မီဇိုရမ်ပြည်နယ်အတွင်း ရောက်ရှိနေကြသော မြန်မာစစ်ဘေးရှောင်များ ကျန်းမာရေးစောင့်ရှောက်မှုကူညီနိင်ရန် အမေရိကန်ပြည်ထောင်စုမှရောက်ရှိလာသော Project-Mizoram ‘22 ၏ ဆေးဘက်ဆိုင်ရာပစ္စည်းများအား လွဲအပ်ခြင်းအခမ်းအနားကို သြဂုတ်လ ၁၀ ရက်နေ့က အိုင်ဇောလ်မြို့ Floria ဟိုတယ်တွင် ကျင်းပခဲ့ကြသည်။
Project-Mizoram စီမံကိန်းသည် အမေရိကန်အခြေစိုက် ကမ္ဘာ့အကြီးဆုံး ကျန်းမာရေးထောက်ပံ့ကူညီရေးအသင်း Project C.U.R.E၊ မြန်မာဒုက္ခသည်ကယ်ဆယ်ရေးအဖွဲ့ချုပ်-မီဇိုရမ် (MRRC-M)၊ Mizo Student Union (MSU)၊ R2P Myanmar Way၊ အိုင်ဇောင်မြို့ရှိ BN Hospital၊ Research Center Mizoram၊ Arizona Falam Christian Church နင့် Chin Baptist Association North America စသည့် အဖွဲ့စည်းများမှ ပူးပေါင်းဆောင်ရွက်ခြင်းဖြစ်သည်။
အဆိုပါ ဆေးဝါးနှင့် ဆေးဘက်ဆိုင်ရာပစ္စည်းများသည် ကျပ်သိန်းပေါင်း ၇၅၀၀ ကျော်တန်ဖိုးရှိကြောင်းသိရပြီး၊ ကျန်းမာရေးအတွက်ဆေးဝါးနှင့် အခြားသော အစားအသောက်ပိုင်းဆိုင်ရာ ထောက်ပံ့မှု စီမံကိန်းများလည်း ရှိသေးကြောင်း သိရသည်။
ယင်း Project-Mizoram ‘22 မှရရှိသော ဆေးဝါးနှင့် ဆေးဘက်ဆိုင်ရာအသုံးအဆောင်ပစ္စည်းများကို မီဇိုးကျောင်းသားများအသင်း (MSU) နင့် မြန်မာဒုက္ခသည်ကယ်ဆယ်ရေးအဖွဲ့-မီဇိုရမ် (MRRC-M) တို့အဖွဲ့ထံ လွဲအပ်ပြီး၊ အချို့သော ကျန်းမာရေးစစ်ဆေးရေးစက်ပစ္စည်းများကို အိုင်ဇောင်မြို့ရှိ BN ဆေးရုံသို့ လွဲအပ်ပေးခဲ့ကြသည်။
ထိုအခမ်းအနားတွင် မီဇိုရမ်ပြည်နယ် ဝန်ကြီးချုပ် Pu Zoramthanga လည်းတက်ရောက်လာပြီး မြန်မာစစ်ဘေးရှောင်ပြည်သူများအား ဆက်လက်ကူညီသွားမည်ဖြစ်ဖြစ်ကြောင်း အိန္ဒိယဗဟိုအစိုးရကိုလည်း ယခုထက်မက ဖိအားပေးတိုက်တွန်းသွားမည်ဖြစ်ကြောင်း ပြောဆိုခဲ့သည်။
ယင်းအခမ်းအနားတွင် ချင်းပြည်နယ် ဝန်ကြီးချုပ်ဟောင်း ဦးဆလိုင်းလျန်လွယ်၊ လွှတ်တော်ကိုယ်စားလှယ်အချိူ့နှင့် သက်ဆိုင်ရာအဖွဲ့အစည်းမှ တာဝန်ရှိသူများ တက်ရောက်ခဲ့ကြသည်။
ချင်းပြည်နယ်နှင့် နယ်နိမိတ်ချင်းထိစပ်နေသော မီဇိုရမ်ပြည်နယ်တွင် ယခုလက်ရှိ မြန်မာနိုင်ငံမှ စစ်ဘေးရှောင်ပြည်သူ ၃ သောင်းကျော် ၄ သောင်းနီးပါးခန့် ခိုလုံနေကြရပြီး မီဇိုရမ်ပြည်နယ်အစိုးရအဖွဲ့၊ အရက်ဖက်လူမှုအဖွဲ့အစည်းများက ကူညီစောင့်ရှောက်မှုပေးနေကြသည်။
