(006SV)
ချင်းပြည်နယ်မြောက်ပိုင်း၊ တီးတိန်မြို့နယ်ရှိ ကနေဒီတောင်မှာ တပ်စွဲထားသော စစ်ကော်မရှင်တပ်စခန်းကို ချင်းပူးပေါင်းတပ်ဖွဲ့က ပြန်လည်သိမ်းပိုက်လိုက်ပြီး စစ်သုံ့ပန် ၈ ဦးထက်မနည်း ဖမ်းဆီးရမိကြောင်း သိရသည်။
တီးတိန်မြို့နှင့် ကလေးမြို့အကြားရှိ စစ်ရေးအရ အချက်အချာကျသော ကနေဒီတောင်ပေါ်က စစ်ကောင်စီစခန်းကို ချင်းညီ နောင်အဖွဲ့ဝင် PDF- Zoland နှင့် ချင်းလဲန်းကောင်စီအဖွဲ့ဝင် CDF- CDM Siyin ချင်းပူးပေါင်းတပ်က ဇန်နဝါရီလ ၄ ရက် ပြန်လည်သိမ်းပိုက်နိုင်ခြင်းဖြစ်သည်။
“PDF Zoland က CDF CDM စီယင်းနဲ့ ပူးပေါင်းတိုက်တာ ဖြစ်တယ်။ သိမ်းတာကတော့ အလုံးစုံတော့ သိမ်းပြီးပြီပေါ့နော်။ စစ်သုံ့ပန်တွေလည်း ဖမ်းဆီးရမိထားတာ ဟုတ်ပါတယ်။ နယ်မြေရှင်းလင်းရေး လုပ်ဆောင်နေဆဲဖြစ်တယ်” ဟု PDF – Zoland မှ ပြောရေးဆိုခွင့်ရှိသူက ပြောသည်။
ကနေဒီတောင်စခန်းသိမ်းတိုက်ပွဲတွင် စစ်ကော်မရှင်တပ်မှ ထိခိုက်သေဆုံးမှုများ ရှိပြီး စစ်သုံ့ပန် ၁၀ ဦးကို အရှင်ဖမ်းဆီး ရမိကြောင်း၊ လက်နက်ခဲယမ်းတချို့ကိုလည်း သိမ်းဆည်းရမိကြောင်း အဆိုပါအခြေအနေကို သိရှိသော စစ်ရေးသတင်းရင်းမြစ်က ပြောသည်။
ထွက်ပေါ်လာသော စခန်းသိမ်းရုပ်သံဖိုင်တွင် စစ်ကော်မရှင်တပ်သား ၈ ဦးထက်မနည်းကို ဖမ်းဆီးရမိထားပြီး ချင်းပူးပေါင်းတပ်ဖွဲ့က စစ်ဆေးမေးမြန်းနေသည်ကို တွေ့ရှိရသည်။
ဖမ်းဆီးရမိသော စစ်သုံ့ပန်းအရေအတွက်နှင့်ပတ်သက်၍ PDF – Zoland မှ ပြောရေးဆိုခွင့်ရှိသူက သီးခြားအတည်ပြု ပြောဆိုခြင်း မရှိပေ၊၊
ကနေဒီတောင်စစ်စခန်းကို ပြန်လည်သိမ်းပိုက်နိုင်ရေးအတွက် ချင်းပူးပေါင်းတပ်က ဒီဇင်ဘာလကုန်ပိုင်းကတည်းက ထိုးစစ်ဆင်တိုက်ခိုက်နေသည်ဟု သိရသည်။
