“ဒေသစည်ပင်သာယာရေး ဥပဒေ (၂၀၂၅)” ကို ပြဌာန်းပြီဟု လောက်တူပြည်သူ့ရေးရာကောင်စီ ကြေညာ
(006SV)
ပထမအကြိမ်မြောက် ကမ္ဘာလုံးဆိုင်ရာ လောက်တူညီလာခံ ခေါ်ယူကျင်းပနိုင်ရေးအပါအဝင် ကဏ္ဍအသီးသီးက မူဝါဒနှင့် ရှေ့ဆက်လုပ်ငန်းစဉ် ဆုံးဖြတ်ချက်ပေါင်း ၃၆ ချက်ကို လောက်တူပြည်သူ့ရေးရာကောင်စီက ချမှတ်အတည် ပြုခဲ့သည်ဟု သိရသည်။
ကမ္ဘာလုံးဆိုင်ရာ လောက်တူညီလာခံ ခေါ်ယူကျင်းပနိုင်ရေး လုပ်ငန်းစဉ်များ ချမှတ်ခြင်း၊ ကဏ္ဍအသီးသီး၏ အရေးကြီးသော မူဝါဒ အပါအဝင် ရှေ့ဆက်လုပ်ငန်းစဉ်များနှင့် အထွေထွေမှတ်တမ်း စုစုပေါင်း ၃၆ ချက်ကို ဆုံးဖြတ်အတည်ပြုသည် လောက်တူပြည်သူ့ ရေးရာ ကောင်စီ ကိုယ်စားလှယ် Salai Pa Bi က ပြောသည်။
“ပထမအကြိမ်မြောက် ကမ္ဘာလုံးဆိုင်ရာ လောက်တူညီလာခံကို ဒီနှစ်ထဲ ကျင်းပသွားဖို့ ရှိပါတယ်။ တော်လှန်ရေး ကာလမှာ စနစ်တကျပေါ့၊ ကျနော်တို့ရဲ့ စုဖွဲ့မှုသော်လည်းကောင်း၊ နိုင်ငံရေးကိစ္စ၊ ပြီးတော့ တခြားသော တော်လှန်ရေးဆိုင်ရာနဲ့ ပတ်သက်တဲ့၊ လောက်တူနဲ့ ပတ်သက်တဲ့ မူဝါဒ၊ ဆုံးဖြတ်ချက်တွေ ချမှတ်ဖို့ဖြစ်တဲ့အတွက် ကမ္ဘာလုံးဆိုင်ရာ လောက်တူညီလာခံက အရမ်းအရေး ပါပါတယ်” ဟု Salai Pi Bi က ပြောသည်။
ဆုံးဖြတ်ချက် ၃၆ ချက်ထဲတွင် အုပ်ချုပ်ရေးပိုင်းဆိုင်ရာ ကိစ္စများ၊ ဒေသအဆင့်နှင့် လုပ်ဆောင်ရသော လုပ်ငန်းများ၊ တော်လှန်ရေး နှင့် ဆိုင်သော ဆုံးဖြတ်ချက်များလည်း ပါဝင်သည်ဟု သိရသည်။
ဒုတိယအကြိမ် လောက်တူပြည်သူ့ရေးရာကောင်စီ၏ ဒုတိယအကြိမ်မြောက် ပုံမှန်အစည်းအဝေးကို ဇွန်လ ၅ ရက်မှ ၇ ရက်အထိ လောက်တူဒေသလွတ်မြောက် တစ်နေရာမှာ ကျင်းပသည်ဟု သိရသည်။
ကောင်စီကိုယ်စားလှယ် ၅၇ ဦး၊ လေ့လာသူ ၇ ဦး၊ ဌာနဆိုင်ရာတာဝန်ရှိသူသူများနှင့် ကောင်စီမှ ဖွဲ့စည်းထားသော ကော်မတီဝင်များ စသဖြင့် စုစုပေါင်း ၈၀ ဦး တက်ရောက်သည်ဟု သိရသည်။
Global Hnariang မှ ကနဦးရေးဆွဲကာ ကောင်စီသို့ ပေးပို့ပြီး ကောင်စီဥပဒေကြမ်းကော်မတီက စိစစ်တည်း ဖြတ်ပြီးနောက် ဇွန်လ ၇ ရက်က ကောင်စီအစည်းအဝေးတွင် “ဒေသစည်ပင်သာယာရေး ဥပဒေ (၂၀၂၅)”ကို ဒေသကောင်စီက အတည်ပြုပြဌာန်းသည်ဟု လောက်တူပြည်သူ့ရေးရာကောင်စီက ဇွန်လ ၉ ရက်မှာ ကြေညာသည်။
