(006SV)
ချင်းပြည်နယ်၊ ဟားခါးမြို့မရဲစခန်းတွင် စစ်ကော်မရှင်တပ်က ဖမ်းဆီးထားသည့် CDF-Hakha နှင့် CNA အကျဉ်းသားများကို အထူးစစ်ဆင်ရေးတစ်ခု ဖော်ဆောင်ပြီး ကယ်ထုတ်နိုင်ကြောင်း CDF – ဟားခါးက ယနေ့ အောက်တိုဘာလ ၁၆ ရက်မှာ ကြေညာသည်။
အောက်တိုဘာလ ၁၆ ရက် မနက် ၂ နာရီခွဲမှစတင်၍ CDF – ဟားခါး စစ်ဦးစီးချုပ်နှင့် တပ်မဟာ (၄) တပ်မဟာမှူးတို ကိုယ်တိုင် ကြီးကြပ်ကွက်ကဲမှုဖြင့် အထူးမစ်ရှင်တစ်ခု ဖော်ဆောင်ကာ CDF – ဟားခါး တပ်ဖွဲ့ဝင်များသည် ဟားခါးမြို့မရဲစခန်းကို စီးနင်းတိုက်ခိုက်၍ CDF – ဟားခါး ရဲဘော် ၃ ဦး၊ ချင်းအမျိုးသားကာကွယ်ရေတပ်မတော် (CNA) ရဲဘော် ၂ ဦးတို့ကို ကယ်ထုတ်နိုင်သည်ဟု သိရသည်။
အဆိုပါ ကယ်ထုတ်ရေး အထူးမစ်ရှင်တွင် စစ်ကော်မရှင်တပ်ဖွဲ့ဝင် ၆ ဦးကို ရှင်းလင်းနိုင်ပြီး ချင်းတော်လှန်ရေး ရဲဘော် အကျဉ်းသား ၅ ဦးအပြင် အခြားအကျဉ်းသား ၁၀ ဦးတို့ကိုလည်း ကယ်ထုတ်နိုင်သည်ဟု သိရသည်။
ဟားခါးမြို့မရဲစခန်းကို ၁ နာရီခွဲကြာ စီးနင်းတိုက်ခိုက်မှုတွင် ချင်းတော်လှန်ရေးတပ်ဖွဲ့ဝင်များသည် ထိခိုက်ဒဏ်ရာ ရရှိမှု မရှိဘဲ စစ်ဆင်ရေးကို အောင်မြင်စွာ ဆောင်ရွက်နိုင်ခဲ့သော်လည်း တပ်ဆုတ်ပြီး ဆုံမှတ်နေရာအရောက်တွင် မထင်မှတ်သော စစ်ကော်မရှင်တပ်မှ ကျည်တစ်ထောင့် ထိမှန်၍ CDF – ဟားခါး ရဲဘော် ၁ ဦးက ကျဆုံးရသည်ဟု သိရသည်။
CDF ဟားခါး ထိန်းချုပ်ထားသော ဟားခါးမြို့နယ်၊ ဗန်ဟားကျေးရွာရှိ စာသင်ကျောင်းကို အောက်တိုဘာလ ၁၃ ရက်တွင် စစ်အုပ်စုက လေကြောင်းမှ ဗုံးကြဲတိုက်ခိုက်ရာ ၈ နှစ်အရွယ် ကျောင်းသား ၁ ဦးနှင့် ၁၂ နှစ်အရွယ် ကျောင်းသူ ၁ ဦးတို့ သေဆုံးပြီး ဆရာ/မ ၅ ဦးနှင့် ကျောင်းသား ကျောင်းသူ ၁၆ ဦး ၊ စုစုပေါင်း ၂၁ ဦး ထိခိုက်ဒဏ်ရာများ ရရှိသည်ဟု သိရသည်။
