အိန္ဒိယ-မြန်မာနယ်စပ် ဇိုးခေါထားကျေးရွာကို အသွားလာကန့်သတ်နယ်မြေအဖြစ် သတ်မှတ်

0

ရစ်ချက် – ချင်းပြည်နယ်နဲ့ထိစပ်နေသည့် မီဇိုရမ်ပြည်နယ် Zokhawthar (ဇိုးခေါထား) ကျေးရွာတွင် ကိုဗစ်-၁၉ ရောဂါပိုး ကူးစက်မှု မြင့်တက်လာသောကြောင့် မေလ ၅ ရက်နေ့ကစပြီး Containment Area (ထိန်းချုပ်ကန့်သတ်နယ်မြေ)အဖြစ် သတ်မှတ်ထားလိုက် ကြောင်း သိရသည်။

ဇိုးခေါထားကျေးရွာအတွင်းရှိ ကိုဗစ်-၁၉ ရောဂါပိုး ကူးစက်မှုအခြေအနေကို သေသေချာချာ လိုက်လံစစ်ဆေးဖို့ လိုအပ်သောကြောင့် ယခုလို သတ်မှတ်ထားခြင်းဖြစ်ကြောင်း ဒေသခံတစ်ဦးက ယခုလို ပြောသည်။

“မေလ ၅ ရက်နေ့က ဇိုးခေါထားရွာမှာ ပိုးတွေ့လူနာသစ် ၅ ဦး တွေ့တယ်။ လက်ရှိအခြေနေမှာ အိမ်ထောင်စု ၁၇ စု လောက် Home Quarantine လုပ်ထားရတယ်။ Containment Area အဖြစ် သတ်မှတ်ထားတော့ ဘယ်မှ သွားမရ တော့ဘူး။” လို့ ပြောသည်။

ဇိုးခေါထားကျေးရွာသည် အိန္ဒိယ-မြန်မာနယ်စပ်ဒေသ မီဇိုရမ်ပြည်နယ်တွင် တည်ရှိသောကျေးရွာဖြစ်သည်။ အိန္ဒိယ-မြန်မာနယ်စပ်ရှိ အဓိကအချက်ကျသော စီပွားရေးလမ်းကြောင်းတစ်ခုဖြစ်ပြီး လက်ရှိအခြေအနေတွင် ဇိုခေါထား ကျေးရွာကို ဖြတ်ကျော်ပြီး မီဇိုရမ်ပြည်နယ်အတွင်း မြန်မာစစ်ဘေးရှောင်များ အဓိက ဝင်ရောက်နေသော ကျေးရွာ လည်း ဖြစ်သည်။

မီဇိုရမ်ပြည်နယ်အတွင်း ကိုဗစ်-၁၉ ရောဂါပိုး စတင်တွေ့ရှိသည့်အချိန်ကစပြီး မီဇိုရမ်ပြည်နယ် ကျန်ဖိုင်းခရိုင် ဇိုးခေါထားကျေးရွာတွင် ကိုဗစ်-၁၉ ရောဂါပိုး ကူးစက်ခံထားရသူ ၂၄ ဦးရှိပြီဖြစ်ကြောင်းနှင့် အဆိုပါ ၂၄ ဦးအနက် ၂ ဦးမှာ မီဇိုရမ်ပြည်နယ်ကို ထွက်ပြေးတိမ်းရှောင်လာသော မြန်မာစစ်ဘေးရှောင်ထဲက ဖြစ်ကြောင်း သိရသည်။

မီဇိုရမ်ပြည်နယ်တွင် လက်ရှိ မေလ ၅ ရက်နေ့အထိ ကိုဗစ်-၁၉ ရောဂါပိုးကူးစက်ခံထားရသူ ၆၉၆၄ ဦးရှိသည့်အနက် ၅၃၅၁ ဦး ပျောက်ကင်းသွားပြီဖြစ်သည်။ လက်ရှိတွင် ကုသဆဲလူနာ ၁၅၉၆ ဦးရှိပြီး ကိုဗစ်-၁၉ ရောဂါကြောင့် ၁၇ ဦး သေဆုံးပြီဖြစ်သည်။

Share.

About Author

Leave A Reply