“ဒီဥပဒေပြဌာန်းရတာက တော်လှန်ရေးကာလဆိုပေမယ့် ပြည်သူတရပ်လုံးရဲ့ ဖွံ့ဖြိုးတိုးတက်မှုကလည်း အရေးကြီးပါတယ်။ ဒီဥပဒေက ကျနော်တို့ လောက်တူဒေသကို စနစ်တကျ ဖွံ့ဖြိုးတိုးတက်စေဖို့ ရေးဆွဲရ တာဖြစ်ပါတယ်။ ဒီဥပဒေကနေ ရှေ့ဆက်ပြီး ဥပဒေ ပြဌာန်းချက်တွေဖြစ်တဲ့ ဥပမာအားဖြင့် ဒေသအဆင့် စည်ပင်သာယာရေးကော်မတီ ဆိုတာမျိုး၊ မြို့အဆင့်၊ ကျေးရွာအဆင့် စည်ပင်သာယာရေးကော်မတီဆိုတာမျိုး ကျနော်တို့ ဖွဲ့စည်းသွားဖို့ ရှိပါတယ်။ အဲဒီကော်မတီကနေ ဒေသဖွံ့ဖြိုးတိုးတက်ရေးအတွက် စနစ်တကျ ဆောင်ရွက်သွားမှာဖြစ်ပါတယ်” ဟု Salai Pi Bi က ပြောသည်။
ဒေသစည်ပင်သာယာရေးဥပဒေကို ကောင်စီအစည်းအဝေးတွင် ၁၅ နာရီကြာ ဆွေးနွေးခဲ့ကြပြီး လောက်တူ အက်ဥပဒေ ပုဒ်မ ၂၂ အရ လောက်တူပြည်သူ့ရေးရာကောင်စီ ဥပဒေအမှတ် (၁/၂၀၂၅) အဖြစ် ပြဌာန်းခြင်းဖြစ်သည်ဟု CDF – Lautu ၏ လက်ထောက်အထွေထွေအတွင်းရေးမှူးလည်းဖြစ်သူ Salai Pi Bi က ပြောသည်။
ယခင်က ဟားခါးမြို့နယ်၊ ထန်တလန်မြို့နယ်နှင့် မတူပီမြိုန့ယ်ကြားတွင် တည်ရှိသော လောက်တူဒေသကို လောက်တူ အက်ဥပဒေပါပြဌာန်းချက်များနှင့်အညီ ကိုယ်ပိုင်စီမံအုပ်ချုပ်ခွင့်ရှိသော အုပ်ချုပ်ရေးစနစ် ပီပြင်စွာ အကောင်အထည် ဖော်ဆောင်ရွက်မည်ဟု လောက်တူပြည်သူ့ရေးရာကောင်စီထံမှ သိရသည်။
ယင်းအပြင် စာပေနှင့် ယဉ်ကျေးမှု ထုံးတမ်းများ မြှင့်တင်ထိန်းသိမ်းရေး လောက်တူမျိုးနွယ်စုအခွင့်အရေးများ အပြည့်အဝ ရရှိရေးနှင့် ကာကွယ်စောင့်ရှောက်ရေး၊ တော်လှန်ရေးလုပ်ငန်းစဉ်များတွင် တစ်မျိုးသားလုံး စည်းလုံးညီညွတ်စွာ ချီတက်နိုင်ရေး ဆောင်ရွက်သွားမည်ဟု သိရသည်။
ချင်းအမျိုးသားစည်းလုံးညီညွတ်ရေးကို အခြေခံ၍ မိမိတို့ လူမျိုးရေးရာဆိုင်ရာ နိုင်ငံရေး လုပ်ငန်းစဉ်များနှင့် တော်လှန်ရေး လုပ်ငန်းစဉ်များကို ဆက်လက်ဆောင်ရွက်သွားမည်ဟု လောက်တူပြည်သူ့ရေးရာ ကောင်စီက ထုတ်ပြန်သည်။
