ဘင်္ဂလားဒေရှ့်နိုင်ငံမှ ခိုးဝင်လာသော အမျိူးသမီး (၈) ဦး မီဇိုရမ်တွင်ဖမ်းမိ

0

ချင်းပြည်နယ်နှင့် နယ်နိမိတ်ချင်းထိစပ်နေသော မီဇိုရမ်ပြည်နယ်သို့ အထောက်အထားတခုမှမပါပဲ ဘင်္ဂလားဒေရှ့်နိုင်ငံမှ ခိုးဝင်လာသည့် မူစလင်အမျိူးသမီး (၈) ဦးကို မီဇိုရမ်ပြည်နယ် Vairengte ရဲစစ်ဆေးရေးဂိတ်တွင် ဧပြီလ ၂၅ ရက်နေ့က ဖမ်းမိသည်ဟု သိရသည်။

အဆိုပါအမျိူးသမီး (၈) ဦးတို့သည် ဘင်္ဂလားဒေရှ့်နိုင်ငံ Sabulara ဒေသ Kutupalong ဒုက္ခသည်စခန်းတွင်နေထိုင်သည့် ရိုဟင်​ဂျာ မူစလင်​ အမျိုးသမီး ​​များဖြစ်ပြီး ဧပြီလ ၁၉ ရက်နေ့က ဈေးဝယ်ထွက်စဉ် အမည်မသိသူများက ခေါ်ဆောင်ကာ အိန္ဒိယနိုင်ငံ အာသံပြည်နယ် Silchar မြို့သို့ ပို့ဆောင်ခဲ့ကြသည်ဟု ထွက်ဆိုခဲ့ကြောင်း မီဇိုရမ်သတင်းစာတွင်ဖော်ပြထားသည်။

ထို့နောက် Silchar မြို့မှ မီဇိုရမ်ပြည်နယ် အိုင်ဇောလ်မြို့သို့ Somu လိုင်းကားဖြင့် တဆင့်ပြန်လည်ပို့ဆောင်သည့်အချိန် နယ်စပ်မြို့ Vairengte ရဲစစ်ဆေးဂိတ်တွင်အဖမ်းခံရခြင်းဖြစ်သည်ဟု သတင်းစာကဆိုသည်။

၎င်းတို့ကို တင်ဆောင်လာသော Sumo ကားသမား၏ထွက်ဆိုချက်အရ လူတစ်ဦးမှ အဆိုပါအမျိူးသမီး (၈) ဦးကို အိုင်ဇောလ်မြို့အထိ ပို့ဆောင်ရန် ကားဂိတ်သို့လာထားကြောင်း၊ အိုင်ဇောလ်မြို့အထွက်ဘက် Zemabawk ရပ်ကွက် ဓာတ်ဆီဆိုင်တွင် လာရောက်ခေါ်ယူကြမည်ဟု ပြောဆိုသည်ဟု သိရသည်။ ၎င်းတို့သည် မီဇိုရမ်ပြည်နယ် အိုင်ဇောလ်မြို့မှတဆင့် ချင်းပြည်နယ်ကိုဖြတ်သန်းပြီး မြန်မာပြည်မဘက်ကို သွားရောက်မည်ဟု ယူဆကြသည်။

အဆိုပါအမျိူးသမီး (၈) ဦးသည် အသက် (၁၈) နှစ်မှ (၂၂) အကြားရှိကြပြီး မီဇိုရမ်တရားရုံးက ဒဏ်ငွေ ရူပီး (၅၀) စီပေးဆောင်ခိုင်းပြီး ယနေ့တွင် အာသံပြည်နယ် Bagha ကျေးရွာရှိ မူစလင်ခေါင်းဆောင်များထံ ပြန်လည်အပ်နှံကြမည်ဟု သိရသည်။ (Photo – Kolasib Aw)

Share.

About Author

Leave A Reply