ချင်းပြည်နယ် ရိခေါဒရ်မြို့ အမှတ် ၂ အိန္ဒိယ-မြန်မာနယ်စပ်ကုန်သွယ်ရေးကတဆင့် မီဇိုရမ်ပြည်နယ်ကို ဝင်ရောက်မည့် မြန်မာဘက်က ကုန်ပစ္စည်းများအားလုံးကို ကျန်ဖိုင်းခရိုင် မော်တော်ယာဉ်များအသင်းက ဇူလိုင်လ ဒုတိယပတ်ကစ၍ ပိတ်ပင်ထားမြစ်ထားသည်ဟု သိရသည်။
မီဇိုရမ်ပြည်နယ်အတွင်းသို့ ဝင်ရောက်လာသည့် မြန်မာကုန်ပစ္စည်းများအနက် ကွမ်းသီးခြောက်တစ်ခုတည်းကိုသာ တရားမဝင်ပစ္စည်းအနေဖြင့်သတ်မှတ်ကာ မီဇိုရမ်အစိုးရက ပိတ်ပင်ထားဆီးထားသည့်အပေါ် ကျန်ဖိုင်းခရိုင် မော်တော်ယာဉ်များအသင်းက မကျေနပ်သည့်အတွက် ယခုကဲ့သို့ နယ်စပ်ကတဆင့် ဝင်လာမည့် မြန်မာကုန်ပစ္စည်းများအားလုံးကို ဇူလိုင် ၁၃ ရက်နေ့ကစ၍ ပိတ်ပင်ထားမြစ်လိုက်ကြခြင်းဖြစ်သည်။
အိန္ဒိယ-မြန်မာနယ်စပ်ကုန်သွယ်ရေး ချင်းပြည်နယ် ရိခေါဒါရ်မြို့ဒေသခံတစ်ဦးက “ဘာမှတင်ပို့လို့မရဘူး ဘယ်ကုန်ပစ္စည်းမဆို သရက်သီး၊ ကွမ်းရွက်ကအစ ဘာမှသယ်လို့မရဘူး ခရီးစောင်အိတ်ပါ အကုန်စစ်တယ်၊ ကုန်စမ်းပါမကျန်အောင်အ ကုန်ပိတ်တော့ အတော်လေး ဒုက္ခဖြစ်နေကြတယ်” ဟု ပြောသည်။
အိန္ဒိယ-မြန်မာနယ်စပ်ကတင့် မီဇိုရမ်ပြည်နယ်သို့ ဝင်ရောက်သည့်ကုန်ပစ္စည်းအားလုံးနီးပါးသည် တရားဝင်နည်းလမ်းဖြင့် ဝင်ရောက်လာခြင်းမဟုတ်ဘဲ ယင်းကုန်ပစ္စည်းများအနက် ကွမ်းသီးခြောက်ကိုသာ ဖမ်းဆီးအရေးယူမှုပြုလုပ်ခြင်းသည် တရားမျှတမှုမရှိသည့်အပြင် ကျန်ဖိုင်းခရိုင်အတွင်းရှိ ပြည်သူများအား ခွဲခြားဖိနှိပ်မှုတစ်ခုဖြစ်သည်ဟု ကျန်ဖိုင်းခရိုင် မော်တော်ယာဉ်များအသင်းက ဆိုသည်။
ကျန်ဖိုင်းခရိုင်သည် အိန္ဒိယ-မြန်မာနယ်စပ် ချင်းပြည်နယ်နှင့်ထိစပ်နေသော ဒေသဖြစ်ပြီး နယ်စပ်ကုန်သွယ်ရေးမှတဆင့် မီဇိုရမ်ပြည်နယ် မြို့နယ်အသီးသီးသို့ ပို့ဆောင်မည့် မြန်မာကုန်ပစ္စည်းများအားလုံးသည် ကျန်ဖိုင်းမြို့ကို ဖြတ်သန်းသွားလာကြရသည်။
ယခုလက်ရှိတွင် နယ်စပ်ကုန်သွယ်ရေးစခန်းမှတဆင့် ကျန်ဖိုင်းမြို့သို့သွားသည့် Melbuk နှင့် Mualkawi ကျေးရွာတွင် စစ်ဆေးရေးဂိတ်များထားရှိကြသည့်အပြင် ကျန်ဖိုင်းမြို့ အထွက်တွင်လည်း စစ်ဆေးရေးဂိတ်ထားရှိကာ ကျန်ဖိုင်းမြို့ကို ဝင်လာမည့် ကုန်ပစ္စည်းနှင့် ကျန်ဖိုင်းမြို့မှ ထွက်ခွါမည့် မြန်မာကုန်ပစ္စည်းအားလုံးကို ပိတ်ပင်ထားကြသည်။
ကျန်ဖိုင်းခရိုင် မော်တော်ယာဉ်များအသင်းအနေဖြင့် ကွမ်းသီးခြောက်များအား လွတ်လပ်စွာသယ်ယူခွင့်ပြုရန် မီဇိုရမ်အစိုးရကို တောင်းဆိုထားကြပြီး ၎င်းတို့၏ တောင်းဆိုချက်မရမရချင်း မြန်မာကုန်ပစ္စည်းများကို ပိတ်ပင်သွားမည်ဟု သိရသည်။
