ချင်းပြည်နယ်၊ ဖလမ်းမြို့တွင် မတ်လ (၅) ရက်နေ့ ည (၉:၀၀) နာရီခန့်က မြို့တွင်းရှိ အိမ်ခြေ (၄) လုံးအား ဓာတ်ဆီဖြင့်မီးရှို့ရန်ကြိုးစားခဲ့သူ ၃ ဦးကို ဖမ်းဆီးထိန်းသိမ်းထားကြောင်း CNDF က ထုတ်ပြန်သည်။
အဆိုပါ (၃) ဦးမှာ CCTV မှတ်တမ်းများနှင့် မျက်မြင်သက်သေများ၏ ပြောကြားချက်များအရ CNO/CNDF မှ လိိိုက်လံစုံစမ်းရာ Biak Ceu Lal, Ceu Lian Hum နှင့် Sang Lian တို့ဖြစ်ကြောင်း ထင်ရှားသည့်အတွက် မတ်လ (၉) ရက်ည၌ Biak Ceu Lal နှင့် Ceu Lian Hum တို့အား မီဇိုရမ်ပြည်နယ်၊ အိုင်ဇောလ်မြို့တွင် ဖမ်းဆီးခဲ့ရပြီး မတ်လ (၁၁) ရက်၌ Sang Lian အား မီဇိုရမ်ပြည်နယ်၊ ဇိုခေါထာရ်ရွာတွင် ဖမ်းဆီးခဲ့ရာ CNDF အချုပ်ခန်းတွင် ထိန်းသိမ်းထားသည်ဟု ဆိုသည်။
၎င်းတို့ ၃ ဦးသည် မတ်လ (၆) ရက်နေ့ နံနက် (၁၀) နာရီခန့်တွင်လည်း ဖလမ်း-ရိဒ်လမ်းမကြီးပေါ်ရှိ လိုင်းမွာလ်ကျေးရွာမရောက်မီ အိမ်တစ်လုံးအား မီးရှို့ဖျက်စီးခဲ့ပါသည်ဟု CNDF က ဆိုသည်။
၂၀၂၂ ခုနှစ်၊ မတ်လ (၆) ရက် ညသန်းခေါင် (၁၁:၃၀) နာရီခန့်တွင် ဖလမ်းမြို့၊ တလန်လိုရပ်ကွက် (လန်ပါး) ရှိ နေအိမ် (၃) လုံး မီးလောင်ကျွမ်းမှုတွင်လည်း ၎င်းတို့ (၃) ဦးအား သံသယတရားခံအဖြစ် ထားရှိပြီး စစ်ဆေးမေးမြန်းလျက်ရှိရာ ဆက်လက်ဖော်ထုတ်သွားမည်ဟု CNDF ထုတ်ပြန်ချက်တွင် ဖော်ပြသည်။
ဖလမ်းမြို့အတွင်း ပြည်သူလူထု၏ အိုးအိမ်ပျက်စီးစေလိုမှုနှင့် ကြောက်ရွံ့တုန်လှုပ်စေသောအမှုအား ပြုလုပ်သည့် ၎င်းတို့ (၃) ဦးအား ပြည်သူလူထု၏ အသက်၊ အိုးအိမ်၊ စည်းစိမ်ကို ကာကွယ်ရန် ဖွဲ့စည်းထားသည့် CNO/CNDF အနေဖြင့် ပြင်းပြင်းထန်ထန် ဒဏ်ခတ်အရေးယူသွားမည်ဖြစ်ကြောင်း သတင်းထုတ်ပြန်ထားသည်။
