(004SS)
ချင်းအမျိုးသားတပ်မတော် CNA က တိုက်ပွဲအတွင်း စစ်သုံ့ပန်းအဖြစ် ဖမ်းဆီးခဲ့သော ZRA-EC တပ်သား ဦးဆွပ်လမ်းခိုင် သည် သေဆုံးခြင်းမရှိဘဲ အသက်ရှင်လျှက် ကျန်းမာစွာရှိနေကြောင်း သိရသည်။
ဦး ဆွပ်လမ်းခိုင်သည် ဧပြီလ ၃ ရက်နေ့က တီးတိန်မြို့နယ် ဒါရ်ခိုင်ကျေးရွာတိုက်ပွဲတွင် CNA နှင့် ချင်းပူးပေါင်းတပ်ဖွဲ့က ဖမ်းဆီးခဲ့ပြီးနောက် CNA က သတ်ဖြတ်၍ သေဆုံးသွားပြီး မေလ ၁၄ ရက်နေ့က အလောင်းမပါပဲ သဂြိုလ်ခဲ့ကြသည်ဟု ဓာတ်ပုံနှင့်တကွ ZRA ကိုအားပေးထောက်ခံသော သတင်းဌာန နှင့် လူမှုကွန်ယက်စာမျက်နှာတချို့က ဖော်ပြခဲ့ကြသည်။
ယင်းကိစ္စနှင့်ပတ်သက်၍ ဦးဆွပ်လမ်းခိုင်ကိုယ်တိုင်ရှင်းလင်းပြောဆိုခဲ့သည့် ရုပ်သံကို Chinland Information Center က ယနေ့ထုတ်ပြန်ခဲ့သည်။
“ကျနော့ကို မေလ ၁၄ ရက်နေ့မှာ သဂြိုလ်လိုက်တယ်ဆိုပြီး ဖော်ပြကြတယ်၊ ဒါပေမဲ့ ကျွန်တော်က မသေပါဘူး။ ဒီမှာ (CNA ) မှာ ကျန်းကျန်းမာမာနဲ့ ရှိနေပါတယ် ဆိုတာ ကျွန်တော့မိဘတွေကို ပြောပြချင်ပါတယ်၊ ဒီကြားထဲ ကျွန်တော်က ဗိုက်နာ၊ ခေါင်းကိုက် ဖြစ်တယ်၊ ဆေးခန်းလည်း ၂ ကြိမ်သူတို့ လိုက်ပို့ပေးတယ် သူတို့ကျွန်တော့ကို ကောင်းကောင်းပြုစု ပေးကြတယ်။ အခုလို တိတိကျကျမသိဘဲနဲ့ မသေသေးတဲ့သူကို သေသွားပြီလို့ မီဒီယာပေါ်မှာ သတင်းလွှင့်ခြင်းခံရတဲ့အပေါ် ကျနော်အားငယ်ရတယ်၊ စိတ်မကောင်းဘူး၊ မိသားစုအတွက် နစ်နာမှုရှိပါတယ်၊ ဒါမျိုးမလုပ်သင့်ဘူးလို့ မှာချင်ပါတယ်” ဟု ဦးဆွပ်လမ်းခိုင်ကိုယ်တိုင်က ပြောဆိုခဲ့သည်။
ချင်းအမျိုးသားတပ်မတော် CNA ဦးဆောင်သော ချင်းပူးပေါင်းတပ်နှင့် ZRA-EC တို့အကြားဖြစ်ပွားသည့် တိုက်ပွဲနှင့်ပတ် သက်၍ လူမှုကွန်ယက်စာမျက်နှာတွင် ရည်ရွယ်ချက်ရှိရှိဖြင့် လူမျိုးရေးအသွင်မုန်းတီးမှုဖြစ်ပွားလာစေရန် ရေးသားဖော်ပြမှု များရှိနေသည်ဟု သိရသည်။
