(006SV)
ချင်းပြည်နယ်၊ ကန်ပက်လက်မြို့နယ်၊ ကျင်ဒွေးမြို့ကို ယနေ့ နံနက်ပိုင်းတွင် စစ်တပ်က လေကြောင်းတိုက်ခိုက်မှု ပြုလုပ်ရာ ဒေသခံပြည်သူ ၈ ဦးထက်မနည်း သေဆုံးသည်ဟု ကန်ပက်လက်မြို့ ပြည်သူ့အုပ်ချုပ်ရေး – သတင်း ထုတ်ပြန်ရေးအဖွဲ့ထံမှ သိရသည်။
ယနေ့ ဧပြီလ ၂၉ ရက်၊ နံနက် ၁၀ နာရီ ၁၅ မိနစ်အချိန်မှာ ကျင်ဒွေးမြို့၊ မုန်းချောင်းတံတားဝန်းကျင်ကို ဂျက်ဖိုက်တာဖြင့် ဗုံးကြဲတိုက်ခိုက်မှုများ ပြုလုပ်သွားခြင်းဖြစ်သည်။
“မြေပြင်သတင်းပို့ချက်အရ ဒေသခံတွေ သေဆုံးမှုကနဦး ၈ ဦးလို့ သိရပါတယ်၊၊ တစ်ဦီးက ပြင်းထန်စိုးရိမ်ရနှင့် နှစ်ဦးက မစိုးရိမ်ရလို့ ကနဦးသိရတယ်” ဟု ကန်ပက်လက်မြို့ ပြည်သူ့အုပ်ချုပ်ရေး – သတင်းထုတ်ပြန်ရေးအဖွဲ့မှ တာဝန်ရှိသူ တစ်ဦးက ပြောသည်။
လေကြောင်းတိုက်ခိုက်မှုကြောင့် ကလေး အပါအဝင် ၈ ဦးခန့် သေဆုံးပြီး ၃ ဦးခန့် ထိခိုက်ဒဏ်ရာများ ရရှိသည်ဟု ကန်ပက်လက်မြို့ ပြည်သူ့အုပ်ချုပ်ရေး – သတင်းထုတ်ပြန်ရေးအဖွဲ့က ဖြေကြားထားသော်လည်း ကလေးအပါအဝင် ၉ ဦး ထိခိုက်သေဆုံးမှု ရှိနေသည်ဟု ဒေသခံက ပြောကြားသလို သတင်းဌာနတချို့မှာလည်း ရေးသားထားသည်။
“တံတားဦး လေတပ်တက် YAK – 130 ဂျက်ဖိုက်တာ တစ်စီးမှ ကျင်ဒွေးမြို့တစ်နေရာကို အကြောင်းမဲ့ လေကြောင်းတိုက်ခိုက်ခဲ့တဲ့ အတွက် ကနဦးသတင်းအရ အရပ်သားပြည်သူ ထိခိုက်သေဆုံးမှုမှုများ ရှိတယ်” ဟု မင်းတပ်ဒေသခံ ကိုဟားကလေးထံမှလည်း သိရသည်။
ချင်းပြည်တောင်ပိုင်း၊ မင်းတပ်မြို့နှင့် ၁၀ မိုင် ခန့်သာ ကွာဝေးပြီး ချင်း- ရခိုင်- မကွေး ကူးသန်းရောင်းဝယ်ရေး လမ်းမပေါ်ရှိ အချက် အချာကျသော လမ်းဆုံနေရာမှ ကံကြီးကျေးရွာကို စစ်တပ်က အင်အား ၂၀၀ ခန့်ဖြင့် တပ်စွဲလာပြီး ချင်းတောင်ပိုင်း ထိုးစစ်အတွက် ပြင်ဆင်နေသည်ဟု သတင်းများ ထွက်ပေါ်လာချိန်တွင် ကျင်ဒွေးမြို့ကို လေကြောင်းတိုက်ခိုက်မှု ပြုလုပ်လာခြင်းဖြစ်သည်။
လတ်တလောတွင် ချင်းပြည်နယ်တောင်ပိုင်းနှင့် ချင်း- မကွေးအစပ်ဒေသများကို လေကြောင်း တိုက်ခိုက်မှု ပိုမို ပြုလုပ်လာနိုင် သည့်အတွက် လေကြောင်းအန္တရာယ် သတိပြု နေထိုင်ကြရန်နှင့် စစ်ရေးသတိဖြင့် သွားလာကြရန် နှိုးဆော်ထားသည်။
