(006SV)
အိန္ဒိယနိုင်ငံ၊ မဏိပူရ်ပြည်နယ်အတွင်း ထိန်းသိမ်းခံထားရသည့် မြန်မာနိုင်ငံသား အမျိုးသမီး ၃၈ ဦးကို ပထမသုတ်အနေဖြင့် နေရပ်ပြန်ပို့လိုက်ပြီးဖြစ်ကြောင်း ပြည်နယ်ဝန်ကြီးချုပ် ဘီရန်ဆင်းက ပြောသည်။
မေလ ၂ ရက်က မဏိပူရ်ပြည်နယ်အတွင်း တရားမဝင် ဝင်ရောက်လာသူများထဲက ၃၈ ဦးကို အဆင့်အတန်းခွဲခြားမှုမရှိဘဲ မိုးရေးမြို့မှတဆင့် စစ်ကောင်စီအစိုးရနှင့် ပူးပေါင်း၍ ပြန်ပို့လိုက်ကြောင်း ဘီရန်ဆင်းက ၎င်း၏ X ဆိုရှယ်မီဒီယာမှ ပြောသည်။
မဏိပူရ်ပြည်နယ်တွင် သတ်မှတ်ပြစ်ဒဏ်များ ကျခံ၍ ပြန်လည် လွတ်မြောက်လာပြီး မြန်မာနိုင်ငံသား ဖြစ်ကြောင်း စိစစ်ပြီးသူ ၇၇ ဦးထဲက အိန္ဒိယနိုင်ငံ၊ မိုးရေးမြို့ကို ရောက်ရှိနေသည့် ၃၈ ဦးကို ပထမသုတ်အဖြစ် တမူးမြို့ နယ်စပ်မှတစ်ဆင့် ပြန်လည်ပို့ဆောင်ခဲ့ခြင်းဖြစ်သည်။
“၃၈ ဦးအပါအဝင် ၇၇ ဦးကို တစ်သုတ်ထဲနဲ့ ပြန်လွတ်ဖို့ ပြင်ဆင်ခဲ့တယ်။ ဒါပေမဲ့ အဲ ၃၈ ဦးက နယ်စပ်အထိ ရောက်ပြီး သာဆိုတော့ တစ်ခါထဲနဲ့ လွှဲလိုက်တဲ့ သဘော။ ဒီအခြေအနေအရဆိုရင် သူတို့နဲ့ အသုတ်တူတဲ့ ယောကျာ်းလေး ၃၉ ဦး ရှိတယ်။ တခြားသူတွေလည်း ဒီ့အတိုင်းဆက်လက် လွဲနိုင်ခြေရှိတယ်” ဟု India For Myanmar တည်ထောင်သူ ဆလိုင်းဒိုခါရ်က ပြောသည်။
မဏိပူရ်ပြည်နယ်တွင် ဖမ်းဆီးထောင်ချခံခဲ့ရသည့် မြန်မာနိုင်ငံသား ၂၃၆ ဦး ရှိပြီး ယင်းအထဲမှ အမျိုးသမီး ၃၈ ဦးကို ပထမအကြိမ်အဖြစ် စတင်ပြန်လည်ပို့ဆောင်ခြင်းဖြစ်သည်။
အိန္ဒိယအစိုးရအနေဖြင့် ဖမ်းဆီးထိန်းသိမ်းထားသော မြန်မာနိုင်ငံသားစစ်ဘေးရှောင်များကို စစ်ကောင်စီလက်ထဲ လွှဲပြောင်းပေးခြင်း မပြုလုပ်ရန် ချင်းအရပ်ဖက်အဖွဲ့အစည်းများက အကြိမ်ကြိမ်တောင်းဆိုခဲ့သည်။
၂၀၂၁ စစ်အာဏာသိမ်းပြီးနောက် စစ်ဘေးရှောင်လာရသော မြန်မာနိုင်ငံသားများ ကို မဏိပူရ်ပြည်နယ်အတွင်း နေထိုင်ခွင့်မပြုလိုပါက မီဇိုရမ်ပြည်နယ်နှင့် နယူဒေလီ၊ UNHCR- India ထံတွင် ခိုလှုံခွင့်ရရှိရန် သို့မဟုတ် စစ်ရှောင်များ ကိုယ်ပိုင်အစီအစဉ်ဖြင့် သွားနိုင်ရန် ကူညီပေးသင့်ပါကြောင်း၊ မြန်မာနိုင်ငံသို့ ပြန်လည်ပို့ဆောင်ပါကလည်း အဖမ်းခံရသူများ၏ အသက်လုံခြုံရေးကို ထိခိုက်စေနိုင်ပါကြောင်း India For Myanmar က တောင်းဆိုထားသည်။
စစ်အာဏာသိမ်းပြီးနောက် ချင်း၊ စစ်ကိုင်းဘက်မှ သောင်းနှင့်ချီသည့် စစ်ဘေးရှောင် ပြည်သူများသည် နယ်စပ်ကိုဖြတ်ကျော်၍ အိန္ဒိယထဲတွင် စစ်ဘေးရှောင်နေရကြောင်း သိရသည်။
ထို့ကြောင့် အိန္ဒိယ-မြန်မာ နယ်စပ်တစ်လျှောက် ခြံစည်းရိုးခတ်ပြီး လွတ်လပ်စွာလှုပ်ရှားသွားလာမှုစနစ် (FMR) အား ဖျက်သိမ်းမည်ဟု အိန္ဒိယအစိုးရက ပြောဆိုထားသည်။
