(006SV)
ချင်းပြည်နယ်၊ ဖလမ်းမြို့အနီးတိုက်ပွဲများနှင့် ကလေးမြို့နယ်၊ မှန်တောရွာအနီး တိုက်ပွဲများတွင် ချင်းကာကွယ်ရေး တပ်ဖွဲ့ CDF – KKG မှ ဒုတပ်ရင်းမှူး အပါအဝင် ရဲဘော် ၃ ဦးသည် ယခု ဖေဖော်ဝါရီလအတွင်း ကျဆုံးကြောင်း သိရသည်။
ဖေဖော်ဝါရီလ ၁၉ ရက်က ဖလမ်းမြို့နယ် တိုက်ပွဲတွင် CDF – KKG တပ်ရင်း (၇) မှ ဒုတပ်ရင်းမှူး Dal Sian Khai ကျဆုံးရသည်ဟု CDF – KKG တပ်ဖွဲ့က ယမန်နေ့ ဖေဖော်ဝါရီလ ၂၃ ရက်က ထုတ်ပြန်သည်။
CDF – KKG တပ်ရင်း (၇) မှ ရဲဘော် Thian Lal Piang သည်လည်း ဖလမ်းမြို့နယ် တိုက်ပွဲတွင် တိုက်ပွဲဝင်ရင်း ဖေဖော်ဝါရီလ ၂၂ ရက်က ကျဆုံးခဲ့ရသည်ဟု သိရသည်။
CDF – KKG တပ်ရင်း (၄) မှ ရဲဘော် မင်းဇော် (ခ) မွှေးတု သည် စစ်ကိုင်း- ချင်းမကွေးအစပ် ကလေးမြို့နယ်၊ မှန်တောရွာ တိုက်ပွဲတွင် ဖေဖော်ဝါရီလ ၂ ရက်က ကျဆုံးရသည်ဟု သိရသည်။
ယင်းတပ်ဖွဲ့ဝင်တို့သည် စစ်အာဏာရှင်ကို တိုက်ခိုက်ချေမှုန်းပြီး စစ်အာဏာရှင်စနစ် ပပျောက်ရေး၊ ပြည်သူလူထု ကာကွယ်ရေးနှင့် ဖက်ဒရယ်ဒီမိုကရေစီ တည်ဆောက်ရေးအတွက် ကျဆုံးခြင်းဖြစ်ပြီး တော်လှန်ရေးအတွက် ပေးဆပ်ခဲ့မှုအပေါ် CDF – KKG မှ အထူးလေးစား ဂုဏ်ပြုပါကြောင်း နှင့် ကျန်ရစ်သူ မိသားစုနှင့်တကွ ထပ်တူထပ်မျှ ဝမ်းနည်းကြောင်း ထုတ်ပြန်ထားသည်။
စစ်ကော်မရှင်များသည် ကလေး – ဖလမ်း လမ်းကြောင်း စိုးမိုးနိုင်ရေးအတွက် တပ်မ ၇၇ လက်အောက်ခံတပ်ရင်း ၉ ရင်းဖြင့် အင်အားထောင်ချီအသုံးပြုပြီး ဖလမ်းမြို့သို့ ဦးတည်စစ်ကြောင်းထိုးနေမှုကို CDF – KKG အပါအဝင် ချင်းလဲန်းကောင်စီ ပူးပေါင်းတပ်များနှင့် CNDF ပူးပေါင်းတပ်တို့သည် လေးလကြားခုခံတိုက်ခိုက်လျက်ရှိကြောင်း သိရသည်။
စစ်ကော်မရှင်တပ်သည် ဂျက်ဖိုက်တာနှင့် Y – 12 တို့ဖြင့် လေကြောင်းပစ်ကူဗုံး အကြိမ်ပေါင်း တစ်ထောင်ကျော် အသုံးပြုနေပြီး အသေခံဒရုန်းအပါအဝင် ဒရုန်းများကိုလည်း အဓိက အသုံးပြုနေကြောင်း သိရသည်။
အဆိုပါတိုက်ပွဲများတွင် စစ်ကော်မရှင်တပ်မှ အရာရှိများအပါအဝင် ထိခိုက်သေဆုံးမှု များပြားသကဲ့သို့ ချင်းပူးပေါင်းတပ်ဖွဲ့မှလည်း ထိခိုက်သေဆုံးမှုများ ရှိနေကြောင်း သိရသည်။
