(002MG)
ချင်းပြည်နယ်၊ တီးတိန်မြို့မှာ တာဝန်ထမ်းဆောင်နေသော စစ်ကောင်စီလက်အောက်ခံ ရတဖ (၂၆) တပ်ရင်းမှ ရဲတပ်သား ခိုင်ထူးဉာဏ် (ကိုယ်ပိုင် နံပါတ်/ လ-၂၉၂၀၄၉) သည် ဇန်နဝါရီလ (၉) ရက်နေ့ညက CDF-CDM Siyin ထံသို့ အလင်းဝင်ခဲ့သည်ဟု သိရသည်။
အဆိုပါ ရဲတပ်သားသည် လက်နက်တလက်၊ ခဲယမ်းအချို့နှင့်အတူ အလင်းဝင်ရောက်လာခြင်းဖြစ်ပြီး ငွေကျပ် သိန်း (၁၀၀) ချီးမြှင့်သွားမည်ဖြစ်ကြောင်း CDF-CDM Siyin က ထုတ်ပြန်ထားသည်။
စစ်ကောင်စီတပ်အတွင်းမှ အလင်းဝင်ရောက်လိုသည့် တပ်သားများအနေဖြင့် ဆက်သွယ်နိုင်ကြောင်း၊ မြို့တွင်းဖြစ်စေ၊ မည်သည့်နေရာတွင် ဖြစ်စေ သွားရောက်ကြိုဆိုပေးမည်ဖြစ်သည့်အပြင် သွားလိုသည့် နေရာ၊ လုပ်လိုသည့် အလုပ်အကိုင်ကိုလည်း စိတ်တိုင်းကျစီမံဆောင်ရွက်ပေးမည်ဖြစ်ကာ ကောင်းကောင်းမွန် မွန်စောင့်ရှောက်ထား ပေးမည်ဖြစ်ကြောင်း CDF-CDM Siyin က အသိပေးထားသည်။
ယနေ့ ဇန်နဝါရီလ (၁၀) မနက်ပိုင်းတွင် တီးတိန်မြို့ပေါ် စကောလမ်း ရပ်ကွက်ဖက်မှာ ကားဖြင့် ကင်းလှည့်နေသော PDF-Zoland အဖွဲ့ကို စစ်ကောင်စီတပ် ၂၆၉ တပ်ရင်းက ပစ်ခတ်မှုရှိခဲ့ပြီး မြို့ပေါ်နေပြည်သူများအကြား စိုးရိမ်မှု မြင့်တက်ခဲ့ကြောင်း၊ နေအိမ်အနည်းငယ် ထိခိုက်ပျက်စီးမူရှိခဲ့ သည်ဟု သိရသည်။
