(006SV)
ချင်းပြည်နယ်သည် မြန်မာတစ်နိုင်ငံလုံးတွင် ဘိန်းစိုက်ပျိုးမှု တတိယအများဆုံး ပြည်နယ်တစ်ခုဖြစ်လာပြီး ယမန်နှစ်ကထက် ဘိန်းစိုက်ပျိုးမှု ၂၆ ရာခိုင်နှုန်းအထိ မြင့်တက်လာကြောင်း UNODC က ထုတ်ပြန်သည်။
ချင်းပြည်နယ်တွင် ဘိန်းစိုက်ပျိုးထုတ်လုပ်မှုသည် ၂၀၂၄ ခုနှစ်တွင် ၈၃၂ ဟတ်တာဝန်းကျင် ရှိခဲ့ရာမှ ယခုနှစ် ၂၀၂၅ ခုနှစ်တွင် ဟတ်တာ ၁၀၄၀ ကျော်အထိ မြင့်တက်လာသည်ဟု ကုလသမဂ္ဂမူးယစ်ဆေးဝါးနှင့် ရာဇဝတ်မှု ဆိုင်ရာအဖွဲ့ရုံး (UNODC) ၏ ဒီဇင်ဘာလ ၃ ရက်က ထုတ်ပြန်သည့် ၂၀၂၅ မြန်မာ့ဘိန်းစစ်တမ်းအစီရင်ခံစာမှာ ဖော်ပြထားသည်။
ရှမ်းပြည်နယ်တွင် ဘိန်းစိုက်ပျိုးမှုမှာ တစ်နိုင်ငံလုံးအတိုင်းအတာ၏ ၈၈ ရာခိုင်နှုန်အထိ ရှိနေရာ ဘိန်းစိုက်ပျိုးမှု အများဆုံးပြည်နယ်ဖြစ်ကြောင်း၊ ၂၀၂၄ ခုနှစ်က ဟတ်တာပေါင်း ၃၉,၇၀၀ ထက်မနည်း စိုက်ပျိုးခဲ့ရာမှ ယခုနှစ်တွင် ၄၆,၇၀၀ ဟတ်တာအထိ စိုက်ပျိုးခဲ့ရာ ၁၇ ရာခိုင်နှုန်း မြင့်တက်လာသည်ဟု သိရသည်။
ကချင်ပြည်နယ်သည် ဘိန်းစိုက်ပျိုးမှု ဒုတိယအများဆုံးဖြစ်ကာ ၂၀၂၄ ခုနှစ်က ၄၁၄၀ ဟတ်တာစိုက်ပျိုးခဲ့ရာမှ ၂၀၂၅ ခုနှစ်တွင် ၄၂၅၀ ဟတ်တာ ရှိခဲ့ပြီး ယမန်နှစ်ကထက် ၃ ရာခိုင်နှုန်း မြင့်တင်လာသည်ဟု သိရသည်။
စတုတ္ထအများဆုံး ဘိန်းစိုက်ပျိုးမှု ရှိနေသည့် ကရင်နီပြည်နယ်တွင် ယမန်နှစ်ကထက် ၂၁ ရာခိုင်နှုန်းအထိ မြင့်တက်လာပြီး စစ်ကိုင်းတိုင်းတွင် ၂၀၂၄ ခုနှစ်က စိုက်ပျိုးမှု မရှိခဲ့သော်လည်း ၂၀၂၅ ခုနှစ်တွင် ဟတ်တာ ၅၅၀ ကျော်အထိ စိုက်ပျိုးလာသည်ကို တွေ့ရှိရသည်ဟု UNODC က ထုတ်ပြန်သည်။
ကမ္ဘာတွင် မြန်မာသည် ဘိန်းစိုက်ပျိုးထုတ်လုပ်မှု အများဆုံး နိုင်ငံဖြစ်ပြီး ၂၀၂၅ ခုနှစ် မြန်မာ့ဘိန်းစိုက်ပျိုးမှု အခြေအနေသည် ဆယ်နှစ်အတွင်း အမြင့်ဆုံးစိုက်ပျိုးသော အနေအထားဖြစ်ကြောင်း၊ ၂၀၂၅ ခုနှစ်တွင် မြန်မာက ဘိန်းတန်ချိန် ၁၀၁၀ ထုတ်လုပ်ခဲ့ရာ အာဖဂနစ္စတန်၏ ဘိန်းထုတ်လုပ်မှုထက် ၂ ဆ ရှိနေကြောင်း သိရသည်။
မြန်မာတွင် ဘိန်းစိုက်ပျိုးမှုသည် ၂၀၂၄ ခုနှစ်တွင် ဟတ်တာ ၄၅,၂၀၀ ရှိခဲ့ရာမှ ယခုနှစ် ၂၀၂၅ ခုနှစ်တွင် ဟတ်တာ ၅၃,၁၀၀ အထိ ရှိခဲ့ပြီး ၁၇ ရာခိုင်နှုန်းအထိ စိုက်ပျိုးမှု မြင့်တက်လာသည်ဟု သိရသည်။
