(006SV)
ချင်းပြည်တောင်ပိုင်း မတူပီမြို့ စစ်ဆင်ရေးတွင် ချင်းလဲန်းကောင်စီတပ်ဖွဲ့များနှင့် ချင်းညီနောင်ပူးပေါင်းတပ်ဖွဲ့တို့ကြား တိုက်ပွဲများ ဆက်လက်ဖြစ်ပွားနေပြီး ချင်းတော်လှန်ရေးတပ်ဖွဲ့ နှစ်ဖက်လုံးမှာ ထိခိုက်သေဆုံးမှုများ ရှိနေကြောင်း သတင်းရရှိသည်။
ချင်းတော်လှန်ရေးနှစ်ဖွဲ့အကြားတွင် ဇွန်လ ၁၈ ရက်မနက်ပိုင်းမှ ဇွန်လ ၂၀ ရက်အထိ တိုက်ပွဲများ ၃ ရက်ကြာအထိ ဖြစ်ပွားနေခဲ့ပြီး တိုက်ပွဲအကြိမ်ရေ အများအပြားရှိခဲ့ကြောင်း CDF – မတူပီ၊ တပ်မဟာ – ၁ မှ ပြောရေးဆိုခွင့်ရှိသူ ကိုဘွေအုပ်က ပြောသည်။
“တိုက်ပွဲက တောက်လျှောက်ဖြစ်နေပါတယ်။ တဖက်နဲ့ တဖက် ကျနော်တို့က တိုက်နေမယ်ဆိုရင် စစ်ကောင်စီကို သိမ်းဖို့က တော်တော်လေး ခဲယဉ်းဖို့ ဖြစ်နေပါတယ်။ တပ်မဟာ – ၂ က ထုတ်ပြန်တာမှာလည်း လမ်းတွေ ပိတ်မယ်ဆိုတာတွေ ပါလာတော့ လိုအပ်တဲ့ လက်နက်ခဲယမ်း၊ စားနပ်ရိက္ခာနဲ့ ဆေးဝါးသယ်ယူမှု အပိုင်းတွေမှာနောက်ကျမှု အများကြီး နောက်ကျမှု ရှိပါမယ်။ အချင်းချင်းကြား ပြသနာ ဆက်ဖြစ်မယ်ဆိုရင် ကျနော်တို့ ချင်းညီနောင်ရဲ့ သီးသန့် တာဂစ်ပေါ့နော်။ စစ်ကောင်စီ ပြုတ်ကျရေး ရည်းမှန်းချက် အတော်လေး အခက်အခဲရှိမယ်။ အတော်လေး လူလည်ပေးဆပ်ရမယ်” ဟု ၎င်းက ပြောသည်။
ချင်းတော်လှန်ရေးတပ်ဖွဲ့များဖြစ်သည့် ချင်းလဲန်းကောင်စီတပ်ဖွဲ့များနှင့် ချင်းညီနောင်ပူးပေါင်းတပ်တို့၏ မတူပီမြို့မှာ အချင်းချင်း တိုက်ခိုက်မှုများကြောင့် ဇွန်လ ၂၀ ရက်က ချင်းအမျိုးသားတပ်ဦး CNA မှ ဒုတိယ ဗိုလ်မှူးကြီး လာလ်ဘိခ့် (Lt.Col Lal Bik) ကျဆုံးသွားခဲ့ကြောင်း သိရသည်။
ဇွန်လ ၁၈ ရက်က အချင်းချင်းတိုက်ခိုက်မှုများတွင် ချင်းညီနောင်မှ ရဲဘော် ၂ ဦးကျဆုံးပြီး အပြင်းအထန် ဒဏ်ရာရရှိသူများရှိခဲ့ကြောင်း သိရသည်။
နှစ်ဖက်ထိခိုက်ကျဆုံးမှုများ ရှိနေသော်လည်း အတိအကျကို မဖြေနိုင်သေးကြောင့် CDF – မတူပီ၊ တပ်မဟာ – ၁ မှ ပြောရေး ဆိုခွင့်ရှိသူ ကိုဘွေအုတ်က ယမန်နေ့က ချင်းညီနောင်သတင်းစာရှင်းလင်းပွဲတွင် ပြောသည်။
ချင်းအမျိုးသားတပ်ဦး CNA မှ ဒုတိယ ဗိုလ်မှူးကြီး လာလ်ဘိခ့် (Lt.Col Lal Bik) ကျဆုံးသွားမှုနှင့်ပတ်သက်၍ စိတ်မကောင်းဖြစ်ရကြောင်း ချင်းညီနောင်မှ စစ်ရေးတာဝန်ခံ၊ CDF – မင်းတပ် စစ်ဦးစီးချုပ် ထန်းချွန်းဖေက ပြောသည်။
