(006SV)
ချင်းအမျိုးသားတက္ကသိုလ် (CNU) က ယခုနှစ် စက်တင်ဘာလတွင် Diploma in Community Development သင်တန်းကို စတင်ဖွင့်လှစ်မည်ဖြစ်၍ သတ်မှတ်အရည်အချင်း ကိုက်ညီသူများ လျှောက်ထားနိုင်သည်ဟု သိရသည်။
အဆင့်မြင့်ပညာရေးအဖွဲ့အစည်းများ၏ ပညာသင်နှစ်ကို ၂၀၂၇ ခုနှစ် ဩဂုတ်လတွင် တပြေးညီ စတင်ဖွင့်လှစ်ရန် စီစဉ်ထားပြီး အဆိုပါ အဆင့်မြင့်ပညာသင်နှစ် မစတင်မီကာလအတွင်း Diploma in Community Development သင်တန်းကို ဖွင့်လှစ်ခြင်းဖြစ်သည်ဟု CNU ထံမှ သိရသည်။
၉ လတာ ကြာမြင့်မည့် အဆိုပါဒီပလိုမာသင်တန်းကို ဩဂုတ်လ ၃၀ ရက် နောက်ဆုံးထား၍ လျှောက်ရမှာဖြစ်ပြီး Google forms ဖြင့် လျှောက်ထားနိုင်သကဲ့သို့ Google Forms ဖြင့် လျှောက်ထားရင် အဆင်မပြေသူများသည် chinnationaluniversity@gmail.com သို့ လျှောက်လွှာများ တောင်းယူနိုင်သည်ဟု သိရသည်။
အခြေခံပညာပြီးမြောက်ကြောင်းလက်မှတ် (BECC of Chinland MoE or NUG MoE) ရရှိထားသူများ၊ စစ်အာဏာသိမ်းမှုကြောင့် တက္ကသိုလ်ဆက်မတက်တော့ဘဲ ရပ်နားထားသူများ ၊ အိမ်နီးချင်းနိုင်ငံများမှ Grade 12 အောင်မြင်ခဲ့သူများ GED (General Education Development) နှင့် IGCSE (International General Certificate of Secondary Education) စာမေးပွဲ ဖြေဆိုအောင်မြင်ထားသူများ ၊ တိုင်းရင်းသား ပညာရေးစနစ်များမှ အထက်တန်းပညာ ပြီးမြောက်အောင်မြင်ထားသူများ လျှောက်ထားနိုင်သည်ဟု သိရသည်။
သတ်မှတ်ချက်များနှင့် ပတ်သက်၍ ချင်းအမျိုးသားတက္ကသိုလ်၊ ပညာရေးအဖွဲ့၏ ဆုံးဖြတ်ချက်သာ အတည်ဖြစ်ပြီး လိုအပ်သော ပညာအရည်အချင်း လက်မှတ် အထောက်အထားမိတ္တူများ၊ သက်ဆိုင်ရာ မြို့နယ်/ဒေသ ပြည်သူ့အုပ်ချုပ်ရေးအဖွဲ့ ပညာရေးဌာန၏ ထောက်ခံစာများ လျှောက်လွှာတွင် ပူးတွဲထည့်ပေးရမည်ဟု သိရသည်။
CNU သို့ အချိန်မီ မရောက်ရှိသော လျှောက်လွှာများနှင့် ပြည့်စုံစွာ မဖြည့်သွင်းထားသော လျှောက်လွှာများကို ထည့်သွင်းစဉ်းစားမည် မဟုတ်ပါကြောင်း၊ အိမ်နီးချင်းနိုင်ငံများမှ Grade 12 အောင်မြင်သူများအနေဖြင့် အောင်လက်မှတ်အပြင် ကျောင်းအုပ် ထောက်ခံစာပါ ပူးတွဲတင်ပြနိုင်ရမည်ဟု သိရသည်။
လျှောက်ထားသူများအနေဖြင့် သင်တန်းပြီးဆုံးသည်အထိ အမှန်တကယ် တက်ရောက်နိုင်သူဖြစ်ရမှာဖြစ်ပြီး ဝင်ခွင့်ရပါက တက္ကသိုလ်ဘက်က ပြန်လည်အကြောင်းကြားပေးမည်ဟု သိရသည်။
အဆိုပါသင်တန်းသည် စာမေးပွဲကြေး၊ ဘွဲ့နှင်းသဘင်ကြေးနှင့် စာရွက်စာတမ်းကြေးများအပြင် ဝင်ကြေး၊ ကျောင်းစာရိတ်၊ ကျန်းမားရေးစောင့်ရှောက်မှု၊ အားကစား၊ စာကြည့်တိုက်၊ အဆောင်နေ ကျောင်းသား/သူများအတွက် အဆောင်ခ နှင့် အစားအသောက် စသဖြင့် စုစုပေါင်း ၁၉ သိန်းကျော် ကုန်ကျမည်ဟု သိရသည်။
Google Form လျှောက်လွှာ – https://docs.google.com/forms/d/e/1FAIpQLScYeI9z74gKRENvVkr2Gs0WfcwmXQUM5Wy4H3dipE0HrsHXDQ/viewform ဖြစ်သည်။
