(005MK)
မီဇိုရမ်ပြည်နယ် Saitual ခရိုင်အတွင်း လှိုင်ဂူတစ်ခုမှာ နှစ်ပေါင်း ၇၀၀ ကျော်သက်တမ်းရှိသော အရိုးစုများ ရှာဖွေတွေ့ရှိခဲ့သည်ဟု INTACH, Mizoram Chapter အဖွဲ့က ယနေ့ ထုတ်ပြန်ကြေညာသည်။
INTACH, Mizoram Chapter အဖွဲ့မှ တာဝန်ရှိသူများသည် ယနေ့စက်တင် ဘာလ ၂ ရက်နေ့တွင် အိုင်ဇောလ်မြို့ Press Club တွင် သတင်းစာရှင်းလင်းပွဲကျင်းပပြုလုပ်ကာ Saitual ခရိုင် Vanbawng နှင့် North Khawlek ကျေးရွာကြားက လှိုင်ဂူတစ်ခုမှာ အဆိုပါအရိုးစုများကို တွေ့ရှိခဲ့ကြသည်ဟု ဆိုသည်။
အဆိုပါလှိုင်ဂူကို Khawlek ရွာသား Laltlanhlua က ယခုနှစ် ဇန်နဝါရီလ ၁၁ ရက်နေ့မှာတွေ့ရှိကာ လှိုင်ဂိုထဲတွင် အရိုးစု ဦးခေါင်းခွံ ၉ ခု၊ လူ့ခန္ဓကိုယ်အပိုင်းအစအရိုးစုများနှင့် ကွဲကြေနေသော အိုးအပိုင်းအစများလည်းတွေ့ရှိခဲ့သည်ဟု INTACH, Mizoram Chapter ဦးဆောင်သူ Rin Sanga, IAS (Retd.) က ပြောသည်။
ယင်းအရိုးစုများကို အမေရိကန်ပြည်ထောင်စု ဖလော်ရီဒါပြည်နယ် မိုင်ယာမီမြို့က Beta Analytic Laboratory မှာ စစ်ဆေးရန်ပို့ပြီးနောက် ဓာတ်ခွဲခန်းအဖြေရလဒ်ကိုပြန်လည်ပို့ဆောင်လာရာမှာ အရိုးစုများသည် လွန်ခဲ့သော AD ၁၂၆၀ မှ ၁၃၂၀ ကြားကဖြစ်ကြောင်း တွေ့ရှိရသည်ဟုဖော်ပြထားသည်။
သို့သော်လည်း အဆိုပါအရိုးစုများသည် မည်သည့်မျိုးနွယ်စုနှင့် မည်သူများဖြစ်ကြသည်ကိုမူ အတည်ပြုရန် ဆက်လက်ကြိုးစားသွားမည်ဟု INTACH, Mizoram Chapter ကပြောဆိုသည်။
India National Trust For Art & Cultural Heritage (INTACH) ကို ရှေးဟောင်းအမွေအနှစ်များ ရှာဖွေရေး၊ ထိန်းသိမ်းကာကွယ်ရေးအတွက် ၁၉၈၄ မှာ အိန္ဒိယဝန်ကြီးချုပ် RaJiv Gandhi ၏ ဦးဆောင်မှုဖြင့် တည်ထောင်ကြပြီး မီဇိုရမ်ပြည်နယ်တွင်လည်း အဆိုပါနှစ်တွင် တည်ထောင်ခဲ့ကြခြင်းဖြစ်သည်။
