အပြစ်မဲ့ပြည်သူများကို လူသားဒိုင်းအဖြစ်ဖမ်းဆီးခေါ်ဆောင်ပြီး ချင်းပြည်နယ် တီးတိန်မြို့နယ် သိုင်းငင်မှ ကလေးမြို့ဆင်းသွားသော စစ်ကောင်စီယာဉ်ကို အမည်မသိ လက်နက်ကိုင်တပ်ဖွဲ့က တိုက်ခိုက်ခဲ့သည့်အတွက် ကားပေါ်ပါလာသော လူသားဒိုင်းအဖြစ် ဖမ်းဆီးခံရသူများ ထိခိုက်ဒဏ်ရာရရှိခဲ့သည် CDF Civic Defense Militia Siyin က ယနေ့ထုတ်ပြန်သည်။
စစ်ကောင်စီတပ်ဖွဲ့သည် သိုင်းငင်မှ ကလေးမြို့သို့ ပြန်လှည့်သည့်အချိန်တွင် ရွာခံအရပ်သားပြည်သူတချိူ့အား လူသားဒိုင်းအဖြစ် ဖမ်းဆီးခေါ်ဆောင်သွားခဲ့ပြီး မွှလ်ပီးနှင့် ကလေးမြို့အကြား ရှုခင်းသာတွင် အမည်မသိ လက်နက်ကိုင်အဖွဲ့တဖွဲ့က ပစ်ခတ်ခဲ့သည်ဟု CDF CDM-Siyin တပ်ဖွဲ့ဆိုသည်။
ထိုပစ်ခတ်မှုကြောင့် လူသားဒိုင်းကာ အဖြစ်ခေါ်ခံရသော အပြစ်မဲ့ပြည်သူများ ဒဏ်ရာများရရှိခဲ့သည်ဟု သိရသည်။
စစ်ကောင်စီတပ်ဖွဲ့က ဒေသခံပြည်သူ အနည်းဆုံး ၅ ယောက်ခန့်ကို လူသားဒိုင်းအဖြစ် ဖမ်းဆီးသွားသည်ဟု သိရသည်။
CDF CDM Siyin ဒေသအတွင်း ဒေသခံကာကွယ်ရေးအဖွဲ့ထံသို့ ကြိုတင်အသိမပေးပဲ စစ်ဆင်ရေးမျိုးများကို နောက်နောင်မပြုလုပ်ကြရန်နှင့် ယခုကဲ့သို့ အသိမပေးပဲ ဝင်ရောက်စစ်ဆင်းရခြင်းသည် ပြည်သူ့ကာကွယ်ရေးတစ်ဖွဲ့နှင့်တစ်ဖွဲ့အကြား ဆိုးရွားစွာ နားလည်မှုကွဲလွဲစေနိူင်ပါသည်ဟု CDF CDM- Siyin က ၏ ထုတ်ပြန်ချက်တွင် ဖော်ပြသည်။
နောက်နောင် ယခုကဲ့သို့ ဖြစ်လာပါက မည်သည့်အဖွဲ့ကိုမဆို သည်းခံနားလည်ပေးမည်မဟုတ်ကြောင်း ဤကဲ့သို့ အပြစ်မဲ့ပြည်သူများ လူသားဒိုင်းကာအဖြစ် အသုံးချခံပါလာကြောင်းသိလျက်ပင် စစ်ဆင်ရေးကို တဇွတ်ထိုး ပြုလုပ်သည်ကိုလည်း ပြင်းထန်စွာ ရှုတ်ချပါသည်ဟု CDF CDM-Siyin က ဆိုပါသည်။
ယမန်နေ့အောက်တိုဘာလ ၁၃ ရက်နေ့မနက်ပိုင်းက တီးတိန်မြို့နယ် ကလေး-သိုင်းငင်လမ်းမပေါ်တွင် အထိုင်ချသော စစ်ကောင်စီစခန်းကို CDF CDM-Siyin တပ်ဖွဲ့က သွားရောက်ပစ်ခတ်တိုက်ခိုက်ခဲ့ပြီး ယင်းပစ်ခတ်မှုဖြစ်ပွားပြီးနောက် စစ်ကောင်စီဘက် ပြည်သူပိုင်အိမ်များအား ရမ်းသမ်းပစ်ခတ်မှုကြောင့် အပြစ်မဲ့ပြည်သူတစ်ဦး ပြင်းထန်စွာဒဏ်ရာရရှိခဲ့သည်ဟု သိရသည်။
