(006SV)
ချင်းပြည်နယ်၊ မင်းတပ်မြို့နယ်အတွင်းက စစ်ကောင်စီလက်အောက်ခံ ရုံး၊ဌာနနှင့် တပ်ဖွဲ့များမှ ဝန်ထမ်းများအနေဖြင့် ရက်ပေါင်း ၃၀ အတွင်း အလင်းဝင်ရောက်ရန် မင်းတပ်မြို့နယ်၊ ပြည်သူ့အုပ်ချုပ်ရေးအဖွဲ့မှ ကြေညာလိုက်သည်။
စစ်ကောင်စီလက်အောက်ခံ ရုံး၊ ဌာနနှင့် တပ်ဖွဲ့များတွင် တာဝန်ထမ်းဆောင်နေသည့် Non – CDM ဝန်ထမ်းများအနေဖြင့် လက်ရှိဆောင်ရွက်နေမှုများကို ရပ်တန့်၍ ၂၀၂၄ ဇန်နဝါရီလ ၁ ရက်မှ ၃၁ ရက်အတွင်း အလင်းဝင်ရောက်ကြရန် ဇန်နဝါရီလ ၁ ရက်နေ့တွင် စာဖြင့် ထုတ်ပြန်လာခြင်းဖြစ်သည်။
အလင်းဝင်ရောက်ခြင်းမရှိသည့် Non- CDM ဝန်ထမ်းများကို တည်ဆဲဥပဒေနှင့်အညီ ထိရောက်စွာ အရေးယူအပြစ်ပေးသွားမည်ဖြစ်ကြောင်း မင်းတပ် (ပအဖ) က အသိပေးထုတ်ပြန်သည်။
CDF- မင်းတပ်သည် ချင်းညီနောင်အဖွဲ့ဝင်များနှင့် ပူးပေါင်း၍ စခန်းသိမ်းတိုက်ပွဲများ ပူးပေါင်းဆင်နွှဲသွားရန် အစီအစဉ် ရှိသည်ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့မှ ကိုယောမာန်က ခေါ်နုသုန်းသတင်းဌာကို ယနေ့ အင်တာဗျူးတွင် ဖြေဆိုထားသည်။
၂၀၂၄ ခုနှစ် ဇန်နဝါရီလ ၁ ရက် မင်းတပ်မြို့၊ အရှေ့ပြင်ရပ်ကွက်အနီးက နှစ်သစ်၏ ပထမဆုံးတိုက်ပွဲတွင် စစ်ကောင်စီမှ ဗိုလ်မှူးတစ်ဦးကို စနိုက်ဘာဖြင့် ထိမှန်အောင် ပစ်ချနိုင်ခဲ့သည်ဟု CDF မင်းတပ်က ယနေ့မှာ သတင်းထုတ်ပြန်သည်။
တိုက်ပွဲနှင့်လက်ရှိစစ်ရေးအခြေအနေဖြင့် ပတ်သက်၍ မေးမြန်းရန် CDF- မင်းတပ်သို့ ဆက်သွယ်ခဲ့သော်လည်း ဆက်သွယ်၍ မရခဲ့ပါ။
ထိုတိုက်ပွဲအပြီးတွင် စစ်ကောင်စီမှ အရပ်သားနေအိမ် ၂ လုံးကို မီးရှို့ဖျက်စီးခဲ့ပြီး တိုက်နယ် ၄ ဖက်သို့လည်း လက်နက်ကြီးများ ရမ်းသမ်းပစ်ခတ်ခဲ့ရာ ပြည်သူ့ ၃ ဦး ဒဏ်ရာပြင်းထန်စွာ ရရှိခဲ့သည်ဟု သိရသည်။
ဇန်နဝါရီလ ၂ ရက်ကလည်း တိုက်နယ် ၄ ဘက်သို့ လက်နက်ကြီးများဖြင့် ထပ်မံ ပစ်ခတ်ခဲ့ရာ အရပ်သားနေအိမ် ၃ လုံး ထပ်မံ ပျက်စီးခဲ့သည်ဟု သိရသည်။
ချေမှုန်းရေး ရိုင်ဖယ်သေနတ် အလက် ၅၀ အပါအဝင် လက်နက်ခဲယမ်းများ ဝင်ယူနိုင်ရေးအတွက် အမေရိကန်ဒေါ်လာ တစ်သိန်းအထိ ရရှိရန် ရည်မှန်းထားသည့် Project Mindat 2024 ရန်ပုံငွေ ကမ်ပိန်းကိုလည်း CDF – မင်းတပ်မှ လက်ရှိတွင် ဖော်ဆောင်နေပြီး ပြည်တွင်း/ပြည်ပ ပြည်သူများ ပါဝင်အားဖြည့်နိုင်ကြောင်း သတင်းထုတ်ပြန်ထားသည်။