“စိတ်မကောင်းပါဘူး။ ဘာဖြစ်လို့လည်းဆိုတော့ ကိုယ့်လူမျိုးအချင်းချင်း စကစကို ဘုံရန်သူအဖြစ် သတ်မှတ်ပြီးတော့ တိုက်ခိုက် နေတဲ့အချိန်မှာ စကစကို တိုက်ခိုက်နေတဲ့အဖွဲ့ကို လာတိုက်ခိုက်ရင်းနဲ့ ကျဆုံးတဲ့အတွက် ပိုပြီးတော့မှ စိတ်မကောင်း ပါဘူး။ ချင်းပြည်သူတွေအနေနဲ့ ဒါကိုသင်ခန်းစာယူပြီးတော့ မဖြစ်သင့်တဲ့၊ ဆိုရှယ် မီဒီယာပေါ်မှာ အမုန်းတရားတွေ ပြန့်ပွားစေမှုတွေကို ရပ်တန့်ဖို့လည်း လိုအပ်နေပါတယ်” ဟု ထန်းချွန်းဖေက ပြောသည်။
မတူပီမြို့သိမ်း စစ်ဆင်ရေးအတွင်း ချင်းတော်လှန်ရေးအင်အားစုများ အချင်းချင်းကြား တိုက်ပွဲများ ဖြစ်ပွားနေမှုသည် ချင်းလဲန်း ကောင်စီဘက်က တိုက်ပွဲများ ရပ်ပေးပါက မိမိတို့ဘက်ကလည်း ရပ်ပေးမည်ဖြစ်ကြောင်း ၊ ချင်းလဲန်းကောင်စီတပ်ဖွဲ့က မိမိတို့ကို ထိုးစစ်ဆင်နေ၍သာ အချင်းချင်းတိုက်ပွဲဖြစ်ရခြင်းဖြစ်ကြောင်း ချင်းညီနောင်မှ တာဝန်ရှိသူများက မနေ့ညကပြုလုပ်သော ချင်းညီနောင်သတင်းစာရှင်းလင်းပွဲတွင်ပြောဆိုကြသည်။
လတ်တလောတွင် ချင်းအဖွဲ့အချင်းချင်းကြား တွေ့ဆုံဆွေးနွေး၍ ရသော အခြေအနေမျိုး မရှိသေးကြောင်း ချင်းညီနောင်မှ ပြောရေးဆိုခွင့်ရှိသူ ကိုယောမာန်က ပြောသည်။
လက်ရှိတွင် ချင်းလဲန်းကောင်စီသည် မတူပီမြို့တိုက်ပွဲများအတွက် လက်နက်ခဲယမ်း စုဆောင်နေခြင်းနှင့် စစ်ရေးပြင်ဆင်မှုများ တိုးမြှင့်လုပ်ဆောင်နေကြောင်း CDF- မတူပီ၊ တပ်မဟာ ၁ ပြောရေးဆိုခွင့်ရှိသူ ဆလိုင်းဘွေအုပ်က ပြောသည်။
မတူပီမြို့စစ်ဆင်ရေးကို ချင်းညီနောင်က ဇွန်လ ၉ ရက်က စတင်တိုက်ခိုက်ခဲ့ရာ မြို့ပေါ်ကို ဇွန်လ ၁၁ ရက်တွင် သိမ်းနိုင်ခဲ့ပြီး ဇွန်လ ၁၇ ရက်တွင် ခမရ ၃၀၄ တပ်ရင်းကို အပြီးသတ် သိမ်းနိုင်ခဲ့ကြောင်း သိရသည်။
မတူပီမြို့ စစ်ကောင်စီ ဗျူဟာကုန်းနှင့် ခလရ ၁၄၀ တို့ကို သိမ်းယူနိုင်ရေးအတွက် ချင်းလဲန်းကောင်စီတပ်ဖွဲ့များနှင့် ချင်းညီနောင် တပ်ဖွဲ့တို့က ဆောင်ရွက်နေကြကြောင်း အသီးသီး ထုတ်ပြန်ထားသည်။
မတူပီမြို့မှာ စစ်ကောင်စီနှင့် တိုက်ပွဲများတွင် ချင်းတော်လှန်ရေး အင်အားစုများ၏ CDF- မတူပီ၊ တပ်မဟာ – ၁ မှ ရဲဘော် ၆ ဦး ရှေ့တန်းတစ်နေရာတွင် ကျဆုံးခဲ့ကြောင်း သိရသည်။
