခဲ့ကြ ပြီး စစ်ကောင်စီဘက်က ပလက်ဝမြို့နယ် ဆမီးမြို့မှ တပ်အင်အား ၂၀၀ ကျော်ပါရှိသော စစ်ကား ၁၇ စီးကို မင်းတပ်မြို့ သို့ဖြတ်သန်းခွင့်ပြုပြီးမှ ဖမ်းဆီးခံရသူများမှ ၄ ဦးကို လွှတ်ပေးမည်ဟု ပြောဆိုသည့်အတွက် သဘောတူညီချက်မရဘဲ ယခင်က သဘောတူထားသည့်အချက်များလည်း အကုန်ပျက်ပြယ်သွားပြီဟု အဆိုပါဆွေးနွေးပွဲတွင်ပါဝင်သူ မင်းတပ်မြို့ ပြည်သူ့အုပ်ချုပ်ရေးအဖွဲ့မှတာဝန်ရှိသူတစ်ဦးက ခိုနူမ်းသုန်သတင်းဌာနကိုပြောသည်။
“ ကျနော်တို့အရင်ပိုင်းက ဆွေးနွေးထားတာက ထောက်ပို့ဆိုပြီး ဆမီးကိုသွားတဲ့ စစ်ကား ၁၃ စီးရှိတယ်လေ အဲဒီ ၁၃ စီးထွက်သွားရင် ဒီ ၅ ယောက်ကိုလွှတ်ပေးမယ်ဆိုပြီး သဘောတူထားတာလေ အဲဒါကိုသူတို့ဆက်စွဲထားပြီး ဘာဆွေးနွေးလာလဲဆိုတော့ ၄ ယောက်ကိုပဲလွှတ်ပေးမယ် တစ်ယောက်ကတော့ လူသတ်မှုဖြစ်တဲ့အတွက်မလွှတ်ပေးနိုင်ဘူးတဲ့ နောက်ပြီး အပေးအယူက ဆမီးကနေ ပြန်လာတဲ့ စစ်သား အယောက် ၂၀၀ ကျော်ပါတဲ့ စစ်ကား ၁၇ စီးကို မင်းတပ်ကိုဖြတ်သွားရမယ်တဲ့ ကျနော်တို့ဘက်ကတော့ ဒီအင်အားနဲ့ ကျနော်တို့မြို့ကို ဖြတ်သွားဖို့က လုံးဝခွင့်မပြုနိုင်ဘူး ဒါကျနော်တို့ကို တမင်တကာ သက်သက်အကြပ်ကိုင်တာဖြစ်တယ်၊ လူ ၄ ယောက်ကို လွှတ်ပေးမယ် စစ်ကား ၁၇ စီး စစ်သားအယောက် ၂၀၀ ဖြတ်သွားမယ်ဆိုတာက အပေးအယူတအားကြီးလွန်းတယ်၊ မဖြစ်နိုင်ဘူး လူအယောက် ၂၀၀ မင်းတပ်မှာတပ်စွဲသွားရင် ဘယ်လိုလုပ်မလဲ ဒါကြောင့် လောလောဆယ်တော့ သူတို့နဲ့ သဘောတူထားတဲ့ အပစ်ရပ်စဲမှုကတော့ ပျက်ပြယ်သွားပြီ’’ ဟု မင်းတပ်မြို့ပြည်သူ့အုပ်ချုပ်ရေးအဖွဲ့မှ တာဝန်ရှိသူကပြောသည်။
ယခုကဲ့သို့ စစ်ကောင်စီနှင့် မင်းတပ်မြို့ပြည်သူ့အုပ်ချုပ်ရေးအဖွဲ့အကြား သဘောတူညီချက်များ ပျက်ပြယ်သွားသည့်အတွက် မင်းတပ်မြို့တွင် အချိန်မရွေး ပစ်ခတ်မှုများပြန်လည်ဖြစ်ပေါ်လာနိုင်ပြီး ပြည်သူများအနေဖြင့် အိမ်တွင်း၌သာနေအိမ်ရန် (၂၇၄ တပ်၊ စုပေါင်းရုံး၊ ရဲစခန်း) စသည့်နေရာများအနီးတွင် သွားလာခြင်း ရှောင်ရှားကြရန် မင်းတပ်မြို့ပြည်သူ့အုပ်ချုပ်ရေးအဖွဲ့က ထုတ်ပြန်ထားကြောင်းသိရသည်။
ချင်းပြည်နယ် မင်းတပ်မြို့တွင် အာဏာသိမ်းစစ်ကောင်စီနှင့် ပြည်သူ့ကာကွယ်ရေးတပ်ဖွဲ့တို့ ဧပြီလ ၂၄ ၊ ၂၆၊ ၂၇ ရက်နေ့တို့တွင် တိုက်ပွဲဖြစ်ပွားခဲ့ပြီး အဆိုပါတိုက်ပွဲတွင် အာဏာသိမ်းစစ်ကောင်စီဘက်မှ အနည်းဆုံးအယောက် (၂၀) ခန့်သေဆုံးမှုရှိခဲ့သည်။ ထို့နောက် စစ်ကောင်စီနှင့် ပြည်သူအုပ်ချုပ်ရေးအဖွဲ့တို့ တွေ့ဆုံဆွေးနွေးကာ ယာယီအပစ်ခတ်ရပ် စဲထားကြခြင်းဖြစ်သည်။
