(002MG)
စစ်ကိုင်းတိုင်း၊ တမူး- ခါမ်းပါတ်ကားလမ်းပိုင်းအား ၁ နှစ်ခန့်အကြာပိတ်ထားခဲ့ရာမှ ဇွန်လ ၂၂ ရက်နေ့တွင် စစ်ကောင်စီက ကားလမ်းပြန်လည် ဖွင့်ပေးခဲ့သည်ဟု သိရသည်။
အဆိုပါ တမူး-ခမ်းပါတ် ကားလမ်းကို ၂၀၂၃ ခုနှစ် ဇွန်လပိုင်းတွင် တမူးမြို့နယ် ပန်းသာကျေးရွာမှာ တပ်စွဲထားသည့် စစ်ကောင်စီတပ်ဖွဲ့က စစ်ရေးအခြေအနေကြောင့်ဟုဆိုကာ ဖြတ်သန်းသွား လာခွင့်ပိတ်ပင်ထားခဲ့ခြင်းဖြစ်သည်။
“လက်ရှိက ဖွင့်တာလဲမကြာသေးဘူးဆိုတော့ လူတွေတော့ အများကြီးမသွားသေးဘူး၊ ကားတွေက သွားတော့သွားပြီ၊ အခုက သူတို့ကဖွင့်တာ ဆိုတော့ ဘယ်လိုပုံစံမျိုးနဲ့ဖွင့်တာလဲဆိုတာ စောင့်ကြည့်ရမှာ” ဟု ဒေသတွင်းတော်လှန်ရေးတပ်ဖွဲ့ဝင်တစ်ဦးက ပြောသည်။
လက်ရှိတွင် ခါမ်းပါတ်-တမူးကားလမ်းပိုင်းအသုံးပြုနိုင်သာ်လည်း ကလေး-ခါမ်းပါတ်လမ်းပိုင်းအား စစ်ကောင်စီက စခန်းကြီးကျေးရွာရဲစခန်းမှ ပိတ်ထားဆဲဖြစ်သည်ဟု သိရသည်။
ကလေး-ခါမ်းပါတ် ကားလမ်းပိုင်း ပိတ်ထားဆဲဖြစ်သောကြောင့် အိန္ဒိယ-မြန်မာနယ်စပ် တမူးမြို့၊ ခါမ်းပါတ်မြို့သို့ သွားလိုပါက ကလေးမြို့မှ ချင်းတောင်ကတဆင့် လက်ပံချောင်းဘက်ကူးကာ ရာဇဂြိုဟ်မှ ခါမ်းပါတ်သို့ ကွင်းလမ်းဖြင့် ခရီးသွားလာရပြီး ကားခမှာလည်း ၃ သိန်းကျော်ခန့်ရှိသည်ဟု သိရသည်။
