တောင်ပေါ်မြေပြန့် တန်းတူညီမျှမှု ရှိသော ပြည်ထောင်စု ပေါ်ပေါက်သည်အထိ တိုက်ပွဲဝင်မည်ဟု CDF – အရှိုကြေညာ

(006SV)

တောင်ပေါ်မြေပြန့်အပါအဝင် ပြည်ထောင်စုတစ်ခုလုံးရှိ တိုင်းရင်းသား လူမျိုးစု အားလုံးအတွက် ကောင်းမွန်မျှတမှု ရှိသည့် နိုင်ငံရေးစနစ်တစ်ရပ် ပေါ်ပေါက်ရေးနှင့် တန်းတူညီမျှမှု ရှိသော ပြည်ထောင်စုတစ်ရပ် ပေါ်ပေါက်လာ သည် အထိ ဆက်လက်တိုက်ပွဲဝင်သွားမည်ဟု ချင်းကာကွယ်ရေးတပ် – အရှိုက ကြေညာသည်။

ချင်းကာကွယ်ရေးတပ် – အရှို တပ်တည်ထောင်ခြင်း ၃ နှစ်ပြည့် အထိမ်းအမှတ်အဖြစ် ဇန်နဝါရီလ ၂၁ ရက်က သဘောထား ထုတ်ပြန်ချက်တွင် ကြေညာခြင်းဖြစ်သည်။

CDF- အရှို၏ တော်လှန်ရေး ၃ နှစ်တာ ခရီးတွင် ပြည်တွင်း ပြည်ပရှိ တော်လှန်ပြည်သူများ၏ ပံ့ပိုးဝန်းရံမှုများကြောင့် စစ်ဆင်ရေးနှင့် ပြည်သူ့အကျိုးပြု လုပ်ငန်းများ ဖော်ဆောင်နိုင်ခဲ့သည်ဟု သိရသည်။

အနာဂါတ် ဖက်ဒရယ်ဒီမိုကရေစီ ပြည်ထောင်စု တည်ဆောက်ရန် အထောက်အကူပြုသည့် တပ်ဖွဲ့တစ်ခုအဖြစ် အခိုက်အမာရပ်တည်သွားမည်ဟု CDF – အရှို၏ ထုတ်ပြန်ချက်တွင် ဖော်ပြထားသည်။

ခေတ်အဆက်ဆက်မှ ယနေ့ နွေဦးတော်လှန်ရေးအထိ စစ်အစိုးရ၏ ပြည်ထောင်စု တိုင်းရင်းသား လူမျိုးစုများအပေါ် သွေးခွဲ အုပ်ချုပ်မှုများ၊ ဖိနှိပ်မှုများနှင့် ကျူးလွန်ခဲ့သော စစ်ရာဇဝတ်မှုများကိုလည်း ကွန့်ကွက်ရှုတ်ချသည်ဟု သိရသည်။

လက်ရှိတော်လှန်ရေးကာလ စစ်ကော်မရှင်တပ်၏ အရပ်သားပစ်မှတ်ဖြစ်သော စစ်ဆင်ရေးများကြောင့် အသက်ခန္ဓာနှင့် အိုးအိမ် ဆုံးရှုံးပြီး နေရပ်စွန့်ခွာကြရသော ပြည်သူတစ်ရပ်လုံးနှင့် ထပ်တူထပ်မျှ ရပ်တည်ခံစားရပါကြောင်း အလေးအနက်ဖော်ပြလိုပါသည်ဟု CDF – အရှိုက ထုတ်ပြန်သည်။

CDF – အရှို၏ စစ်ဆင်ရေးများတွင် အသက်၊ သွေး၊ ချွေးနှင့် ကိုယ်ခန္ဓာ အစိတ်အပိုင်းများကို စွန့်လွှတ် ပေးဆပ်ခဲ့ရသော တော်လှန်ရေး ရဲဘော် အာဇာနည်းသူရဲကောင်းများကို ဂုဏ်ယူလေးစားစွာ အလေးပြုအပ်ပါသည်ဟု ဆိုသည်။

တပ်တည်ထောင်ခြင်း ၃ နှစ်ပြည့် အခမ်းအနားသို့ တော်လှန်ရေး မဟာမိတ် တပ်ဖွဲ့ အသီးသီးမှ အရာရှိ အရာခံ အကြပ်စစ်သည်များ တက်ရောက်ခဲ့ကြပြီး CDF – အရှို ရဲဘော် စစ်မေများမှ ချင်းရိုးရာ ဝါးညှပ်အကနှင့် ရိုးရာ ဓလေ့ ဖော်ကျူးသော အကအလှများဖြင့် ကပြဖျော်ဖြေသည်ဟု သိရသည်။