(006SV)
ချင်းပြည်နယ်၊ မတူပီမြို့သိမ်းတိုက်ပွဲက တောတောင်များထဲ ထွက်ပြေးနေသည့် စစ်ကောင်စီတပ်ဖွဲ့ဝင် စစ်သုံ့ပန်း ၆၀ ကျော်ကို ချင်းလဲန်းကောင်စီပူးပေါင်းတပ်များက ဖမ်းဆီးရမိခဲ့ကြောင်း သိရသည်။
“တစ်ရက်ထဲမှာ ဖမ်းတာတော့ မဟုတ်ဘူး။ နေ့တိုင်းလိုလိုတော့ တောက်လျှောက်ဖြစ်တာပါ။ ရက်နဲ့အတိအကျ အဲလိုမျိုးတော့ မရှိဘူး။ တစ်ရက်မှာ ၂ ယောက်၊ ၃ ယောက် ။ တခါတလေနဲ့ ဆယ်ဂဏန်းလောက်ပေါ့။ အဲလို ဖမ်းဆီးရမိတာတွေ ဖြစ်ပါတယ်။ အားလုံးက အခုချိန်ထိ ကျနော်တို့မှာ ၆၀ နဲ့ ၈၀ ကြားမှာရှိတယ်လို့ ပြောလို့ရတယ်” ဟု CDF – မတူပီ၊ တပ်မဟာ – ၂၊ ပြောရေးဆိုခွင့်ရှိသူ ကိုနိုင်ဂျွန်က ပြောသည်။
ချင်းလဲန်းကောင်စီပူးပေါင်းတပ်က ဖမ်းဆီးရမိသူများတွင် စစ်ကောင်စီတပ်သားအပါအဝင် မိသားစုဝင်များ စသဖြင့် အစုံပါဝင်နေကြောင်း၊ အာရက္ခတပ်တော် ULA/ AA ၏ တပ်ဖွဲ့ဝင်အချို့ကိုလည်း ဖမ်းဆီးရမိထားကြောင်း သိရသည်။
မတူပီမြို့သိမ်းခံရပြီးနောက် စစ်ကောင်စီစခန်းများမှ စွန့်ခွာထွက်ပြေးနေသည့် စစ်ကောင်စီတပ်ဖွဲ့များနှင့် လက်အောက်ခံလူများကို မကြာခဏ ဖမ်းမိနေကြောင်း ဆလိုင်းထက်နီကလည်း ပြောသည်။
“ကျနော်တို့က အလုံးအရင်းနဲ့တော့ မဖမ်းပါဘူး။ အခုက အားလုံး ၆၀ ခန့်တော့ရှိမယ်။ ၃ ယောက် ၊ ၄ ယောက် စသဖြင့် အဲဒီလို ဖမ်းထားတာပါ” ဟု ဆလိုင်းထက်နီက ပြောသည်။
ဖမ်းဆီးရမိသူများကို ချင်းလဲန်းကောင်စီပူးပေါင်းတပ်များက ကောင်းမွန်စွာ ထိန်းသိမ်းထားကြောင်း သိရသည်။
မတူပီမြို့ရှိ ခမရ – ၃၀၄၊ ခလရ – ၁၄၀ နှင့် မတူပီအခြေချ စစ်ဗျူဟာတို့ကို ချင်းညီနောင်နှင့် မဟာမိတ်တပ်ဖွဲ့များက ထိုးစစ်ဆင်တိုက်ခိုင်ရာ ဇွန်လ ၂၉ ရက်က အပြီးသတ်သိမ်းပိုက်ချိန်တွင် စစ်ကောင်စီတပ်ဖွဲ့ဝင်နှင့် မိသားစုဝင်များ၊ Non- CDM များ ရာချီသည် တောတောင်ထဲသို့ ထွက်ပြေးသွားခဲ့ရခြင်းဖြစ်သည်။
ဇူလိုင်လ ၁၇ ရက်တွင် မတူပီမြို့ စစ်ကောင်စီစခန်းများမှ ထွက်ပြေးနေသော စစ်ကောင်စီတပ်သားများ၊ တပ်မိသားစုဝင်များနှင့် အရပ်ဖက်ဝန်ထမ်းများ စုစုပေါင်း ၁၂၀ ခန့်ကို ပထမသုတ်အဖြစ် ဖမ်းဆီးရမိခဲ့ကြောင်၊ ဇူလိုင်လ ၂၅ ရက်တွင် ဒုတိယသုတ်အဖြင့် စစ်သုံ့ပန်းအုပ်စုဝင် ၁၀၀ ကျော်ကို ထပ်မံဖမ်းဆီးရမိခဲ့ကြောင်း ချင်းညီနောင်ထံမှ သိရသည်။
ဖမ်းဆီးရမိသော စစ်သုံ့ပန်းများထဲတွင် စစ်ကောင်စီတပ်မှ ဗျူဟာမှူးအပါအဝင် အရာရှိ ၁၀ ဦးကျော်ပါဝင်ကြောင်း၊ တောတောင်ထဲတွင် ထွက်ပြေးနေစဉ်အတွင်း လသားကလေးငယ်နှင့် သက်ကြီးရွယ်အိုများ အပါအဝင် စစ်ကောင်စီတပ်သား၊ ရဲတို့ ၅၀ ကျော် သေဆုံးခဲ့ရကြောင်း သိရသည်။
