(006SV)
ချင်းပြည်နယ် မင်းတပ်မြို့နယ်၏ စည်းလုံးမှုပျက်ပြားစေရန် တိုက်ရိုက်သော်လည်းကောင်း၊ သွယ်၀ိုက်နည်းဖြင့်သော်လည်းကောင်း ရည်ရွယ်ချက်ရှိရှိ ကြိုးပမ်းဆောင်ရွက်သည့် လူပုဂ္ဂိုလ်နှင့် အဖွဲ့အစည်းများကို အရေးယူမည်ဟု ချင်းအမျိုးသားကောင်စီ (မင်းတပ်) က ယနေ့ထုတ်ပြန်လိုက်သည်။
တော်လှန်ရေးကာလအတွင်း စည်းလုံးညီညွတ်သည့် မင်းတပ်မြို့နယ်အတွင်းရှိ တော်လှန်ရေး အင်အားစုများနှင့် ပြည်သူလူထုကို စိတ်ဝမ်းကွဲပြားအောင် စည်းလုံးညီညွတ်မှု ပျက်ပြားစေရန် ရည်ရွယ်ချက်ရှိရှိ ကြိုးပမ်းဆောင်ရွက်နေသည့် ပုဂ္ဂိုလ်/အဖွဲ့အစည်းများ ရှိလာကြောင်း စိစစ်တွေ့ရှိရပြီး မည်သည့် ကောင်စီ၊ အုပ်ချုပ်ရေး၊ လက်နက်ကိုင်အဖွဲ့အစည်းများကိုမျှ အသိအမှတ်ပြုမည်မဟုတ်ဘဲ ဖွဲ့စည်းလာပါက အရေးယူဆောင်ရွက်သွားမည်ဖြစ်ကြောင်း ချင်းအမျိုးသားကောင်စီ (မင်းတပ်) က ယနေ့ ဇန်နဝါရီလ ၂၉ ရက်မှာ သတင်းထုတ်ပြန်သည်။
မင်းတပ်မြို့နယ်ထဲမှ တိုက်နယ် (၄) နှင့် တိုက်နယ် (၁၁) နှစ်ခုသည် မင်းတပ်ဒေသ (၁) ကောင်စီအဖြစ် ဖွဲ့စည်း၍ ချင်းလဲန်း ကောင်စီတွင် အပြည့်အဝ ပူးပေါင်းပါဝင်ပြီဖြစ်ကြောင်း သတင်းထွက်ပေါ်လာပြီးနောက် ချင်းအမျိုးသားကောင်စီ (မင်းတပ်) က ယခုကဲ့သို့ ကြေညာချက်ထုတ်ပြန်လာခြင်းဖြစ်သည်။
ယင်းသို့ ဖွဲ့စည်းလာပါက ချင်းအမျိုးသားကောင်စီ (မင်းတပ်) ၏ စည်းမျဉ်း/ ဥပဒေ၊ ကြားကာလ မင်းတပ်မြို့နယ် ပြည်သူ့အုပ်ချုပ်ရေး ဥပဒေ၊ ချင်းကာကွယ်ရေးတပ်ဖွဲ့ (မင်းတပ်) ၏ စစ်စည်းကမ်းဥပဒေများနှင့်အညီ အရေးယူဆောင်ရွက်သွားမည်ဟု ဆိုသည်။
ချင်းပြည်နယ်၊ မင်းတပ်မြို့နယ်တွင် မြို့နယ်ပြည်သူ့အုပ်ချုပ်ရေးအဖွဲ့နှင့် CDF မင်းတပ်ကို နိုင်ငံရေးဦးဆောင်မှုပေးမည့် ချင်းအမျိုးသားကောင်စီ (မင်းတပ်) ကို ပြည်တွင်း/ပြည်ပရှိ တော်လှန်ရေးညီအစ်ကိုများထံ အကြံပြုချက်များရယူပြီး မြို့နယ်ပြည်သူ့အုပ်ချုပ်ရေးအဖွဲ့ ညီလာခံအစည်းအဝေး၊ မြို့နယ်ပြည်သူ့အုပ်ချုပ်ရေးအဖွဲ့၊ စီမံခန့်ခွဲရေးကော်မတီဝင်များနှင့် CDF – မင်းတပ်၊ ဗဟိုကော်မတီဝင်များ တွေ့ဆုံညှိနှိုင်းပြီး ၂၀၂၃ ဩဂုတ်လ ၆ ရက်က ဖွဲ့စည်းခဲ့ကြသည်။
ယခုလက်ရှိ ချင်းနိုင်ငံရေးအခင်းအကျင်းတွင် ချင်းအမျိုးသားကောင်စီ (မင်းတပ်)/CDF-Mindat သည် ချင်းလဲန်းကောင်စီတွင် ပါ၀င်ခြင်းမရှိဘဲ ချင်းအမျိုးသားအဖွဲ့ချုပ် (CNO/CNDF)၊ ဇိုမီးဖက်ဒရယ်ယူနီယံ(ZFU/PDF-Zoland) နှင့်အတူ ချင်းညီနောင်သုံးဖွဲ့စည်းကာ ကြား ကာလချင်းအမျိုးသားအတိုင်ပင်ခံကောင်စီ ICNCC နှင့်ပူးပေါင်းဆောင်ရွက်လျှက်ကြသည်။
ထိုကဲ့သို့အခြေအနေမျိုးတွင် မင်းတပ်မြို့နယ်ထဲမှ တိုက်နယ် (၄) နှင့် တိုက်နယ် (၁၁) သည် မင်းတပ်ဒေသ (၁) ကောင်စီအဖြစ် ဖွဲ့စည်း၍ ချင်းလဲန်းကောင်စီ – CC ၏ အစိုးရဖွဲ့စည်းမှုတွင် ဒေသအစုအဖွဲ့တစ်ခုအနေဖြင့် အပြည့်အဝ ပူးပေါင်းပါဝင်ပြီဖြစ်ကြောင်း ထုတ်ပြန်လာခဲ့ခြင်းဖြစ်သည်။
မင်းတပ်ဒေသ (၁) ကောင်စီကလည်း ၎င်းတို့နယ်မြေအတွင်းတွင် နိုင်ငံရေး၊ အုပ်ချုပ်ရေး၊ ကာကွယ်ရေး၊ တရားစီရင်ရေး၊ လုံခြုံရေး၊ လူမူဖွံဖြိုးရေး၊ သဘာဝပတ်ဝန်းကျင် ထိန်းသိမ်းရေး စသည့် ကိစ္စအရပ်ရပ်ကို တော်လှန်ရေးကာလအလွန် ဖက်ဒရယ်ဒီမိုကရေစီအစိုးရ ပီပြင်စွာ ပေါ်ပေါက်သည်အထိ မင်းတပ်ဒေသ (၁) ကောင်စီက ရိုးရာဓလေ့ထုံးတမ်းစဉ်လာဥပဒေနှင့်အညီ ဦးဆောင်စီမံခန့်ခွဲမှု လုပ်ငန်းများ ဆောင်ရွက်သွားမည်ဟု ဆိုထားသည်။
