(004SS)
မကွေးတိုင်းဒေသကြီး၊ ငဖဲမြို့နယ်တွင် အခြေစိုက်သည့် စစ်ကော်မရှင်တပ်၏ ကာကွယ်ရေးပစ္စည်းစက်ရုံ (ကပစ – ၁၄) ကို ချင်းကာကွယ်ရေးတပ် – အရှို (CDF – Asho) နှင့် လူ့ဘောင်သစ်တပ်မတော် (NSA) ပူးပေါင်းတပ်ဖွဲ့များက ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့ကြောင်း သိရသည်။
ဧပြီလ ၂၀ ရက်၊ နေ့လယ် ၂ နာရီအချိန်တွင် ငဖဲမြို့နယ်၊ ရှောက်တောင်ကျေးရွာအနီးရှိ အဆိုပါစက်ရုံအတွင်းရှိ လက်နက်ခဲ ယမ်းသိုလှောင်ရုံနှင့် ထုတ်လုပ်ရေးစက်ရုံတည်ရှိရာ နေရာများကို ပစ်မှတ်ထား တိုက်ခိုက်ခဲ့ခြင်းဖြစ်ကြောင်း CDF – Asho က ယနေ့ ဧပြီ ၂၂ ရက်နေ့တွင် ထုတ်ပြန်သည်။
အဆိုပါ တိုက်ခိုက်မှုကြောင့် စစ်ကော်မရှင်ဘက်မှ ဗိုလ်အဆင့်ရှိ အရာရှိတစ်ဦးနှင့် အခြားအဆင့် တပ်ဖွဲ့ဝင် ၂ ဦး၊ စုစုပေါင်း ၃ ဦး ပွဲချင်းပြီး သေဆုံးခဲ့ပြီး ၁၃ ဦးထက်မနည်း ထိခိုက်ဒဏ်ရာရရှိခဲ့ကြောင်း သိရသည်။ ထို့ပြင် စက်ရုံအတွင်းရှိ အဆောက် အအုံအချို့လည်း ထိခိုက်ပျက်စီးခဲ့ကြောင်း သိရသည်။
တိုက်ခိုက်မှုဖြစ်ပွားပြီးနောက် စစ်ကော်မရှင်တပ်ဖွဲ့ဝင်များ ကြောက်လန့်တကြား ထွက်ပြေးခဲ့ကြပြီး ထွက်ပြေးသွားသော စစ်သည်များကို စစ်ကောင်စီတပ်ဖွဲ့ဝင်အချင်းချင်း ပြန်လည်လိုက်လံဖမ်းဆီးနေမှုများ ရှိနေကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။
ယခုစစ်ဆင်ရေးကို CDF – Asho နှင့် လူ့ဘောင်သစ် တပ်မတော် (NSA) တို့က ပူးပေါင်းဖော်ဆောင်ခဲ့ခြင်းဖြစ်သည်။
