(005MK)
အိန္ဒိယနိုင်ငံ မဏိပူရ်ပြည်နယ် အင်ဖားမြို့အကျဉ်းထောင်ထဲ ဖမ်းဆီးချုပ်နှောင်ခြင်းခံရသော မြန်မာနိုင်ငံသား ၂၈ ဦးသည် ဇွန်လ ၁၆ ရက်နေ့ကစ၍ အစာငတ်ခံ ဆန္ဒပြနေကြသည်ဟု သိရသည်။
“အဓိကသူတို့တောင်းဆိုချက်ကတော့ သူတို့လွတ်မြောက်ဖို့ပါ၊ ဘယ်ကိုပို့ပါ ဘယ်ကိုမပို့ပါနဲ့ဆိုတာမျိုးထက် ထောင်ထဲ ကနေ လွတ်မြောက်ဖို့ ထောင်အာဏာပိုင်တွေကိုတောင်းဆိုတာဖြစ်တယ်၊ မြန်မာနိုင်ငံကိုပြန်မပို့ဖို့တောင်းဆိုတာမျိုးလဲ မဟုတ်ဘူး လွတ်မြောက်ဖို့တောင်းဆိုတာပါ” ဟု ဆန္ဒပြရာမှာ ပါဝင်သူတစ်ဦး၏ ဆွေမျိုးကပြောသည်။
ယခုလက်ရှိ အင်ဖားမြို့အကျဉ်းထောင်ထဲတွင် မြန်မာနိုင်ငံသား ၁၅၀ ကျော်ခန့်ဖမ်းဆီးချုပ်နှောင်ခံထားရဆဲဖြစ်ပြီး ဧည့်တွေ့ခွင့်မရှိသည့်အပြင်၊ အစားအသောက်နှင့် သောက်သုံးရေ အဆင်မပြေမှုကြောင့် ကျန်းမာရေးထိခိုက်လာသူများလည်းရှိသည်ဟု သိရသည်။
ထို့အပြင် အကျဉ်းသားများထဲတွင် သက်ဆိုင်ရာပြစ်ဒဏ်၊ ငွေဒဏ် များကျခံပြီး လွတ်ရက်စေ့သူများရှိနေသော်လည်း မဏိပူရ်အာဏာပိုင်များက လွှတ်ပေးခြင်းမရှိဘဲ ဆက်လက်ဖမ်းဆီးထားဆဲဖြစ်သည်ဟု သိရသည်။
မြန်မာအကျဉ်းသားများထဲတွင် အိန္ဒိယ မြန်မာသံရုံးနှင့်ချိတ်ဆက်ကာ မဏိပူရ်အစိုးရ၏ အစီစဉ်နှင့် နေရပ်ပြန်လိုသူများ နှင့် နေရပ်ပြန်ပို့မခံလိုသူများဟူ၍ အစုအဖွဲ့ ၂ ဖွဲ့ရှိနေပြီး ယခု အစာငတ်ခံဆန္ဒဖော်ပြကြသည့် ၂၈ ဦးဟာ ကြားနေများဖြစ်ကြသည်ဟု သိရသည်။
“ဒီ ၂၈ ယောက်ကကျတော့ ထောင်အာဏာပိုင်တွေနဲ့တွေ့မယ် သူတို့လွတ်မြောက်ဖို့အရေးကို တောင်းဆိုမယ် ထောင်အာဏာပိုင်တွေဘက်ကနေ ဘယ်လိုတုံ့ပြန်ချက်တွေပြန်လာမလဲ အဲဒီတုံ့ပြန်ချက်အရ သူတို့က ဆုံးဖြတ်ချက် ချမယ် လို့ပြောတယ် ထောင်အာဏာပိုင်နဲ့တွေ့လို့ နောက်ဆုံးနည်းလမ်းက အစိုးရချင်းလွှဲအပ်မယ်ဆိုရင်တော့ လုပ်ချင်တဲ့ သူကလုပ် မလုပ်ချင်တဲ့သူကမလုပ်နဲ့ အဲလိုသဘောပါ” ဟု ဆန္ဒပြရာမှာ ပါဝင်သူ၏ ဆွေမျိုးကပြောသည်။
ပြီးခဲ့သည့် မေလ နှင့် ဇွန်လဆန်းပိုင်းက အင်ဖားမြို့အကျဉ်းထောင်ထဲမှ မြန်မာနိုင်ငံသား ၇၇ ဦးကို မဏိပူရ်အစိုးရအစီစဉ်ဖြင့် တမူး-မိုးရေ နယ်စပ်ကတဆင့် နေရပ်ပြန်ပို့ခဲ့ပြီးဖြစ်သည်။
ယခုလက်ရှိမှာလည်း မဏိပူရ်အစိုးရက မြန်မာအကျဉ်းသားများ နေရပ်ပြန်ပို့ရန် ထပ်မံစီစဉ်နေကြောင်း သိရသည်။
အင်ဖာအကျဉ်းထောင်ထဲတွင် မြန်မာနိုင်ငံက အမျိုးသား ၉၉ ဦး၊ အမျိုးသမီးနှင့် ကလေးငယ် ၆၀ ဦး ထိန်းသိမ်းခံထားရဆဲပြီး စာရွက်စာတမ်း အတုပြုလုပ်မှု၊ စစ်ဘေးရှောင်များနှင့် တရားမဝင်နေထိုင်မှု စသည့်အကြောင်းပြချက်ဖြင့် ထိန်းသိမ်းခံရသူများဖြစ်ကြကြောင်း သိရသည်။
