မရာလက်နက်ကိုင် ၂ ဖွဲ့ ငြိမ်းချမ်းရေးနှင့် ပေါင်းစည်းရေးအတွက် တွေ့ဆုံဆွေးနွေး၊ နှစ်ဖက်သဘောတူညီမှုရရှိ

(004SS)

မရာလက်နက်ကိုင်တပ်ဖွဲ့ ၂ ခုဖြစ်သည့် မရာဒေသကာကွယ်ရေးတပ်ဖွဲ့ MDF/MTC နှင့် CDF-Mara တပ်ဖွဲ့တို့အကြား ငြိမ်းချမ်းရေးနှင့် ပေါင်းစည်းရေးတွေ့ဆုံဆွေးနွေးမှုကို ဘာသာရေးအဖွဲ့အစည်း၏ ဦးဆောင်မှုဖြင့် ပြုလုပ်ကာ နှစ်ဖက်သဘောတူညီမှုရရှိကြောင်းသိရသည်။

မရာဧဝံဂေလိအသင်းတော် (Mara Evangelical Church) ၏ ဦးဆောင်မှုဖြင့် MDF/MTC နှင့် CDF-Mara တပ်ဖွဲ့တာဝန်ရှိ သူများသည် မီဇိုရမ်ပြည်နယ် ရှာဟာခရိုင် ဇောင်းလိန်ရွာ၌ မေလ ၂၂ ရက်မှ ၂၄ ရက်နေ့အထိ ၃ ရက်တိုင်တိုင်တွေ့ဆုံဆွေး နွေးခဲ့ကြပြီး ငြိမ်းချမ်းရေးနှင့် ပေါင်းစည်းရေးသဘောတူညီမှုရရှိခဲ့ကြသည်ဟု MDF/MTC ပြန်ကြားရေးဌာန အတွင်းရေးမှူး ကပြောသည်။

“အဓိကတော့ ငြိမ်းချမ်းရေးနဲ့ ပူးပေါင်းရေးအတွက် ဘာသာရေးအဖွဲ့အစည်းကနေ လုပ်ပေးတာဖြစ်ပါတယ်။ ငြိမ်းချမ်း ရေးကတော့ အဆင်ပြေတယ်ပေါ့နော်၊ ပေါင်းစည်းရေးအတွက်က ပြန်ပြီး ကော်မတီဖွဲ့၊ တဖြည်းဖြည်း ချဉ်းကပ်ရမှာ ဖြစ်ပါတယ်၊ အနည်းဆုံး ၂/၃ လလောက်အချိန်ပေးပြီးလုပ်ရမှာပေါ့နော် အလုံးစုံပူးပေါင်းနိုင်ဖို့ကို၊ မရာမြေမှာ အုပ်ချုပ်ရေး တစ်ခု၊ စစ်တပ်တစ်ခုတည်းပဲရှိရမယ်ဆိုတဲ့မူကို ကိုင်ဆွဲပြီး ချဉ်းကပ်နေတာပါ” ၎င်းကပြောသည်။

တွေ့ဆုံဆွေးနွေးပွဲတွင် MDF နှင့် CDF-Mara အကြား အပြုသဘောဆောင်သောရှေ့လုပ်ငန်းစဥ် (၈) ရပ်ကို သဘောတူညီခဲ့ကြကြောင်း သိရသည်။

ယင်းသဘောတူညီချက်ထဲတွင် နှစ်ဖက်တပ်ဖွဲ့မှ ကိုယ်စားလှယ် ၅ ယောက်စီ၊ ဘာသာရေးဆရာ၊ မြို့မိမြို့ဖဘက်က ကိုယ်စားလှယ် ၅ ယောက်ဖြင့် ပြန်လည်ပေါင်းစည်းရေးကော်မတီဖွဲ့စည်းကာ ပေါ်လစီရေးဆွဲရန်၊ ပြန်လည်ပေါင်းစည်းရေး ကော်မတီက မရာလူထုကောင်စီညီလာခံခေါ်ယူပြီး မူကြမ်းအတည်ပြုကာ ရွေးကောက်ပွဲလုပ်ရန်၊ ရွေးကောက်ပွဲကျင်းပပြီး ၁၄ ရက်အတွင်း နှစ်ဖက်တပ်ဖွဲ့မှ ဖမ်းဆီးထားသော စစ်သုံ့ပန်းများ ပြန်လွှတ်ရန်တို့ပါဝင်ကြောင်း သိရသည်။

ချင်းအနွယ်ဝင် မရာမျိုးနွယ်စုများမှ ဖွဲ့စည်းတည်ထောင်ထားကြသော MDF နှင့် CDF-Mara တပ်ဖွဲတို့သည် နှစ်ဖက်သဘော ထားကွဲလွဲမှုတို့ ကြောင့် စစ်ရေးတင်းမာမှုရှိလာပြီးနောက် ယခုနှစ်ဆန်ပိုင်းကစတင်၍ တိုက်ပွဲပေါင်း ၁၀ ကြမ်ထက်မနည်း ဖြစ်ပွားကာ နှစ်ဘက်ထိခိုက်ကျဆုံးမှုများလည်းရှိခဲ့သည်။

မရာမျိုးနွယ်စုအချင်းချင်းကြားသွေးထွက်သံယိုမှုဖြစ်ပွားလာသည့်နောက်ပိုင်းတွင် မရာဧဝံဂေလိအသင်းတော်မှ ဘာသာရေး ခေါင်းဆောင်များက Peace Commission ကိုဖွဲ့စည်းကာ ငြိမ်းချမ်းရေးကြားဝင်ညှိနှိုင်းဆောင်ရွက်လာခဲ့ရာမှ ယခုအခြေ အနေထိရောက်ရှိလာနိုင်ခြင်းဖြစ်သည်ဟု သိရသည်။

“အဓိက ကမကဌပြုတာက မရာဧဝံဂေလိရုံးချုပ်ကနေ လက်နက်ကိုင် ၂ ဖွဲ့ရှိတာ လုံးဝအဆင်မပြေဘူးဆိုပြီး သူတို့ကနေ MBA, BAM, UPC အဲဒီအသင်းတော်တွေကို ဖိတ်ခေါ် ပြီး Peace Commission ကို ဖွဲ့လိုက်ပြီး လုပ်လိုက်တာ ဖြစ်ပါတယ်။ အဲတော့ Peace Commission ကနေ တစ်ဖွဲ့ကို ၄/၅ ကြိမ်တွေ့ပြီးမှပဲ အခုလို တွေ့ဆုံမှု ဖြစ်လာတာ ဖြစ်ပါတယ်” ဟု MDF/MTC ပြန်ကြားရေးဌာန အတွင်းရေးမှူးက ပြောသည်။

ယခုလက်ရှိတွင် CDF-Mara သည် ချင်းလဲန်းကောင်စီတွင်ပါဝင်သော လက်နက်ကိုင်တပ်ဖွဲ့တစ်ခုဖြစ်ပြီး MDF မှာ ချင်းညီနောင်အဖွဲ့ဝင်ဖြစ်သည်။